2 ABhatesaloniike 3
3
ɄPaulo ahubhalaabha abhooziwa huje bhabhaputilaje
1Ɨshi bhooziwa bhamwetu, tiputilaji huje izwi lya Mwɨnɨ ʉYeesu linyampaane lubhilo, nantele abhantu bhalyambɨɨlɨle hu nshɨnshɨ nanshi ɨsho hwahali huliimwɨ. 2Nantele puutaji hwa Ngʉlʉbhɨ huje atifyʉle hwa bhantu abhabhiibhi na hwa bhi‑ilenga, pɨpo abhantu abhinji saga bhahuzyɨtɨha ɨNongwa ɨNyinza ɨzya Mwɨnɨ ʉYeesu. 3Leelo ʉMwɨnɨ ʉYeesu nʼnʉnjɨsu, ʉmwene ahayihubhakhamantanya amwɨ na hubhalɨndɨɨlɨle nʉ Mʼmiibhi ʉla ʉSeetano. 4Naatɨ tili nʉ lusʉʉbhɨlo hwa Mwɨnɨ ʉYeesu huje mubhomba, nantele mwahayijendeelela abhombe ɨzyo zya tahabhabhʉzɨɨzye. 5Tihunʼnaabha ʉMwɨnɨ ʉYeesu abhalongozye amooyo geenyu, abhe nʉ lugano ʉlwa Ngʉlʉbhɨ na‑abhe nʉ jimbiilizu ʉwa Kilisiti.
Ɨnsundo hwa bhooziwa abhoolo
6Amwɨ mubhooziwa mubhamwetu, tihubhalajizya hwi‑ikhone lya Mwɨnɨ ʉYeesu ʉKilisiti huje mubhanje hutali na bhooziwa bhonti abhoolo, ɨbho bha saga bhakhata ɨmanyizyo zya tahabhapiiye. 7Amwɨ mumɨɨnye shinza shɨ‑ɨhwanziwa alondolezye ɨshifwani sheetu shiila sha tahakhalaga huliimwɨ. Ɨnjanjile ɨsho, pɨpo atɨ lwa tili huliimwɨ saga tahali bhoolo. 8Nantele saga tahaliiye ɨshalye sha muntu sinta hunʼsombe. Leelo tahakhasyaga tee abhombe ɨmbombo nʉsiku na pasanya huje tigandi humʼbidule ʉmuntu wowonti huliimwɨ. 9Lwa tahabhombaga ɨsho, saga aje saga tahakhondɨɨye ahwambɨɨlɨle ɨnyaavwo, leelo tahabhombaga ɨmbombo huje tibhe shifwani huliimwɨ. 10Lwa tili peeka naamwɨ, tahabhabhʉzyaga huje, “Ʉmuntu wowonti wa saga ahwanza abhombe ɨmbombo, ʉyo saga akhondɨɨye alye.”
11Tiyanjile amazwi ɨgo pɨpo tahʉmvwa huje bhalɨɨho abhantu bhamo huliimwɨ ɨbho bhoolo, saga bhabhomba nahamo, leelo bhahwitʉʉsya mu nongwa zya bhamwabho. 12Tihubhalajizya na hubhasunde abhantu ɨbho hwi‑ikhone li‑itaawa lya Mwɨnɨ ʉYeesu ʉKilisiti, huje bhatengaane na‑abhombe ɨmbombo hu nongwa ya‑abhe nɨ shalye shaabho bhɨɨbho. 13Lyoli amwɨ mubhooziwa mubhamwetu, mugandi alite abhombe aminza.
14Mubhanje hutali nʉ muntu wowonti wa saga akhata amazwi ɨgo tibhasimbiiye mu kalaata ɨnɨ. Nantele mugandi abhombe peeka nawo huje alole ɨnsoni. 15Mugandi humʼmombe nanshi ʉnʼnʉgʉ, leelo munʼsunde nanshi ʉmwoziwa ʉwamwenyu.
Amazwi aga hu malishilo
16Tilaabha hwa Mwɨnɨ ʉNgʉlʉbhɨ wa‑ahubhapeela abhantu ʉtengaanu ɨnsiku zyonti hu madala gonti. Ʉmwene abhanje peeka naamwɨ mwenti. 17Anɨ nɨPaulo ɨnsimbile ɨndamuho ɨzi hu nʼkhono gwanɨ nɨɨnɨ, ɨshi shɨ‑ɨhubhasimbila mu kalaata zyanɨ zyonti.
18Ɨmpyana ya Mwɨnɨ weetu ʉYeesu ʉKilisiti ɨbhanje peeka naamwɨ mwenti.
© 2022, Wycliffe Bible Translators, Inc. All rights reserved.