Jonás 1
1
1Nkachiꞌ I̱toꞌoꞌ‑ó Ndiosíꞌ tu̱ꞌun re̱ꞌ nu̱u̱nꞌ Jonás. Jonás kúvi se̱ꞌya ɨɨn te̱e naní Amitai. Jee nkachiꞌ I̱toꞌoꞌ‑ó nu̱u̱nꞌ Jonás:
2―¡Kechí ntañúꞌún! Kuáꞌán chi kɨ̱ꞌɨ̱nꞌ nú ñuunꞌ káꞌnú naní Nínive jee, stekútu̱ꞌún nú nu̱u̱nꞌ rá ñɨvɨ ñuunꞌ vá ya̱ kúkáꞌnú iniꞌ ni̱ꞌ ya̱ ya njia̱ꞌa víꞌí nsa̱ꞌá ráa tiñu niva̱ꞌa ―nkachiꞌ I̱toꞌoꞌ‑ó.
3Sosaꞌ nkene re̱ꞌ kua̱ꞌa̱nꞌ re̱ꞌ inka ichi sáva nsiíyo re̱ꞌ nu̱u̱nꞌ I̱toꞌoꞌ‑ó. Kua̱ꞌa̱nꞌ re̱ꞌ nu̱u̱nꞌ ñuunꞌ Jope, ɨɨn ñuunꞌ káá yatin yuꞌú nteñúꞌún. Jee yukuán jiákui̱ñɨ̱ꞌ rá barkúꞌ jee, nna̱niꞌinꞌ re̱ꞌ ɨɨn barkúꞌ ya̱ sa̱néꞌ íyó kene‑e kɨ̱ꞌɨ̱nꞌ‑ɨ ñuunꞌ Tarsis, ɨɨn ñuunꞌ íká víꞌí.
Jee kuísá nchu̱náán re̱ꞌ jee nki̱vɨ re̱ꞌ iniꞌ barkúꞌ. Jee nkene barkúꞌ kua̱ꞌa̱nꞌ‑a nu̱u̱nꞌ nteñúꞌún ichi ñuunꞌ Tarsis.
4Jee kuíre nsa̱ꞌá I̱toꞌoꞌ‑ó Ndiosíꞌ ya̱ kɨꞌɨ ta̱chi̱ꞌ xéénꞌ nu̱u̱nꞌ nteñúꞌún jee ña̱kɨ̱ꞌɨ ta̱chi̱ꞌ sa̱vi xéénꞌ níꞌin víꞌí vá. Jee jísóꞌ nteñúꞌún vá, ya̱ va̱ne̱ꞌ kuéntáꞌ retánꞌ kuíni‑i ne̱ ka̱ꞌnu̱ꞌ‑u barkúꞌ vá.
5Jee nyu̱ꞌví nasɨ́kuitɨꞌ rá te̱e síkáka barkúꞌ vá, jee ta ɨɨn ta ɨɨn ráa kánajíín ráa jee jíkánꞌ táꞌvíꞌ ráa nu̱u̱nꞌ ta nu̱u̱nꞌ ya̱ kúvi ndiosíꞌ ráa sáva chineí‑i ráa. Jee ne̱kua̱ꞌ nkúvi ka̱ꞌ jee ntavaꞌ ráa rá nantíñú ñúꞌún iniꞌ barkúꞌ vá nsi̱kéne ráa maa nu̱u̱nꞌ nteñúꞌún sáva nuñamaꞌ barkúꞌ vá.
Soo Jonás ya ña̱nkuun re̱ꞌ ne̱ chi̱ji iniꞌ barkúꞌ nu̱u̱nꞌ chúváꞌa ráa rá nantíñú níso barkúꞌ jee ña̱kava re̱ꞌ nkixiꞌ naanꞌ re̱ꞌ.
6Jee te̱e tátúníꞌ nu̱u̱nꞌ rá te̱e síkáka barkúꞌ vá, nna̱niꞌinꞌ re̱ꞌ Jonás nu̱u̱nꞌ káá re̱ꞌ kíxíꞌ naanꞌ re̱ꞌ jee nkachiꞌ‑i nu̱u̱nꞌ re̱ꞌ:
―¿Na̱ja kúvi kíxíꞌ naanꞌ nú? ¡Nako̱o!, jee ka̱ka̱nꞌ táꞌvíꞌ nú nu̱u̱nꞌ Ndiosíꞌ nú. Sa̱naanꞌ jee kunáꞌví iniꞌ re̱ꞌ kune̱ꞌyá re̱ꞌ yó, sáva ntu kuviꞌ‑ó ―nkachiꞌ‑i.
7Jee kuíre rá te̱e síkáka barkúꞌ vá nna̱túꞌún ɨɨn inka ráa, jee nkachiꞌ ráa:
―Sikɨ́‑ó suertéꞌ jee kuniꞌ‑ó né ɨɨn‑ó vá íyó si̱kɨ̱ꞌ jie̱ꞌe̱ꞌ ya̱ nóꞌo‑ó yaꞌá. Jee nsa̱ꞌá ráa sukuán, jee nku̱káꞌnú iniꞌ ráa ya̱ si̱kɨ̱ꞌ Jonás ví jie̱ꞌe̱ꞌ ya̱ nóꞌo ráa.
8Saájee nkachiꞌ ráa nu̱u̱nꞌ‑u:
―Kachiꞌ xá nu̱u̱nꞌ ráníꞌ na̱ jie̱ꞌe̱ꞌ chi va̱ji tu̱nóꞌó yaꞌá si̱kɨ̱ꞌ ráníꞌ. ¿Na̱ tiñu sáꞌá nú ya̱ va̱ji nú ne̱ yaꞌá? ¿Né nú va̱ji nú? ¿Né ɨɨn ñuunꞌ kúvi nú? ¿Né ɨɨn tataꞌ kúvi nú? ―ni̱ka̱tu̱ꞌún ráa maa.
