Tito 2

Tu̱ꞌun na̱a̱ꞌ váꞌa Ndiosíꞌ ya̱ xínéꞌénꞌ‑ó

1Soo noꞌó, kachiꞌ nú tu̱ꞌun ya̱ íyó sánikua̱ꞌ kúvi tu̱ꞌun na̱a̱ꞌ váꞌa xínéꞌénꞌ‑ó. 2Xinéꞌénꞌ nú rá te̱e ñáꞌnú, ya̱ ntu jíꞌi víꞌí jee ntu jíni ráa,

jín ya̱ ñáꞌnú iniꞌ ráa,

jín ya̱ kuꞌun kájí iniꞌ ráa,

jín ya̱ kuiñɨ na̱a̱ꞌ kutú ráa ya̱ kúneí iniꞌ ráa Cristo,

jín ya̱ kunu̱u̱nꞌ ráa rá ñɨvɨ jín Ndiosíꞌ,

jín ya̱ kuni̱ꞌin ráa kuiñɨ ni̱ꞌin ráa jín Jesús.

3Jee suni sukuán xinéꞌénꞌ nú rá ñaꞌan ñáꞌnú, ya̱ kaka na̱a̱ꞌ ráña, ya̱ kɨtíñú ráña nu̱u̱nꞌ Ndiosíꞌ,

jín ya̱ nkákuíyuꞌú ráña,

jín ya̱ nsú máá tiñu jíꞌi sáꞌá ráña,

jín ya̱ xinéꞌénꞌ ráña ya̱ váꞌa,

4sáva sikújia ráña iniꞌ rá ñaꞌan súchí ka̱ꞌ, ya̱ kunu̱u̱nꞌ ráa rá yɨɨ́ ráa,

jín ya̱ kunu̱u̱nꞌ ráa rá se̱ꞌya ráa,

5jín ya̱ kuꞌun kájí iniꞌ ráa,

jín ya̱ koo ninuꞌun ráa,

jín ya̱ kuneen kuéntáꞌ ráa veꞌi ráa,

jín ya̱ koo ñunkúún iniꞌ ráa,

jín ya̱ kɨꞌɨ ráa chi̱ji naꞌá yɨɨ́ ráa,

sáva nkákuíyuꞌú inka ñɨvɨ jie̱ꞌe̱ꞌ Tu̱ꞌun Ndiosíꞌ.

6Suni sukuán xiníꞌvɨ́ꞌ nú iniꞌ rá te̱e súchí ka̱ꞌ ya̱ kani kájí iniꞌ ráa 7jín nta̱ká tiñu. Jee noꞌó, saꞌá nú tiñu váꞌa sáva kuvi nú ɨɨn ichi váꞌa kunikɨnꞌ ráa. Ni xínéꞌénꞌ nú jee koo na̱a̱ꞌ nú, jín ya̱ koo ñáꞌnú iniꞌ nú, 8jín ya̱ kaꞌanꞌ na̱a̱ꞌ va̱ꞌa nú tu̱ꞌun na̱a̱ꞌ, ya̱ ni ɨɨn ñɨvɨ nkúvi natai̱chi̱ꞌ maa, jee sáva kukanuun ñɨvɨ núníꞌin jín noꞌó, chi nkúvi kaꞌanꞌ niva̱ꞌa ráa kune̱ꞌyá ráa yó.

9Xiníꞌvɨ́ꞌ nú iniꞌ rá musúꞌ #2:9 Esclavo ya̱ nkeꞌen ñɨvɨ ya̱ kɨꞌɨ ráa naꞌá rá i̱toꞌoꞌ ráa, jín ya̱ saꞌá va̱ꞌa ráa nta̱ká tiñu ya̱ sáni táꞌán iniꞌ rá i̱toꞌoꞌ ráa, jín ya̱ nníkó yuꞌú ráa nu̱u̱nꞌ rá i̱toꞌoꞌ ráa, 10jín ya̱ nsákuíꞌná ráa, chisaꞌ kuvi ráa ñɨvɨ na̱a̱ꞌ sáva kuvi kuneí iniꞌ i̱toꞌoꞌ ráa maáráa jín nɨꞌɨ ya̱ sáꞌá ráa, sáva sukuán sikútú viiꞌ ráa tu̱ꞌun xínéꞌénꞌ‑ó jie̱ꞌe̱ꞌ Ndiosíꞌ, ya̱ sáꞌá‑a ya̱ nanitáꞌvíꞌ‑ó.

