Efesios 4

Ɨɨn ni kúvi rá ñɨvɨ kúneí iniꞌ ráa Cristo nsa̱ꞌá Ta̱chi̱ꞌ Ííꞌ Ndiosíꞌ

1Saájee nuꞌuꞌ Pablo, ya̱ yɨ́ꞌɨ́ ni̱ꞌ veka̱a jie̱ꞌe̱ꞌ sátíñú ni̱ꞌ nu̱u̱nꞌ I̱toꞌoꞌ‑ó, náxiníꞌvɨ́ꞌ ni̱ꞌ iniꞌ rán ya̱ kueꞌnu na̱a̱ꞌ rán ichi Ndiosíꞌ, sánikua̱ꞌ íyó kaka rán ya̱ kúvi rán ñɨvɨ ya̱ nkana Ndiosíꞌ kɨtíñú rán nu̱u̱nꞌ re̱ꞌ. 2Jín ya̱ máá tu̱ꞌun kuꞌun láꞌví iniꞌ rán, jín ya̱ kuꞌun másúꞌ iniꞌ rán, jín ya̱ káꞌnú koo iniꞌ rán keꞌneꞌ iniꞌ rán nu̱u̱nꞌ ɨɨn inka táꞌán rán jee sukuán íyó kunu̱u̱nꞌ rán ɨɨn inka rán. 3Jee kuniꞌvɨꞌ iniꞌ rán ya̱ nuún koo iniꞌ rán, sáni sáꞌá Ta̱chi̱ꞌ Ííꞌ Ndiosíꞌ jín rán, jie̱ꞌe̱ꞌ ya̱ kuneeꞌ ñunkúún va̱ꞌa rán jín ɨɨn inka rán ví ya̱ nasánuún‑u iniꞌ yó. 4Chi ɨɨn ni kuvi‑ó nu̱u̱nꞌ Ndiosíꞌ, kuéntáꞌ ɨɨn yɨkɨkúñu, jee ɨɨn ni Ta̱chi̱ꞌ Ííꞌ re̱ꞌ íyó jín‑ó, sánikua̱ꞌ suni nkana Ndiosíꞌ yó ya̱ ɨɨn nuún ni íyó tu̱neí iniꞌ‑ó ya̱ ni̱ꞌi̱nꞌ‑ó kuneeꞌ‑ó jín Cristo, chi nkana re̱ꞌ yó sáva ni̱ꞌi̱nꞌ‑ó maa. 5Chi métúꞌún ni I̱toꞌoꞌ‑ó íyó, jee ɨɨn nuún kúneí iniꞌ ntáká‑ó métúꞌún Tu̱ꞌun Ndiosíꞌ ni, jee ɨɨn nuún jiánuté nta̱ká‑ó ya̱ stúvi ya̱ yɨ́ꞌɨ́‑ó nu̱u̱nꞌ métúꞌún Ndiosíꞌ ni. 6Jee métúꞌún ni Ndiosíꞌ íyó, ya̱ kúvi Tátáꞌ nu̱u̱nꞌ ntáká‑ó, ya̱ maáréꞌ vá yósóꞌ nu̱u̱nꞌ kua̱íyó kuitɨꞌ‑ó, jee sáꞌá re̱ꞌ tiñu ya̱ kúvi ntáká‑ó, jee yɨ́ꞌɨ́ re̱ꞌ iniꞌ ntáká‑ó.

7Soo nu̱u̱nꞌ ta ɨɨn ɨɨn‑ó sɨ́ɨ́n sɨ́ɨ́n nsi̱kútaꞌviꞌ Ndiosíꞌ tiñu saꞌá‑ó, sánikua̱ꞌ tiñu íyó saꞌá‑ó nu̱u̱nꞌ re̱ꞌ, sáni ya̱ ñúkúꞌvá tiñu ya̱ nsi̱kútaꞌviꞌ Cristo nu̱u̱nꞌ‑ó jee chíneí re̱ꞌ yó saꞌá‑ó maa. 8Chi jie̱ꞌe̱ꞌ yukuán kúvi ya̱ káchíꞌ nu̱u̱nꞌ Tutuꞌ Ííꞌ níso Tu̱ꞌun Ndiosíꞌ:

Nnaa re̱ꞌ kua̱ꞌa̱nꞌ re̱ꞌ súkún,

jee kua̱ꞌa̱nꞌ re̱ꞌ jín rá ñɨvɨ ya̱ nna̱tɨɨn re̱ꞌ ráa ya̱ nna̱kɨ̱ꞌɨ ráa xi̱ntíín re̱ꞌ,

jee njia̱ꞌa re̱ꞌ ta̱ꞌvi̱ꞌ nu̱u̱nꞌ rá ñɨvɨ.

