Tito 1

Pablo ntee nu̱u̱nꞌ Tito

1Maáníꞌ, Pablo, ya̱ kúvi ni̱ꞌ musúꞌ ya̱ jiátíñú Ndiosíꞌ. Jee suni níso ni̱ꞌ tiñu apóstol, ya̱ nchu̱ichí Jesucristo nuꞌuꞌ, sáva ku̱ꞌva ni̱ꞌ tu̱ꞌun re̱ꞌ nu̱u̱nꞌ rá ñɨvɨ, sáva rá ñɨvɨ ya̱ nka̱ji Ndiosíꞌ ráa kuneí iniꞌ ráa maa, jee sáva kuniꞌ noo ráa tu̱ꞌun na̱a̱ꞌ, jee sáva kunikɨnꞌ ráa ichi na̱a̱ꞌ nu̱u̱nꞌ Ndiosíꞌ sáni kuíni re̱ꞌ, 2chi íyó tu̱neí iniꞌ‑ó ya̱ kutekuꞌ‑ó nɨ́ɨ́nkání jín re̱ꞌ, chi nchi̱sóyuꞌú re̱ꞌ maa ne̱ ntiáꞌan ka̱ꞌ kijiéꞌé kɨ̱ko̱o ñɨ̱vɨ́. Jee ntu kátúꞌún re̱ꞌ. 3Jee vitan re nkenta tiempúꞌ ñani re̱ꞌ, ya̱ stúvi re̱ꞌ tu̱ꞌun re̱ꞌ, jín ya̱ káchítu̱ꞌún ni̱ꞌ maa. Chi nte̱tíñú re̱ꞌ nuꞌuꞌ saꞌá ni̱ꞌ maa, sáni nta̱túníꞌ re̱ꞌ. Jee suvire̱ꞌ ví ya̱ sáꞌá re̱ꞌ ya̱ nanitáꞌvíꞌ‑ó.

4Tée ni̱ꞌ tutuꞌ yaꞌá nu̱u̱nꞌ nú, Tito. Suvinú ví nijia kuéntáꞌ se̱ꞌya ni̱ꞌ, ya̱ nuún kúneí iniꞌ‑ó Cristo.

Tátáꞌ‑ó ví Ndiosíꞌ jee Cristo Jesús ya̱ nátavaꞌ re̱ꞌ yó nu̱u̱nꞌ kua̱chi‑ó síkáku re̱ꞌ yó. Na̱ ka̱ꞌ koo ma̱ni̱ꞌ iniꞌ ráa ka̱ꞌ kune̱ꞌyá ráa noꞌó, jín ya̱ kuneeꞌ va̱ꞌa nú saꞌá ráa.

Tiñu sáꞌá Tito nu̱u̱nꞌ ñuꞌun káá sɨ́ɨ́n ma̱ꞌñú nte̱ñuꞌunꞌ naní Creta

5Nxi̱nóo ni̱ꞌ noꞌó ñuunꞌ Creta, sáva nasaꞌá nú rá tiñu nkumaniꞌ saꞌá‑ó, jín sáva kani nú rá te̱e kúñáꞌnú kosoꞌ ráa nu̱u̱nꞌ rá ñɨvɨ kúneí iniꞌ ráa Cristo, ya̱ nééꞌ ráa ta ñuunꞌ tɨ́ɨn Creta, sáni nte̱tíñú ni̱ꞌ noꞌó. 6Rá te̱e vá, íyó kuvi ráa te̱e ya̱ ntu̱náꞌ íyó chikua̱chi ñɨvɨ ráa. Íyó kuvi re̱ꞌ yɨɨ́ métúꞌún ñaꞌan ni ne̱ kuviꞌ ña. Jee rá se̱ꞌya ráa íyó ínúꞌ iniꞌ rává tu̱ꞌun Cristo, jee nkúvi chikua̱chi ñɨvɨ rá se̱ꞌya ráa, chi ntu jiáꞌa sáꞌá rává, chi ni ntu kújiááꞌ iniꞌ rává. 7Chi te̱e kúñáꞌnú ya̱ kuatíñú Ndiosíꞌ kumí re̱ꞌ rá ñɨvɨ kúneí iniꞌ ráa Cristo, saáva maáréꞌ íyó kuvi re̱ꞌ ɨɨn te̱e:

ya̱ ntu kúvi chikua̱chi ñɨvɨ,

jín ya̱ ntu jiáni téyɨ́ɨ́ iniꞌ,

jín ya̱ ntu xe̱e̱nꞌ iniꞌ,

jín ya̱ ntu jíꞌi víꞌí nixiꞌ jee ntu jíni,

jín ya̱ ntu núkú tuntíxín,

jín ya̱ ntu uꞌvi iniꞌ xu̱ꞌún, ya̱ ntu níꞌinꞌ ninuꞌun vá.

