ƗMbombo ɨzya Bhasontwa 27

Bhahunʼtwala ʉPaulo hwi‑ibooma ɨlyɨ Luumi

1Ɨpo ʉFeesito ʉnʼgoosi ʉwɨ mukowa ahafumya ʉlugamulo huje, tishʉʉle nɨ meeli abhale hu nsi ɨyɨ Itaaliya. Bhahamʼmɨɨha ʉPaulo na bhakʉngwe abhanjɨ hu lɨndɨɨlɨli ʉwa nʼnongozi ʉmo ʉwa bhalwi, ʉyo itaawa lyakwe ahali yʉ Yuliiyo. Ʉmwene ahali nʼnongozi ʉwɨ shipʉga ɨsha mwɨnɨ ʉAgusito. 2Ɨshi, tahatʉʉha mu meeli ɨmo ɨya hu Adulamitiiyo ya yahashʉʉlaga na hwɨmɨɨlɨle mu mabooma aga munshɨnjɨ yɨ nsʉmbi mu mukowa ʉgwɨ Aasiya. Tahasogola paala peeka nʉ Alisitaalʉko ʉmwoziwa ʉwa hwi‑ibooma ɨlyɨ Tesaloniike mu mukowa ʉgwɨ Makedoniya.

3Ɨndaabhɨ yaakwe, lwa taafiha pi‑ibooma ɨlyɨ Siidoni, ʉYuliiyo ahamʼmombela shinza ʉPaulo. Ahanʼneha ʉPaulo huje, alolane na bhamanyani bhaakwe aje, bhamʼmwavwe vya vibhuliiye hwa mwene. 4Tahasogola pa Siidoni, tahashila hunshɨnjɨ ambali mwanya hu nsi yɨ‑ɨli paahati yɨ nsʉmbi ya bhayiga ɨKiipulo, pɨpo ʉhwo saga hwahali nɨ haala ɨngoosi ya yahavugulaga hwitagaalila lyetu. 5Tahafwɨmɨɨla ɨnsʉmbi ɨyo ashilile hunshɨnjɨ mu mukowa ʉgwɨ Kilikiya nʉ gwɨ Pamfiliya. Tahafiha mwi‑ibooma ɨlyɨ Miila mu mukowa ʉgwɨ Likiya. 6Ɨpa ʉnʼnongozi ʉla ahayaaga ɨmeeli yɨ‑ɨfuma hwi‑ibooma ɨlyɨ Alekizandiliya. Ɨmeeli ɨyo yahabhalaga hu nsi ɨyɨ Itaaliya. Ɨpo ahatitʉʉsya mu meeli ɨyo.

7Tahamala ɨnsiku zinyinji mu meeli ɨla sha tishʉʉla wolowoolo. Pamandɨ, hu mayɨmba tahapalamila afishe pi‑ibooma ɨlyɨ Niido. Ɨpo ɨhaala yahatizijila huje, tishizanye nyɨɨma. Ɨshi, tahashila ambali ntende hunshɨnjɨ yɨ nsi ya yahali muuhati mu nsʉmbi ya bhahagaga ɨKileete, pa pɨɨpɨ na pa bhahagaga ɨSalumooni, pɨpo ʉhwo ɨhaala saga yahali ngoosi. 8Tahashila munshɨnjɨ mu nsʉmbi hu mayɨmba tee, tahafiha pa bhahagaga ɨShitʉʉyɨlo ɨShinza ɨshɨ Meeli, pa pɨɨpɨ ni‑ibooma ɨlyɨ Laseeya mu nsi yɨɨyo ɨyɨ Kileete.

9Ɨpo zyahashila ɨnsiku zinyinji, lyope Isiku ɨlya‑Akhobhoshelwe ɨMbiibhi#27:9 Isiku ɨlya‑Akhobhoshelwe ɨMbiibhi ABhayahuudi shila mwaha bhahali ni‑isiku ɨlya‑akhobhoshelwe ɨmbiibhi lya bhahwibhɨshɨɨye. Pi‑isiku ɨlyo bhahapuutaga na hwiyiime alye. Ʉnʼsayi ʉnʼgoosi ʉwa Ngʉlʉbhɨ ahafumyaga ɨnsangu ɨzya‑alʉngʉlɨzye na hubhapuutile abhantu huje, ʉNgʉlʉbhɨ abhakhobhoshele ɨmbiibhi zyabho. Bhaazya ɨMbombo ɨzya Bhalaawi 16; 23:26-32; ɨMbaazyo 29:7-11. Hu habhaazyo haala, ɨnsʉmbi yahali ɨvwalangana tee. lyahabha lishilile. Ɨshi hwahabha hupalaapala tee ashʉʉle nɨ meeli. Ɨpo ʉPaulo ahabhasunda bhonti ahaga, 10“Bhaya, ɨlola huje, ɨnshʉʉla ɨnɨ ɨbhala‑abhe yɨ mayɨmba tee. Ɨmeeli ɨnɨ peeka na mazigo gaakwe, vyonti vibhala‑amalishile mu nsʉmbi, nantele natɨ tenti tibhajiiye afwe.”

