Mateus 2
2
Omis jiru di Orienti
1Oca Jesus padidu na Belen,#Kum 35.19; Jos 19.15; Luk 2.4,11,15 na tera di Judeia, na tempu di Rei Erodis, utru omis ku ta studaba strelas e bin di ladu di saida di sol pa Jerusalen, 2e punta: “Nunde ki sta nel kil ku padidu rei di judeus? No oja si strela na saida di sol, no bin pa adoral.”
3Oca Rei Erodis obi ki purgunta, i fika tarpajadu, ku tudu jinti di Jerusalen tambi. 4I manda junta tudu ŝefis di saserdoti ku pursoris di lei, i punta elis: “Nunde ku Kristu na padidu nel?” 5E ruspundil: “Na Belen di Judeia, pabia asin ku anunsiadur skirbi:
6‘Abo Belen#Mik 5.2; Jon 7.42 na tera di Judá,
bu ka na sedu prasa pikininu
na metadi di utru prasas di Judá,
pabia i na bo ki na bin sai nel un ŝef#Kum 49.10; Is 9.6-7
ku na bin gia ña pobu Israel.’ ”
7Na ki ora Erodis coma ki omis jiru na sigridu, i punta elis na kal tempu ke oja ki strela. 8Dipus i manda elis pa Belen, i fala elis: “Bo bai punta diritu nunde ku mininu sta nel; ora ku bo ojal, bo ta bin kontan, pa ami tambi#Dit 26.24-25 N pudi bai adoral.”
9Oca ki omis jiru kaba sukuta rei, e sai pa bai. Ki strela ke ojaba na saida di sol i kumsa bai se dianti, tok i ciga i para riba di kau ku mininu staba nel. 10E oja ki strela, e sinti garandi kontentamentu. 11E yentra na kasa, e oja mininu ku Maria, si mame; e mpina, e adora#Kap 14.33 Jesus. Dipus e pursenta kusas ke leba pa patil: uru,#Is 60.6 nsensu#Sai 30.34-35; Sir 2.1-2 ku mira.#Kum 37.25 12Deus bin avisa elis na suñu pa ka e riba pa Erodis. Asin e bai pa se tera na utru kamiñu.
José ku Maria fusi pa Ejitu
13Dipus de bai, un anju di Siñor#Kap 1.20 bai pa José na suñu, i falal: “Lanta, bu toma mininu ku si mame, bu kuri pa Ejitu. Fika la te ora ku N torna falau, pabia Erodis na bin buska mininu pa mata.”
14José lanta, i toma mininu ku si mame di noti, e bai pa Ejitu. 15E fika la tok Erodis muri, pa pudi fasi kil ku Siñor falaba na boka di si anunsiadur: “N coma ña fiju#Os 11.1 na Ejitu.”
16Oca ku Erodis bin sibi kuma ki omis jiru nganal, i paña raiba. I manda mata tudu mininus ku staba na Belen, ku kilis di roda di Belen, di dus anu pa bas, konformi tempu ki puntaba omis jiru. 17De manera i bin sedu suma ku anunsiadur Jeremias falaba ja:
18“Na Ramá i obidu gritu di cur ku dur#Jer 31.15 garandi.
I Rakel ku na cora pa si fijus,
nin i ka misti pa algin konsolal,
pabia e ka sta ja bibu.”
E riba di Ejitu
19Oca Erodis bin muri, un anju#Kap 1.20 di Siñor bai pa José na suñu, na Ejitu, 20i falal: “Lanta, bu toma mininu ku si mame, bu riba pa tera di Israel, pabia kilis ku na buskaba mininu pa mata e muri ja.”
21José lanta, i toma mininu ku si mame, i riba pa tera di Israel. 22Oca ki obi kuma Arkelau na rena na Judeia na lugar di si pape Erodis, i medi bai pa la. Deus torna avisal mas na suñu; i bai pa tera#Luk 2.39; Jon 7.41,52 di Galileia. 23Oca ki ciga, i bai mora na un prasa ku comadu#Kap 26.71; Jon 1.45; 18.5,7; 19.19; At 2.22; 24.5 Nazaré. De manera i bin sedu suma ku anunsiaduris falaba ja: “I na comadu Nazarenu.”
© 1993-2020, Instituto de Tradução e Alfabetização