9Jee jie̱ꞌe̱ꞌ káchíꞌ nu̱u̱nꞌ Tutuꞌ Ííꞌ vá, ¿na̱ jie̱ꞌe̱ꞌ chi káchíꞌ ya̱ “nnaa re̱ꞌ” ne̱ súkún? Yukuán kuíni kachiꞌ ya̱ suni xíꞌna ka̱ꞌ ne̱ súkún nkiji nkuun re̱ꞌ ne̱ nu̱u̱nꞌ kúnú nu̱u̱nꞌ ñɨ̱vɨ́ yaꞌá. 10Jee maáréꞌ ya̱ nkiji nkuun re̱ꞌ nu̱u̱nꞌ ñɨ̱vɨ́ yaꞌá, jee suni maáréꞌ vá nnaa ne̱ nu̱u̱nꞌ súkún ka̱ꞌ ne̱ antivɨ́ nu̱u̱nꞌ kúñáꞌnú re̱ꞌ, jee nɨ́ɨ́nkáꞌnú íyó chítú re̱ꞌ tátúníꞌ re̱ꞌ kua̱íyó.

11Jee maáréꞌ njia̱ꞌa re̱ꞌ nu̱u̱nꞌ sava te̱e tiñu kúvi apóstol ya̱ nchu̱ichí re̱ꞌ ráa nstúvi ráa tu̱ꞌun jie̱ꞌe̱ꞌ Jesús, jee nu̱u̱nꞌ sava rá ka̱ꞌ njia̱ꞌa re̱ꞌ tiñu nákani ráa tu̱ꞌun kéne yuꞌú Ndiosíꞌ, jee nu̱u̱nꞌ sava rá ka̱ꞌ njia̱ꞌa re̱ꞌ nu̱u̱nꞌ ráa stékútu̱ꞌún ráa tu̱ꞌun váꞌa jie̱ꞌe̱ꞌ re̱ꞌ#4:11 Rá evangelista ya̱ nkiji re̱ꞌ sáva natavaꞌ re̱ꞌ ñɨvɨ nu̱u̱nꞌ kua̱chi ráa jee kána ráa ñɨvɨ ki̱vɨ naꞌá re̱ꞌ, jee nu̱u̱nꞌ sáva rá ka̱ꞌ njia̱ꞌa re̱ꞌ nu̱u̱nꞌ ráa tiñu #4:11 Rá pastor jín mestrúꞌ kuvi ya̱ néen kuéntáꞌ ráa rá ñɨvɨ kúneí iniꞌ ráa re̱ꞌ jín ya̱ xínéꞌénꞌ ráa tu̱ꞌun re̱ꞌ. 12Njia̱ꞌa re̱ꞌ rá tiñu vá nu̱u̱nꞌ ráa sáva sikújia ráa iniꞌ rá ñɨvɨ ya̱ nsa̱ꞌá sɨ́ɨ́n Ndiosíꞌ kúvi ñɨvɨ re̱ꞌ. Síkújia ráa iniꞌ maáó ya̱ kúvi‑ó rá ñɨvɨ re̱ꞌ sáva kɨtíñú‑ó saꞌá‑ó tiñu re̱ꞌ nu̱u̱nꞌ ɨɨn inka táꞌán‑ó, sáva sikuéꞌnu‑ó ɨɨn inka táꞌán‑ó, ya̱ ɨɨn ni ñɨvɨ kuvi‑ó nu̱u̱nꞌ Cristo, kuéntáꞌ ɨɨn yɨkɨkúñu. 13Jee sikuéꞌnu‑ó ɨɨn inka táꞌán‑ó ne̱kua̱ꞌ ntáká‑ó kenta nunuún iniꞌ‑ó nu̱u̱nꞌ tu̱ꞌun kúneí iniꞌ‑ó Se̱ꞌya Ndiosíꞌ, jín nu̱u̱nꞌ tu̱ꞌun kuniꞌ va̱ꞌa‑ó ka̱ꞌ iniꞌ re̱ꞌ, ne̱kua̱ꞌ kenta kujia va̱ꞌa iniꞌ‑ó ne̱ kuna̱a̱ꞌ‑ó natɨɨn‑ó iniꞌ Cristo na̱sa íyó re̱ꞌ.