11Chi ntu̱vi nu̱u̱nꞌ nɨꞌɨ ñɨvɨ ya̱ íyó mániꞌ iniꞌ Ndiosíꞌ néꞌyá re̱ꞌ ñɨvɨ sáá nta̱jí re̱ꞌ Cristo, ya̱ nátavaꞌ re̱ꞌ ñɨvɨ nu̱u̱nꞌ kua̱chi ráa xinánitáꞌvíꞌ re̱ꞌ ráa. 12Jie̱ꞌe̱ꞌ ya̱ íyó mániꞌ iniꞌ re̱ꞌ, jee suꞌva síkújia re̱ꞌ iniꞌ‑ó ya̱ chusává‑ó maáó nu̱u̱nꞌ ichi níváꞌa ya̱ ntu íyó sáni kuíni Ndiosíꞌ, jín nu̱u̱nꞌ ya̱ níyo iniꞌ‑ó ya̱ íyó sáni níyo iniꞌ rá ñɨvɨ ñɨ̱vɨ́ ya̱ ntu chíꞌi ráa maáráa naꞌá Ndiosíꞌ. Jee suꞌva síkújia re̱ꞌ iniꞌ‑ó, ya̱ tiempúꞌ vitan kueꞌnu kájí‑ó,

jín ya̱ kaka na̱a̱ꞌ‑ó nu̱u̱nꞌ Ndiosíꞌ,

jín ya̱ kɨtíñú‑ó nu̱u̱nꞌ ichi na̱a̱ꞌ sáni kuíni Ndiosíꞌ.

13Jee síkújia re̱ꞌ iniꞌ‑ó kueꞌnu‑ó suꞌva ni nétu‑ó ki̱vɨ̱ꞌ ya̱ nikó Jesucristo, ya̱ na̱ ka̱ꞌ netuꞌ ka̱ꞌ kúvi‑ó, ya̱ íyó tu̱neí iniꞌ‑ó. Jee ne̱ tu̱u̱nꞌ nasɨ́kuitɨꞌ tu̱vi re̱ꞌ sáá nikó re̱ꞌ, chi Ndiosíꞌ máá ñáꞌnú nu̱u̱nꞌ nɨꞌɨ ví re̱ꞌ, jee nátavaꞌ re̱ꞌ yó nu̱u̱nꞌ kua̱chi‑ó xinánitáꞌvíꞌ re̱ꞌ yó. 14Chi njia̱ꞌa re̱ꞌ maáréꞌ ya̱ kuviꞌ re̱ꞌ jie̱ꞌe̱ꞌ‑ó, sáva chunáán nkáꞌnú re̱ꞌ maáréꞌ nu̱u̱nꞌ Ndiosíꞌ jie̱ꞌe̱ꞌ‑ó, sáva nakani núne re̱ꞌ yó naꞌá nta̱ká nu̱u̱nꞌ ya̱ niva̱ꞌa. Jee nna̱saꞌá noo nɨꞌɨ kuitɨꞌ re̱ꞌ kua̱chi níso ánímaꞌ‑ó, sáva kuvi‑ó ñɨvɨ maáréꞌ, sáva kuꞌun káñá iniꞌ‑ó saꞌá‑ó ya̱ váꞌa.

15Rá tu̱ꞌun yaꞌá vá xinéꞌénꞌ nú. Kaꞌanꞌ ni̱ꞌin nú jín nɨꞌɨ tiñu níso nú, sáva xiníꞌvɨ́ꞌ nú iniꞌ rá ñɨvɨ, jee nuxeenꞌ nú nu̱u̱nꞌ ñɨvɨ ya̱ sáꞌá niva̱ꞌa. Koto jiáꞌnu niva̱ꞌa nú, sáva ni ɨɨn ñɨvɨ nku̱níichiꞌ ráa noꞌó.

Currently Selected:

Tito 2: meh

Highlight

Copy

Compare