11Leelo, ʉnʼnongozi ʉla ʉwa bhalwi saga ahagatiniha lwonti amazwi ga Paulo. Ʉmwene ahagɨɨtɨha amazwi aga nʼgoosi ʉwɨ meeli na ga mwanɨɨsho meeli. 12Ɨshi, pa shitʉʉyɨlo ɨshɨ meeli saga pahali pinza hu habhaazyo ahi‑isasa. Hu nongwa ɨyo, abhantu abhinji abha mu meeli bhahɨtɨɨhana ajendeelele nɨ nshʉʉla huje, bhajele afishe pa shitʉʉyɨlo ɨshɨnjɨ ɨshɨ meeli ɨsha hu Kileete, sha bhahagaga ɨFoyiniisi. Ɨpo pa tahanzaga akhale mu habhaazyo ahi‑isasa. Ɨshitʉʉyɨlo ɨshɨ meeli ɨshɨ Foyiniisi shahali ambali hu swelo ʉwi‑isanya mu nsi ɨyɨ Kileete.

ɄPaulo na bhamwabho bhayɨmba mu nsʉmbi

13Pamandɨ ɨhaala ɨntengaanu yɨ‑ɨfuma ambali ntende yahanda avugule. Abhabhomba mbombo abha mu meeli bhahasɨɨbha huje, bhalyajile idala ɨlya‑ajendeelele ashʉʉle, nanshi sha bhahɨtɨhɨɨne. Ɨpo bhahazʉvya ɨshintu ɨshimwamu ɨsha hwɨmɨlɨsɨzye ɨmeeli,#27:13 ɨshintu ɨshimwamu ɨsha hwɨmɨlɨsɨzye ɨmeeli Mu njango ɨyɨ Shiswahili bhayiga, nanga. bhahasogola paala nɨ meeli, bhahashila hunshɨnjɨ mu nsʉmbi ambali hu Kileete, ɨnsi ɨla yɨ‑ɨli paahati yɨ nsʉmbi. 14Ahabhaazyo hashe lwene lwa haashila, hwahafumila ɨhaala ɨngoosi tee afume mwanya. Ɨhaala ɨyo bhahagaga ɨHaala Mwanya. 15Ɨhaala ɨyo yahayibuuha ɨmeeli hu lubhazu. Ɨpo yahatimena hu maha, tahapootwa ajendeelele nɨ nshʉʉla yeetu. Yahatibunshila ʉhutali mu nsʉmbi.

16Ɨpo tahashila ambali ntende ɨyɨ nsi ɨndoodo yɨ‑ɨli paahati yɨ nsʉmbi. Itaawa lyɨ nsi ɨyo lyahali Kawuda. Ɨnsi ɨyo yahatizijila hashe nɨ haala ɨla ya yahavugulaga. Paala tahapinya ʉwaato ʉwa hubhafyʉlɨle abhantu mu meeli hu mayɨmba. 17Ʉwaato lwa wanyʉmʉlɨlwa mu meeli, abhabhomba mbombo abha mu meeli bhahapinya ɨmeeli nʉ lwabho huje, ɨmeeli ɨsahabudushe. Bhahogopaga amiliile mu nʼsanga ʉgwa mu nsʉmbi ʉgwa hu nsi ɨyɨ Liibiya. Hu nongwa ɨyo, bhahiisya ɨshintu ɨshimwamu huje, ɨmeeli ɨjendaje wolowoolo, bhahayileha huje, ɨbuhwaje nɨ haala. 18Amabhilingwa gahayibuhanyaaga tee ɨmeeli ɨla. Lwa hwasha, abhabhomba mbombo abha mu meeli bhahanda ataaje amazigo mu nsʉmbi. 19Isiku ɨlya taatu abhabhomba mbombo ɨbho bhahataaga ɨvintu vimo ɨvya‑ajenzezye ɨmeeli huje, ɨmeeli ɨbhe mpʉpʉʉsu. 20Ɨnsiku ɨnyinji zyahashila, saga tahalolaga isanya awe ɨnzota. Ɨhaala yope yahajendelelaga avugule tee. Ɨpo saga tahabha nʉ lusʉʉbhɨlo lwonti ʉlwa‑aje, tigafyʉlwa.

