2 ABhatesaloniike 2
2
Ahwɨnze hwa Mwɨnɨ ʉYeesu na‑abhoneshe hwa Mʼmiibhi ʉla
1Ɨshi bhooziwa bhamwetu, tihubhasimbila hu nongwa ya hwɨnze hwa Mwɨnɨ weetu ʉYeesu ʉKilisiti ʉlwa bhɨɨlɨ na shiila sha tahayibhʉngaana nawo na‑akhale peeka nʉ mwene. Tihubhalaabha huje, 2muleshe ahwogope na‑abhe nɨ nsyoho, hu nongwa zyɨ kuwi, hwope ɨzya‑alʉmbɨɨlɨle, hwope hu nongwa yɨ kalaata ya bhayanga huje, ɨfumile huliitɨ, huje isiku ɨlya hwɨnze hwa Mwɨnɨ lifishile. 3Amwɨ mugandi agobelwe nʉ muntu wowonti hu lyolyonti, pɨpo isiku ɨlyo saga lyahayɨnza nasʉʉti, lyoli afishe wufumile ʉbhiibhi. ɄMʼmiibhi ʉla ʉSeetano lwa waloleha, ahayiyaziwa lwonti. 4ɄMʼmiibhi ʉla ahayihuvisyonshela na huvikhaane vyonti ɨvyo abhantu bhahuvilola huje yʉ Ngʉlʉbhɨ, hwope nɨ vintu ɨvyo abhantu bhahuvipuuta hwɨ‑ɨvyo na hwibhɨɨshe huje, ʉmwene yʉ nʼgoosi wɨ vyonti ɨvyo. Nantele ahayitʉʉha mu nyumba ɨmfinjile ɨya Ngʉlʉbhɨ#2:4 nyumba ɨmfinjile ɨya Ngʉlʉbhɨ Bhaazya izwi Nyumba ɨmfinjile ɨya Ngʉlʉbhɨ hu Ngalulanyo ɨyɨ Mazwi aMajenu hu malishilo wɨ shitaabu ɨshi. na hwibaade huje ʉmwene yʉ Ngʉlʉbhɨ.
5Wɨlɨ! Saga muhwizuha sha nahabhabhʉzyaga ɨnongwa ɨzyo lwɨ‑ɨndi peeka naamwɨ? 6Amwɨ mumɨɨnye sha shihunʼzijila ʉMʼmiibhi ʉla ʉSeetano, aleshe abhoneshe ɨshi, huje ʉNgʉlʉbhɨ ahamʼmonesye hu habhaazyo haakwe. 7Hwope ɨshi, ʉMʼmiibhi ʉla abhomba ɨmbombo zyakwe hu mfiso, nantele ahayijendeelela abhe sinta aloleshe afishe ɨpo ʉyo wa‑ahunʼzijila lwa weefewa. 8Ɨpo pa pɨɨpo ʉMʼmiibhi ʉla ahayibhoneha. Ɨpo ʉMwɨnɨ ʉYeesu ahayihumʼbuda nʉ mwoyi afume mwi‑ilomu lyakwe, na hunʼnyazye hu mwamu waakwe ʉwo wahayiloleha lwa‑ahwɨnza.
9Ʉnʼnʉgʉ ʉyo lwa‑ahayɨnza, ahayɨnza peeka ni‑ikhone lya Seetano#2:9 Seetano Bhaazya izwi Seetano hu Ngalulanyo ɨyɨ Mazwi aMajenu hu malishilo wɨ shitaabu ɨshi. na‑abhombe ɨvimanyishizyo na mayele#2:9 mayele Bhaazya izwi Mayele hu Ngalulanyo ɨyɨ Mazwi aMajenu hu malishilo wɨ shitaabu ɨshi. aminji agi‑ilenga. 10Nantele ahayibha ahubhagobela hu madala aminji bhonti ɨbho bhateejile pɨpo bhahakhɨɨne agane ɨlyoli huje bhambɨɨlɨle ʉfyʉli. 11Sha shɨɨsho ʉNgʉlʉbhɨ abhaleshile abhantu ɨbho bhabhɨɨhwe mwi‑ikhone ɨli‑ilenga huje bhɨtɨhaje ilenga. 12Ɨpo bhonti ɨbho bha saga bhahwɨtɨha ɨlyoli, lyoli bhahuwuseshela ʉbhiibhi, bhahayilongwa.
Akhamantane na‑akhate ɨmanyizyo
13Leelo atɨ tihwanziwa hunʼsalifye ʉNgʉlʉbhɨ ɨnsiku zyonti hu nongwa yeenyu mubhooziwa mubhamwetu, mwa mugɨɨnwe nʉ Mwɨnɨ. Tihunʼsalifya hu nongwa ya‑aje, abhasaluuye afume hu wandilo ʉwa‑apele hwakwe huje mwambɨɨlɨle ʉfyʉli hwi‑idala ɨlya‑asangalusiwe nʉ Mʼpepo ʉMʼfinjile#2:13 Mʼpepo ʉMʼfinjile Bhaazya izwi Mʼpepo ʉMʼfinjile hu Ngalulanyo ɨyɨ Mazwi aMajenu hu malishilo wɨ shitaabu ɨshi. na hwɨtɨshe ɨlyoli. 14ɄNgʉlʉbhɨ ahabhakwiziizye huje mwambɨɨlɨle ʉfyʉli ʉwo, hwi‑idala ɨlyɨ Nongwa ɨNyinza ɨzyo tahalʉmbɨlɨɨye huliimwɨ huje mubhe mu mwamu ʉwa Mwɨnɨ weetu ʉYeesu ʉKilisiti. 15Ɨshi bhooziwa bhamwetu, muhwikhamantanye na‑akhate ɨmanyizyo zya mwahambɨlɨɨye ashilile hu mazwi geetu, awe hu gaala ga tahabhasimbiiye mu kalaata.
16ɄMwɨnɨ weetu ʉYeesu ʉKilisiti nʉ Ngʉlʉbhɨ ʉDaada weetu ʉyo ya‑atigɨɨne, nantele ya‑atipiiye ɨmpyana na hutijinjizye ʉmwoyo ɨnsiku zyonti na hutipeele ʉlusʉʉbhɨlo ʉlwinza, 17abhajinjizye ʉmwoyo na hubhakhamantanye huje mubhe muyanga na‑abhombe gonti ga gali minza.
Currently Selected:
2 ABhatesaloniike 2: SBK
Highlight
Copy
Compare
Share
Want to have your highlights saved across all your devices? Sign up or sign in
© 2022, Wycliffe Bible Translators, Inc. All rights reserved.