9Nna̱xiníkó Jonás nu̱u̱nꞌ ráa:
―Te̱e tataꞌ hebreo kúvi ni̱ꞌ, jee ñúyúꞌví iniꞌ ni̱ꞌ I̱toꞌoꞌ ya̱ kúvi re̱ꞌ Ndiosíꞌ ya̱ íyó antivɨ́ súkún ya̱ nsa̱ꞌá re̱ꞌ nteñúꞌún jín ñuꞌunꞌ iniꞌ ñɨ̱vɨ́ ―nkachiꞌ‑i.
10Jee nyu̱ꞌví nasɨ́kuitɨꞌ ráa ka̱ꞌ, jee ni̱ka̱tu̱ꞌún ráa:
―¿Na̱ kuvi chi, nsa̱ꞌá nú sukuán? ―nkachiꞌ ráa, chi ya̱ jíníꞌ ráa ya̱ nkuini Jonás siíyo re̱ꞌ nu̱u̱nꞌ I̱toꞌoꞌ‑ó, chi ya̱ nna̱kani re̱ꞌ maa nu̱u̱nꞌ ráa.
11Sáá nteso̱ꞌo rá te̱e vá ya̱ nkachiꞌ re̱ꞌ jee niniꞌ ráa ya̱ saꞌ xíníꞌin víꞌí ka̱ꞌ ta̱chi̱ꞌ sa̱vi xéénꞌ jee ni̱ka̱tu̱ꞌún ráa re̱ꞌ:
―¿Ná saꞌá ráníꞌ jín nú sáva kɨ̱kui̱ñɨ̱ꞌ ya̱ jísóꞌ nteñúꞌún?
12Jee nna̱xiníkó re̱ꞌ nu̱u̱nꞌ ráa:
―Tɨɨn rán nuꞌuꞌ jee sikéne rán nuꞌuꞌ nu̱u̱nꞌ nuteñúꞌún sáva nu̱ma̱ꞌ ta̱chi̱ꞌ sa̱vi jee kɨ̱kui̱ñɨ̱ꞌ ya̱ jísóꞌ nuteñúꞌún ―nkachiꞌ Jonás nu̱u̱nꞌ ráa, ―chi jíníꞌ ni̱ꞌ ya̱ suvini̱ꞌ íyó si̱kɨ̱ꞌ saáva nóꞌo rán ta̱chi̱ꞌ sa̱vi xéénꞌ yaꞌá.
13Soo ntu nchu̱neí iniꞌ rá te̱e vá ya̱ nkachiꞌ Jonás chisaꞌ nnu̱nasɨ́ víꞌí ráa síkáka ráa barkúꞌ sáva nanikó ráa yuꞌú nteñúꞌún jín barkúꞌ. Soo ntu nku̱neí ráa.
Chisaꞌ xíníꞌin víꞌí ka̱ꞌ nteñúꞌún jísóꞌ‑o ka̱ꞌ nu̱u̱nꞌ ráa. 14Saájee ni̱ka̱nꞌ táꞌvíꞌ víꞌí ráa nu̱u̱nꞌ I̱toꞌoꞌ, jee nkachiꞌ ráa:
―I̱toꞌoꞌ, jíkánꞌ táꞌvíꞌ ráníꞌ nu̱u̱nꞌ nú, ya̱ koto jiáyuꞌú nú ya̱ kuviꞌ ráníꞌ, jie̱ꞌe̱ꞌ ya̱ saꞌá ráníꞌ jín te̱e yaꞌá. Jee retú ntu kua̱chi si̱kɨ̱ꞌ re̱ꞌ, jee koto síkúniso kua̱chi nú si̱kɨ̱ꞌ ránuꞌuꞌ retú kuviꞌ re̱ꞌ, chi maánú ya̱ kúvi nú I̱toꞌoꞌ re̱ꞌ, jee nsa̱ꞌá nú sáni nkuini iniꞌ nú ―nkachiꞌ ráa.
15Jee ntɨɨn ráa Jonás jee nsi̱kéne ráa maa nu̱u̱nꞌ nteñúꞌún, jee ña̱kui̱ñɨ̱ꞌ ya̱ jísóꞌ nu̱u̱nꞌ síkɨ́ nteñúꞌún vá.
16Sáá niniꞌ rá te̱e síkáka barkúꞌ vá, ya̱ nkuvi sukuán, jee ne̱ ñúyúꞌví iniꞌ ráa nu̱u̱nꞌ Ndiosíꞌ ya̱ kúvi re̱ꞌ I̱toꞌoꞌ jee chíñúꞌún ráa re̱ꞌ. Jee ñaꞌniꞌ ráa sa̱na̱ꞌ jee nna̱sokoꞌ ráa rátíꞌ nu̱u̱nꞌ re̱ꞌ jee nchi̱sóyuꞌú ráa ya̱ saꞌá ráa nu̱u̱nꞌ re̱ꞌ.
17Soo I̱toꞌoꞌ‑ó chi ya nsa̱ꞌá túꞌva re̱ꞌ ɨɨn tia̱ká maa káꞌnú sáva kokó ti̱ꞌ Jonás. Jee u̱ni̱ꞌ ki̱vɨ̱ꞌ jín u̱ni̱ꞌ yakuááꞌ nñu̱ꞌun Jonás iniꞌ ti̱ꞌ.
Currently Selected:
Jonás 1: meh
Highlight
Copy
Compare
Share
Want to have your highlights saved across all your devices? Sign up or sign in
© 2022, Wycliffe Bible Translators, Inc. All rights reserved.