8Soo íyó kuvi re̱ꞌ ɨɨn te̱e ya̱ íyó maniꞌ iniꞌ, ya̱ ku̱ꞌva re̱ꞌ ntíꞌ veꞌi kino̱o ñɨvɨ jíka ichi,

jín ya̱ ñúnúunꞌ ya̱ váꞌa,

jín ya̱ jiáni kájí iniꞌ,

jín ya̱ jíka na̱a̱ꞌ,

jín ya̱ sáꞌá sɨ́ɨ́n re̱ꞌ maáréꞌ ya̱ nkɨ́ꞌɨ re̱ꞌ nu̱u̱nꞌ ya̱ níváꞌa sáni kuíni Ndiosíꞌ,

jín ya̱ nákeꞌen re̱ꞌ maáréꞌ.

9Jee íyó kuiñɨ ni̱ꞌin re̱ꞌ jín tu̱ꞌun na̱a̱ꞌ ya̱ kúvi kúneí iniꞌ‑ó sáni nxi̱néꞌénꞌ‑ó, sáva kuvi nasáneí re̱ꞌ iniꞌ rá ñɨvɨ jín tu̱ꞌun na̱a̱ꞌ váꞌa ya̱ xinéꞌénꞌ re̱ꞌ. Jee suni sáva kuvi nachuꞌun re̱ꞌ ichi na̱a̱ꞌ ñɨvɨ ya̱ núníꞌin ráa káꞌánꞌ ráa si̱kɨ̱ꞌ tu̱ꞌun váꞌa Ndiosíꞌ.