14Sáva nkúvi‑ó ka̱ꞌ kuéntáꞌ rá súchí lúlí ya̱ ntu ɨɨn ni jiáni iniꞌ ráa, jee sáva ntu kúvi‑ó ka̱ꞌ kuéntáꞌ ɨɨn nantíñú xínó xíníji ta̱chi̱ꞌ víjin chínaꞌá‑a cháꞌá chúkuán ya̱ súkuíkó‑o, chi nsáꞌ síkívɨ inka tu̱ꞌun ka̱ꞌ maáó yaꞌá yukuán, ya̱ xínéꞌénꞌ rá te̱e xínáꞌví cháꞌá chúkuán, ya̱ nito nasɨ́kuitɨꞌ íyó ráa jee máñáꞌ ráa jín tu̱ꞌun jíta xínéꞌénꞌ ráa. 15Chisaꞌ kunikɨnꞌ‑ó kaꞌanꞌ‑ó tu̱ꞌun na̱a̱ꞌ jín tu̱ꞌun kunu̱u̱nꞌ táꞌán‑ó, sukuán jee kueꞌnu‑ó jín ntáká tiñu kuíni Cristo, ya̱ yósóꞌ re̱ꞌ nu̱u̱nꞌ‑ó kuéntáꞌ yósóꞌ xi̱ni̱ꞌ nu̱u̱nꞌ yɨkɨkúñu. 16Jee kúvi ntáká‑ó kuéntáꞌ yɨkɨkúñu re̱ꞌ, ya̱ náketáꞌán kutú nɨꞌɨ jín rá nu̱u̱nꞌ ñútáꞌán jín rá tu̱chi fuersáꞌ, jee nunuún iniꞌ ntáká‑ó. Jee sáá nuún chíneí táꞌán va̱ꞌa‑ó sánikua̱ꞌ tiñu kúvi sáꞌá ta ɨɨn‑ó, jee sukuán síkújia iniꞌ táꞌán‑ó ka̱ꞌ sáva sikuéꞌnu‑ó táꞌán‑ó jín tu̱ꞌun ñúnúunꞌ táꞌán.

Nákueꞌnu jiáá‑ó saꞌá Cristo

17Saáva káchíꞌ ni̱ꞌ nu̱u̱nꞌ rán jee íchí sánáaꞌ ni̱ꞌ nu̱u̱nꞌ súví I̱toꞌoꞌ‑ó: ya̱ koto jiáꞌnu rán ka̱ꞌ kua̱ꞌ jiáꞌnu rá inka ñɨvɨ ntu kúvi ñɨvɨ Israel, ya̱ jiáꞌnu ráa tiñu jiáni ka̱ꞌá iniꞌ antúníꞌ ráa. 18Chi neenꞌ iniꞌ antúníꞌ ráa, chi jiáꞌnu íká ráa nu̱u̱nꞌ ya̱ tékúꞌ ñɨvɨ jín Ndiosíꞌ, jie̱ꞌe̱ꞌ ya̱ ntu̱ví jíníꞌ ráa tu̱ꞌun re̱ꞌ, jie̱ꞌe̱ꞌ ya̱ ni̱ꞌin iniꞌ ánímaꞌ ráa. 19Chi kuéntáꞌ níꞌiꞌ ráa ntu jiáni iniꞌ ráa ka̱ꞌ jie̱ꞌe̱ꞌ tiñu sáꞌá ráa, jee nákúꞌva ráa maáráa nu̱u̱nꞌ tiñu néꞌí néꞌén, sáva saꞌá ráa ntáká nu̱u̱nꞌ rá tiñu ntu̱ví íyó ninuꞌun, jee ntántúníꞌ níyo iniꞌ ráa saꞌá ráa ka̱ꞌ sukuán.

20Soo ránoꞌó, chi nsú rá ñujiínꞌ tiñu yukuán nku̱tu̱ꞌva rán jie̱ꞌe̱ꞌ Cristo. 21Chi retú máá naáꞌ nijia ya̱ nteso̱ꞌo rán tu̱ꞌun Cristo, jee nxi̱néꞌénꞌ ñɨvɨ nu̱u̱nꞌ rán sáni ya̱ naáꞌ ya̱ kúvi tu̱ꞌun Cristo, 22jee saáva, kene rán nu̱u̱nꞌ ñujiínꞌ tiñu ñáꞌnú rán tiempúꞌ ya̱ta̱ꞌ, siíyo rán na̱sa ni̱yo rán, chi stívɨ́‑ɨ ránoꞌó, ya̱ kúvi‑i rá tiñu xínáꞌví níyo iniꞌ ránú. 23Soo vitan jee nujiáá ánímaꞌ rán, jín antúníꞌ rán. 24Jee vitan jee sama iniꞌ rán ya̱ nujiáá rán, sáni násaꞌá jiáá Ndiosíꞌ iniꞌ ánímaꞌ ránoꞌó, sáva koo rán ka̱ꞌ kua̱ꞌ íyó maáréꞌ, sáva na̱a̱ꞌ koo rán jín sáva koo sɨ́ɨ́n rán nu̱u̱nꞌ rá niváꞌa, sánikua̱ꞌ káchíꞌ tu̱ꞌun nááꞌ Ndiosíꞌ.