21Abhantu bhaala lwa bhaakhala ɨnsiku zinyinji mu nsʉmbi sinta alye nahamo, ɨpo ʉPaulo ahɨmɨɨlɨla paahati yaabho. Ahabhabhʉʉzya ahaga, “Mubhalume amwɨ, nkashele mwahantejelezyaga lwa nahabhasundaga hu Kileete huje, tigandi asogole, amayɨmba nanshi ɨga saga gataagaga. Nantele, ɨvintu vyenyu vyope handɨ saga muviyaziizye nanshi ɨshi. 22Ɨshi leelo, ɨhubhalamba huje, mujimbe amooyo! Nʉʉmo nka weeka mwaliimwɨ wa‑anza‑afwe, lyoli yɨ meeli nyeene yɨ‑ɨnza‑ananjishe. 23Ɨnjanjile ɨsho, pɨpo anɨ ɨndi muntu wa Ngʉlʉbhɨ nantele mʼmomvi waakwe. Ɨleelo nʉsiku ʉnʼtumi waakwe andoleshɨɨye. 24Ʉnʼtumi ʉyo ambʉzɨɨzye ajile, ‘Paulo, ʉgandi hwogope! Ʉhwanziwa ahwɨmɨɨlɨle pitagaalila lya mwɨnɨ ʉnʼgoosi ʉKayisali. Nantele, ʉmanye shinza huje, bhonti ɨbha bha mushʉʉla peeka, ʉNgʉlʉbhɨ anza hubhafyʉle hu mpyana yaakwe.’ 25Ɨshi bhaholo, jimbaji amooyo! Ɨhumʼmwɨtɨha ʉNgʉlʉbhɨ huje, abhala‑abhombe, nanshi ʉnʼtumi sha‑ambʉzɨɨzye. 26Leelo, tibhala‑ataagwe nɨ haala mu nsi ɨmo yɨ‑ɨli paahati yɨ nsʉmbi.”

ɄPaulo na bhamwabho bhafyʉlwa mu nsʉmbi

27Tahamala ɨnsiku ishʉmi na zinɨ mu nsʉmbi ya bhahagaga Adiliya, sha tibuuhwa ʉhwu nʉ‑ʉhwo nɨ haala ɨngoosi. Nʉsiku paahati, isiku lyɨlyo ɨli‑ishʉmi na wunɨ, abhabhomba mbombo abha mu meeli bhahanda asɨɨbhe huje, pamo tipalamiiye afishe pa nsi ɨnyʉʉmu. 28Ɨpo bhahiisya ʉlukusa lwa bhahapinyiliiye ahantu ahamwamu aje, bhamanye ʉtali wɨ nsʉmbi ahwishe pa nsi. Bhahayaaga ɨnsʉmbi ahwishe pa nsi ɨli nɨ meeta amashʉmi ganɨ ɨshi. Lwa bhazʉmbɨɨla pitagaalila hashe, bhahaweelela ahwisye nantele, bhahayaaga ɨnsʉmbi ahwishe pa nsi ɨli nɨ meeta amashʉmi gataatu ɨshi. 29Abhabhomba mbombo abha mu meeli bhahogʉʉpe tee huje, ɨmeeli ɨgabʉmɨla mwi‑ilyalawe. Ɨpo bhahiisya ɨvintu vinɨ ɨvimwamu ɨvya hwɨmɨlɨsɨzye ɨmeeli vya vyahali hwisinda. Bhahapuutaga huje, hushe lubhilo.

30Abhabhomba mbombo abha mu meeli bhahanzaga aselenje na huyileshe ɨmeeli. Ɨpo bhahiisya ʉwaato ʉwa hubhafyʉlɨle abhantu mu mɨnzɨ, bhahabha nkati bhahwanza ahwisye ɨvintu ɨvimwamu ɨvya hwɨmɨlɨsɨzye ɨmeeli ɨvya hwitagaalila. 31Leelo, ʉPaulo ahamʼmʉʉzya ʉnʼnongozi ʉwa bhalwi peeka na bhalwi bhaakwe huje, “Abhabhomba mbombo ɨbha, nkashele saga bhasyala mu meeli ʉmu, lyoli saga mugaapona.” 32Ɨpo abhalwi bhahadumula ɨnkusa zya bhahapinyiliiye ʉwaato wuula, bhahawuleha huje, wubhalaje na mɨnzɨ.

