Efesios 5

Na̱ja íyó kueꞌnu rá ñɨvɨ kúvi se̱ꞌya Ndiosíꞌ

1Jee saáva íyó naku rán iniꞌ máá Ndiosíꞌ, kuéntáꞌ íyó saꞌá rá se̱ꞌya re̱ꞌ, chi kúvi rán se̱ꞌya re̱ꞌ ya̱ ñúnúunꞌ re̱ꞌ ránoꞌó. 2Jee íyó kueꞌnu rán jín tu̱ꞌun ñúnúunꞌ táꞌán, kuéntáꞌ suni ñúnúunꞌ Cristo yó, jee nna̱ku̱ꞌva re̱ꞌ maáréꞌ jie̱ꞌe̱ꞌ‑ó, chi nso̱ko̱ꞌ re̱ꞌ maáréꞌ nu̱u̱nꞌ Ndiosíꞌ ni̱ꞌi̱ꞌ re̱ꞌ jie̱ꞌe̱ꞌ‑ó. Yukuán kúvi kuéntáꞌ ɨɨn xikoꞌ jiáꞌánꞌ vi̱xi̱ꞌ ya̱ téñuꞌunꞌ maa nu̱u̱nꞌ Ndiosíꞌ. Jee kúváꞌa iniꞌ Ndiosíꞌ néꞌyá re̱ꞌ maa.

3Soo koto sáꞌá rán ni koto káꞌánꞌ rán jie̱ꞌe̱ꞌ tiñu sáꞌá téní ni ɨɨn rán, ni ya̱ sáꞌá ni ɨɨn rán ntáká nu̱u̱nꞌ tiñu ya̱ ntu̱ví íyó ninuꞌun, ni tiñu ya̱ saꞌá uꞌvi iniꞌ ni ɨɨn rán, sáva ni ɨɨn ñɨvɨ ntu̱náꞌ kúvi kachiꞌ ráa ya̱ sáꞌá rán maa. Chi ntu íyó saꞌá ránoꞌó sukuán ya̱ nsa̱ꞌá sɨ́ɨ́n Ndiosíꞌ ránoꞌó ya̱ nkɨ́ꞌɨ rán ka̱ꞌ nu̱u̱nꞌ ya̱ niváꞌa. 4Jee ni koto káꞌánꞌ rán rá tu̱ꞌun néꞌí néꞌén, ni rá tu̱ꞌun naanꞌ nékáíyó, ni rá tu̱ꞌun kási̱kɨ́ kini. Chi rá tiñu yaꞌá ntu íyó váꞌa. Chisaꞌ ku̱ꞌva rán ya̱ kútaꞌviꞌ nu̱u̱nꞌ Ndiosíꞌ. 5Chi ya̱ jíníꞌ rán ya̱ ɨɨn ñɨvɨ sáꞌá téní‑i, áxí sáꞌá‑a tiñu ya̱ ntu̱ví íyó ninuꞌun, áxí sáꞌá uꞌvi iniꞌ‑i (jee ñɨvɨ vá nuún kúvi‑i jín ɨɨn ñɨvɨ ya̱ néñu̱ꞌun‑u ɨɨn nantíñú ya̱ ntu kúvi Ndiosíꞌ), jee ya jíníꞌ rán ya̱ ni ɨɨn ráa ni nsáꞌ ni̱ꞌi̱nꞌ‑i ya̱ ki̱vɨ‑ɨ naꞌá Cristo jín Ndiosíꞌ nu̱u̱nꞌ tátúníꞌ ráa. 6Jee koto jiáꞌa rán xináꞌví ni ɨɨn ñɨvɨ ránoꞌó jín tu̱ꞌun káꞌánꞌ ka̱ꞌá‑a, chi jie̱ꞌe̱ꞌ ya̱ sáꞌá ñɨvɨ rá tiñu niváꞌa vá kúvi ya̱ kiji tu̱nóꞌó xéénꞌ taji Ndiosíꞌ nu̱u̱nꞌ rá ñɨvɨ kújiááꞌ iniꞌ ráa nu̱u̱nꞌ Ndiosíꞌ. 7Jee koto kívɨ rán jín ráa nu̱u̱nꞌ tiñu niváꞌa sáꞌá ráa.