25Jee saáva ránoꞌó siíyo rán tuntúꞌún yɨ́ꞌɨ́ yuꞌú rán, chisaꞌ kaꞌanꞌ rán jín tu̱ꞌun na̱a̱ꞌ nu̱u̱nꞌ rá ñanitáꞌán rán, chi ɨɨn ni ñɨvɨ kúvi‑ó.

26Jee retú kítɨ́ꞌ iniꞌ rán na̱ni jie̱ꞌe̱ꞌ jee koto sáꞌá rán kua̱chi, jee koto ñúꞌún tu̱nkítɨ́ꞌ iniꞌ rán núnuví, chi ñamani sijiáꞌa rán maa iniꞌ rán, ne̱ ntiáꞌan taꞌanꞌ nka̱niiꞌ. 27Jee ni koto jiáꞌa rán nu̱u̱nꞌ kui̱ꞌna̱ꞌ kúñáꞌnú ya̱ kiní re̱ꞌ maáréꞌ nteñu rán, sáva nkúneí re̱ꞌ nu̱u̱nꞌ ránoꞌó.

28Jee ñɨvɨ ya̱ sákuíꞌná, jee koto sákuíꞌná‑a ka̱ꞌ, chisaꞌ íyó satíñú‑u jín naꞌá‑a tiñu kúvi ya̱ váꞌa, sáva ni̱ꞌi̱nꞌ‑i ya̱ ku̱ꞌva‑a nu̱u̱nꞌ inka ñɨvɨ ya̱ jíniñúꞌún.

29Jee koto jiáꞌa rán ya̱ kene ni ɨɨn tu̱ꞌun niváꞌa kini yuꞌú nú, chisaꞌ kaꞌanꞌ rán tu̱ꞌun váꞌa ya̱ íyótiñu, ya̱ sikújia va̱ꞌa‑a ñɨvɨ sáni jíniñúꞌún ráa, sáva nachineí‑i ráa ya̱ tésóꞌo maa. 30Jee koto sáꞌá rán kua̱chi sáva nsíkúkuíꞌyáꞌ rán iniꞌ Ta̱chi̱ꞌ Ííꞌ Ndiosíꞌ. Chi nni̱ꞌi̱nꞌ rán Ta̱chi̱ꞌ Ííꞌ vá kuéntáꞌ ɨɨn seyúꞌ ya̱ stúvi ya̱ kúvi rán ñɨvɨ Ndiosíꞌ, ne̱kua̱ꞌ kiji máá ki̱vɨ̱ꞌ ya̱ nakani núne Ndiosíꞌ yó nu̱u̱nꞌ ya̱ nóꞌo‑ó ñɨ̱vɨ́ yaꞌá jee xinánitáꞌvíꞌ re̱ꞌ yó.

31Jee siíyo rán ntáká tu̱ꞌun ñútáꞌvi ñúꞌún iniꞌ rán, jín rá tu̱ꞌun kítɨ́ꞌ iniꞌ rán, jín rá tu̱ꞌun xe̱e̱nꞌ iniꞌ rán, jín rá kánajíín nu̱u̱nꞌ táꞌán rán, jín rá ténúunꞌ táꞌán rán, jín ntáká ka̱ꞌ rá inka tu̱ꞌun niváꞌa íyó. 32Chisaꞌ íyó koo va̱ꞌa ñunkúún iniꞌ rán jín ɨɨn inka táꞌán rán, jee koo ya̱ náꞌví iniꞌ rán, jee kunekáꞌnú iniꞌ rán kune̱ꞌyá rán ɨɨn inka táꞌán rán, kuéntáꞌ kua̱ꞌ sáni nne̱káꞌnú iniꞌ Ndiosíꞌ nne̱ꞌyá re̱ꞌ ránoꞌó, jie̱ꞌe̱ꞌ yɨ́ꞌɨ́ rán nu̱u̱nꞌ Cristo.

Currently Selected:

Efesios 4: meh

Highlight

Copy

Compare