10Chi íyó kue̱ꞌe̱ꞌ rá ñɨvɨ kújiááꞌ iniꞌ, jín ya̱ káꞌánꞌ ka̱ꞌá, jín ya̱ xínáꞌví. Jee suꞌva víꞌí ka̱ꞌ sáꞌá rá ñɨvɨ ya̱ xínéꞌénꞌ ráa ya̱ íyó kɨꞌɨ‑ó ñujiínꞌ ñɨvɨ Israel jín ya̱ íyó saꞌá‑ó costumbre rá ñɨvɨ ñuunꞌ Israel, ya̱ káchíꞌ‑ó circuncidar. #1:10 Circuncisión kúvi ɨɨn ñujiínꞌ ya̱ sáꞌá ñɨvɨ Israel ya̱ keꞌneꞌ ti̱yu̱ꞌ ráa ntíꞌ yuꞌú ñɨɨn násɨ́ꞌ xi̱ni̱ꞌ nu̱u̱nꞌ ííꞌ yɨkɨkúñu te̱e jee sííyo ráa maa. Circuncisión kúvi seña ya̱ níso ráa nu̱u̱nꞌ yɨkɨkúñu ráa ya̱ stúvi‑i ya̱ ɨɨn te̱e kúvi ichiyúkúnꞌ váji nu̱u̱nꞌ Israel jín ya̱ kúvi ráa ñɨvɨ Ndiosíꞌ, jín ya̱ nsa̱ꞌá Ndiosíꞌ ɨɨn tratúꞌ jín ráa. Jee njia̱ꞌa Ndiosíꞌ ley nu̱u̱nꞌ Moisés tiempúꞌ yanaꞌán víꞌí. Jee ley vá káchíꞌ ya̱ rá te̱e ya̱ kúvi ichiyúkúnꞌ váji ráa ne̱ nu̱u̱nꞌ Israel íyó saꞌá circuncidar ráa rá se̱ꞌya yɨ́ɨ́ ráa. Jee sáꞌá rá te̱e Israel suꞌva jín rá se̱ꞌya yɨ́ɨ́ ráa ya̱ unáꞌ ki̱vɨ̱ꞌ ya̱ nkaku‑u. 11Íyó kasɨꞌ‑ó yuꞌú rá ñɨvɨ ya̱ sáꞌá suꞌva, chi stívɨ́ ráa nɨꞌɨ ñɨvɨ sava rá veꞌi. Chi xínéꞌénꞌ ráa tu̱ꞌun ya̱ ntu íyó xinéꞌénꞌ ráa, sáva ni̱ꞌi̱nꞌ ráa xu̱ꞌún, ya̱ nsáꞌ ninuꞌun níꞌínꞌ ráa maa. 12Suꞌva nkachiꞌ ɨɨn te̱e tu̱ꞌva #1:12 Profeta: ya̱ nkachiꞌ rá ñɨvɨ ñuunꞌ Creta ya̱ nkaꞌanꞌ re̱ꞌ tu̱ꞌun ndiosíꞌ ntu tékúꞌ ya̱ néñu̱ꞌun ráa. ya̱ táꞌán ñuunꞌ Creta kúvi re̱ꞌ, jee nkachiꞌ re̱ꞌ: “Rá ñɨvɨ ñuunꞌ Creta sukuáni kúvi ñɨvɨ túꞌún. Jee íyó ráa kuéntáꞌ kitɨ yúkú. Jee ne̱ꞌí ráa jee kúxí ráa.” 13Jee ya̱ naáꞌ ví ya̱ nkachiꞌ re̱ꞌ. Saáva kuxeenꞌ ni̱ꞌin nú nu̱u̱nꞌ rá ñɨvɨ xínéꞌénꞌ tu̱ꞌun túꞌún, sáva nakuneí na̱a̱ꞌ va̱ꞌa iniꞌ ráa ya̱ naáꞌ, 14jee sáva nsáꞌá ráa kuéntáꞌ rá kuentúꞌ yanaꞌán ya̱ sátúꞌún rá ñɨvɨ Israel, jee sáva nsáꞌá ráa kuéntáꞌ rá tu̱ꞌun ya̱ tátúníꞌ kua̱chi rá ñɨvɨ ni ya̱ nákuíñɨꞌ yátá ráa nu̱u̱nꞌ tu̱ꞌun na̱a̱ꞌ. 15Rá ñɨvɨ íyó ninuꞌun jiáni ninuꞌun iniꞌ ráa jie̱ꞌe̱ꞌ nta̱ká nantíñú. Soo rá ñɨvɨ máñáꞌ ya̱ ntu ínúꞌ iniꞌ ráa tu̱ꞌun nááꞌ, jee ntu̱náꞌ jiáni ninuꞌun iniꞌ ráa jie̱ꞌe̱ꞌ ni ɨɨn nantíñú, chi ñúꞌún máñáꞌ antúníꞌ ráa jee ntu jíníꞌ ráa ya̱ níso kua̱chi si̱kɨ̱ꞌ ráa. #1:15 Áxí sa̱naanꞌ káchíꞌ versículo 15 suꞌva: rá ñɨvɨ íyó ninuꞌun, jíníꞌ ráa ya̱ nta̱ká nantíñú íyó ninuꞌun. Soo rá ñɨvɨ máñáꞌ ya̱ ntu ínúꞌ iniꞌ tu̱ꞌun na̱a̱ꞌ, jee jiáni iniꞌ ráa, ya̱ ni ɨɨn nantíñú ntu íyó ninuꞌun, chi ñúꞌún máñáꞌ antúníꞌ ráa, jee ntu jíníꞌ ráa ya̱ níso kua̱chi si̱kɨ̱ꞌ ráa. 16Káchíꞌ ráa ya̱ ma̱ni̱ꞌ ráa jín Ndiosíꞌ, soo jín tiñu sáꞌá ráa, túvi ya̱ jíníichiꞌ ráa re̱ꞌ.

Jee néꞌí nasɨ́kuitɨꞌ sáꞌá ráa,

jee jiáá iniꞌ ráa,

jee ni ntu kúvi saꞌá ráa ni ɨɨn na̱ tiñu váꞌa.

Currently Selected:

Tito 1: meh

Highlight

Copy

Compare