Jonás 2
2
1Saájee nkaꞌanꞌ Jonás jín I̱toꞌoꞌ re̱ꞌ Ndiosíꞌ re̱ꞌ ni ñúꞌún re̱ꞌ ne̱ iniꞌ tia̱ká. 2Jee nkachiꞌ re̱ꞌ:
Nkakua̱chi ni̱ꞌ nu̱u̱nꞌ I̱toꞌoꞌ ni̱ꞌ sáá ni̱yo tu̱ꞌun núkuíꞌyá iniꞌ ni̱ꞌ,
jee nna̱xiníkó re̱ꞌ nu̱u̱nꞌ ni̱ꞌ.
Sáá sa̱néꞌ íyó kuviꞌ ni̱ꞌ jee ni̱ka̱ꞌ táꞌvíꞌ ni̱ꞌ nu̱u̱nꞌ nú, I̱toꞌoꞌ ni̱ꞌ,
jee ntɨɨn kuéntáꞌ nú maa.
3Chi nchuꞌun nú nuꞌuꞌ ne̱ nu̱u̱nꞌ kúnú sava nteñúꞌún.
Jee nchuꞌun nú nuꞌuꞌ nu̱u̱nꞌ jíkótíyu ni̱ꞌin nute,
jee nu̱u̱nꞌ jísóꞌ nute nna̱kunasɨꞌ‑ɨ ya̱ta̱ꞌ ni̱ꞌ.
4Saájee nkachiꞌ ni̱ꞌ: “Vitan jee nsa̱ꞌá sɨ́ɨ́n nú nuꞌuꞌ nu̱u̱nꞌ ya̱ ma̱ni̱ꞌ iniꞌ nú néꞌyá nú nuꞌuꞌ.
Soo jíníꞌ ni̱ꞌ ya̱ kune̱ꞌyá tuku ni̱ꞌ veñu̱ꞌun káꞌnú ííꞌ nú.”
5Sáá nñuma̱ꞌñú nute nuꞌuꞌ,
jee nna̱kasɨꞌ nteñúꞌún yátáꞌ ni̱ꞌ,
jee rá yokúꞌúꞌ yuku íyó chi̱ji nteñúꞌún nsu̱kún ráa xi̱ni̱ꞌ ni̱ꞌ.
6Jee nke̱i ni̱ꞌ ne̱ jie̱ꞌe̱ꞌ nu̱u̱nꞌ kúnú,
nu̱u̱nꞌ ntu íyó nene ni̱ꞌ,
jee nkaꞌvi iniꞌ ni̱ꞌ ya̱ ni nsáꞌ ka̱ku ni̱ꞌ.
Soo noꞌó, ya̱ kúvi nú I̱toꞌoꞌ ni̱ꞌ jín Ndiosíꞌ ni̱ꞌ,
nsi̱káku nú nuꞌuꞌ sáva ntu kuviꞌ ni̱ꞌ.
7Chi sa̱néꞌ íyó xinóo ta̱chi̱ꞌ káꞌánꞌ ni̱ꞌ maáníꞌ,
jee nna̱ku̱ꞌun iniꞌ ni̱ꞌ noꞌó, I̱toꞌoꞌ ni̱ꞌ.
Jee ne̱ ánímaꞌ ni̱ꞌ ni̱ka̱nꞌ táꞌvíꞌ ni̱ꞌ,
jee nteso̱ꞌo nú nuꞌuꞌ ne̱ veñu̱ꞌun káꞌnú ííꞌ nú.
8Soo rá ñɨvɨ ya̱ níkɨ́nꞌ ráa néñu̱ꞌun ráa rá ntu kúvi Ndiosíꞌ tékúꞌ,
jee suni níkɨ́nꞌ ráa rává ya̱ ni ntu̱náꞌ kúvi saꞌá rává,
jee xínóo rá ñɨvɨ vá ya̱ váꞌa máníꞌ iniꞌ Ndiosíꞌ tékúꞌ néꞌyá re̱ꞌ ráa.
9Soo nuꞌuꞌ, chi kata ni̱ꞌ,
nakuetúꞌún ni̱ꞌ noꞌó jín ta̱chi̱ꞌ yuꞌú ni̱ꞌ,
jee kaꞌniꞌ ni̱ꞌ sa̱na̱ꞌ nasokoꞌ ni̱ꞌ maa nu̱u̱nꞌ nú.
Jee sikúnkuvi ni̱ꞌ ya̱ nchi̱sóyuꞌú ni̱ꞌ nu̱u̱nꞌ nú.
Chi métúꞌún maánú ví I̱toꞌoꞌ ni̱ꞌ,
ya̱ sáꞌá nú ya̱ nánitáꞌvíꞌ,
nkachiꞌ Jonás.
10Saájee nta̱túníꞌ I̱toꞌoꞌ‑ó nu̱u̱nꞌ tia̱ká káꞌnú vá, jee nna̱nujien ti̱ꞌ Jonás. Nna̱tavaꞌ ti̱ꞌ maa iniꞌ ti̱ꞌ nu̱u̱nꞌ ñu̱ꞌún íchí.
Currently Selected:
Jonás 2: meh
Highlight
Copy
Compare
Share
Want to have your highlights saved across all your devices? Sign up or sign in
© 2022, Wycliffe Bible Translators, Inc. All rights reserved.