8Chi tiempúꞌ ya̱ta̱ꞌ yukuán jee nkuvi rán kuéntáꞌ ñu̱neenꞌ jie̱ꞌe̱ꞌ kua̱chi rán. Soo vitan jee kúvi rán kuéntáꞌ ñuꞌunꞌ ya̱ túúnꞌ, chi yɨ́ꞌɨ́ rán nu̱u̱nꞌ I̱toꞌoꞌ‑ó. Jee íyó kueꞌnu rán nu̱u̱nꞌ túúnꞌ ñuꞌunꞌ re̱ꞌ iniꞌ ánímaꞌ rán kuéntáꞌ íyó kueꞌnu rá se̱ꞌya Ndiosíꞌ. 9Chi ñuꞌunꞌ re̱ꞌ ya̱ túúnꞌ iniꞌ ánímaꞌ‑ó, sáꞌá‑a ya̱ saꞌá‑ó ntáká tiñu váꞌa, jín ntáká tiñu na̱a̱ꞌ, jín ya̱ kaꞌanꞌ‑ó ya̱ naáꞌ. 10Jee kototúníꞌ rán rá tiñu sáva kukáꞌnú iniꞌ rán na̱ tiñu kúváꞌa iniꞌ I̱toꞌoꞌ‑ó néꞌyá re̱ꞌ maa. 11Jee koto kívɨ rán nu̱u̱nꞌ rá tiñu niváꞌa ya̱ ntu íyótiñu ya̱ sáꞌá ñɨvɨ ya̱ jiáꞌnu nu̱u̱nꞌ neenꞌ, chisaꞌ stúvi rán nu̱u̱nꞌ nijínꞌ ya̱ niváꞌa ví rá tiñu vá. 12Chi íyó tu̱nkánuun sáá káꞌánꞌ‑ó jie̱ꞌe̱ꞌ rá tiñu ya̱ sáꞌá yuꞌuꞌ ráa. 13Soo Tu̱ꞌun Ndiosíꞌ kúvi kuéntáꞌ ñuꞌunꞌ ya̱ stúúnꞌ‑u jee suꞌva stúvi‑i nu̱u̱nꞌ nijínꞌ na̱ja íyó ntáká tiñu. Chi sáá túúnꞌ ñuꞌunꞌ nu̱u̱nꞌ nɨꞌɨ nátúvi nu̱u̱nꞌ nijinꞌ. 14Jee jie̱ꞌe̱ꞌ vá káchíꞌ tu̱ꞌun yaꞌá suꞌva:

Noto, noꞌó ya̱ kíxíꞌ iniꞌ nú,

jee nako̱o nú nteñu rá ñɨvɨ ya̱ kúvi kuéntáꞌ ñɨvɨ níꞌiꞌ,

jee Cristo stúúnꞌ re̱ꞌ ñuꞌunꞌ re̱ꞌ iniꞌ ánímaꞌ nú.