33Lwa hwapalamila ashe, ʉPaulo ahabhakʉndɨɨlɨzya abhamwabho bhonti huje, bhalye ɨshalye. Ahaga, “Ɨleelo lisiku li‑ishʉmi na wunɨ lya mukhɨɨye hu wooga, nantele sinta alye nka hamo. 34Ɨshi ɨhubhalamba haani huje, mulye aje, mujendeelele abhe bhʉʉmi. Nʉʉmo nka weeka wa‑anza‑afwe awe avwalale.”

35ɄPaulo lwa waamala ayanje ɨsho, aheega ɨntogito, ahanʼsalifya ʉNgʉlʉbhɨ pitagaalila lya bhantu bhaala bhonti, ahamensula, ahanda alye. 36Ɨpo bhonti bhahahwipeela amooyo, bhope bhahalya ɨshalye. 37Ʉwinji weetu mu meeli ɨla, tahali abhantu ɨmya zibhɨɨlɨ na mashʉmi pʉnga na nʼtanda (276). 38Bhonti lwa bhaalya na‑angute, bhahataaga amazigo agɨ ngano mu nsʉmbi aje, ɨmeeli ɨbhe mpʉpʉʉsu.

Ɨmeeli ɨbuduuhana

39Ɨshi lwa hwasha, abhabhomba mbombo abha mu meeli bhahayilola ɨnsi ɨnyʉʉmu, leelo bhahapootwa ayimanye huje, nsi bhʉlɨ. Nantele, bhahapalola apanjɨ ɨpo amɨnzɨ agɨ nsʉmbi gatʉʉshɨle mu nsi ɨnyʉʉmu. Ɨpo bhahasɨɨbha huje, bhajezye ajenzye ɨmeeli na huyileshe huje, ɨtʉʉshe mu nsi ɨnyʉʉmu ɨla. 40Ɨpo bhahadumula ɨnkusa zya bhahapinyiliiye ɨvintu ɨvimwamu ɨvya hwɨmɨlɨsɨzye ɨmeeli, na huvitaajile mu mɨnzɨ. Lwʉnʉʉlwo bhahaawula nɨ nkusa zya bhahapinyiiye ɨvintu ɨvya‑alongozezye ɨmeeli hwɨ‑ɨhwanziwa abhale. Pamandɨ, bhahazʉvya ɨlyenda igoosi ɨlya hwitagaalila#27:40 ɨlyenda igoosi ɨlya hwitagaalila Mu njango ɨyɨ Shiswahili bhayiga, tanga. Lyenda lya lihwavwa apemusye ɨmeeli ʉhwa‑abhale, nkashele yaakhomwa nɨ haala. huje, ɨhaala ɨyibunshilaje ɨmeeli mu nsi ɨnyʉʉmu. 41Leelo ɨmeeli ɨla lwa yazʉmbɨɨla pitagaalila hashe, ɨmbali yaakwe ɨya hwitagaalila yahaduga hwi‑ikhone mu nʼsanga gwa gwahali mu mɨnzɨ, yahamilila mwʉmwo. Ɨmbali yaakwe ɨya hwisinda yahakhomwaga tee na mabhilingwa, ɨpo yahanda abuduuhane.

42Ɨpo abhalwi bhahɨtɨɨhana huje, bhabhagoje abhakʉngwe bhonti aje, pasahabhe nkʉ‑ʉmo wa‑agabhaselenga hwi‑idala ɨlya‑asabhe. 43Leelo ʉnʼnongozi ʉla ʉwa bhalwi saga ahanzaga huje, bhanʼgoje ʉPaulo. Ahabhakhaana. Ɨpo ahayanga huje, bhonti bha bhamɨɨnye asabhe, bhadumbushilaje mu mɨnzɨ huje, bhalobhoshe hu nsi ɨnyʉʉmu. 44Bha bhasagala, bheegaje amabampa awe ɨvibampa ɨvyɨ meeli vya vibuduushe aje, vibhaavwe alobhoshe. Ɨsho sha tahalobhʉʉshe tenti, sha tili bhʉʉmi.

Currently Selected:

ƗMbombo ɨzya Bhasontwa 27: SBK

Highlight

Copy