15Saáva kumí va̱ꞌa rán na̱ja jiáꞌnu rán. Koto jiáꞌnu rán kuéntáꞌ kua̱ꞌ jiáꞌnu rá ñɨvɨ ya̱ ntu ñúꞌún kájí xi̱ni̱ꞌ, chisaꞌ kueꞌnu rán kuéntáꞌ kua̱ꞌ ñɨvɨ ñúꞌún kájí xíniꞌ. 16Vitan íyó tiempúꞌ jee kuniꞌvɨꞌ iniꞌ rán saꞌá rán tiñu ntaji Ndiosíꞌ saꞌá rán, chi tiempúꞌ vitan jee íyó víꞌí ñɨvɨ jíka ráa ichi niváꞌa. 17Jee saáva koto kúvi rán ñɨvɨ jiáni naanꞌ xi̱ni̱ꞌ, chisaꞌ ki̱ku̱ꞌun iniꞌ rán ntáká tiñu ya̱ kuíni I̱toꞌoꞌ‑ó ya̱ saꞌá rán. 18Jee koto jíꞌi rán nixiꞌ ne̱ ku̱ni rán, ya̱ stívɨ́ rán maárán. Chisaꞌ kukánáa iniꞌ ánímaꞌ rán kɨꞌɨ chitú Ta̱chi̱ꞌ Ííꞌ Ndiosíꞌ ya̱ kuneí‑i kunaka‑a ránoꞌó. 19Jee kaꞌanꞌ rán jín ɨɨn inka rá táꞌán rán, yaaꞌ Tu̱ꞌun Ndiosíꞌ naní salmo, jín rá tu̱ꞌun yaaꞌ himno ya̱ nákuetúꞌún‑u Ndiosíꞌ, jín rá yaaꞌ ííꞌ jie̱ꞌe̱ꞌ Ndiosíꞌ. Jee ne̱ jín ánímaꞌ rán kata rán jee nakuetúꞌún rán I̱toꞌoꞌ‑ó. 20Jee nu̱u̱nꞌ súví I̱toꞌoꞌ‑ó Jesús ya̱ kúvi Cristo, sukuáni íyó ku̱ꞌva rán ya̱ kútaꞌviꞌ rán nu̱u̱nꞌ Tátáꞌ‑ó Ndiosíꞌ, jie̱ꞌe̱ꞌ ntáká na̱janu̱u̱nꞌ.

Na̱ja íyó sikúnkuvi rá ñɨvɨ yɨ́ꞌɨ́ nu̱u̱nꞌ Cristo nu̱u̱nꞌ ɨɨn inka táꞌán ráa.

21Chiꞌi rán maárán xi̱ntíín ɨɨn inka táꞌánꞌ rán, jie̱ꞌe̱ꞌ ya̱ ñúyúꞌví iniꞌ rán yɨ́ñúꞌún rán nu̱u̱nꞌ Cristo.

22Rá ñaꞌan ya̱ íyó yɨɨ́ ráa, chiꞌi ráa maáráa xi̱ntíín yɨɨ́ ráa, kuéntáꞌ kua̱ꞌ chíꞌi ráa maáráa nu̱u̱nꞌ I̱toꞌoꞌ‑ó. 23Chi te̱e ya̱ kúvi yɨɨ́ ɨɨn ñaꞌan ví ya̱ yósóꞌ nu̱u̱nꞌ ñasɨ́ꞌɨ́ re̱ꞌ, kuéntáꞌ kua̱ꞌ Cristo yósóꞌ re̱ꞌ nu̱u̱nꞌ ntáká yó ya̱ kúneí iniꞌ‑ó re̱ꞌ. Chi kúvi te̱e kuéntáꞌ xi̱ni̱ꞌ nu̱u̱nꞌ ñasɨ́ꞌɨ́‑ɨ kuéntáꞌ kua̱ꞌ kúvi Cristo kuéntáꞌ xi̱ni̱ꞌ nu̱u̱nꞌ‑ó, jee maáórán kúvi kuéntáꞌ yɨkɨkúñu re̱ꞌ. Jee maáréꞌ ví ya̱ síkáku re̱ꞌ yó nu̱u̱nꞌ kua̱chi‑ó. 24Jee saáva kuéntáꞌ kua̱ꞌ maáórán, ya̱ kúneí iniꞌ‑ó Cristo, chiꞌi‑ó maáó xi̱ntíín Cristo, jee suni sukuán rá ñaꞌan ya̱ íyó yɨɨ́‑ɨ íyó chiꞌi ráa maáráa xi̱ntíín yɨɨ́ ráa jie̱ꞌe̱ꞌ na̱janu̱u̱nꞌ.

25Jee rá te̱e ya̱ kúvi yɨɨ́, íyó kunu̱u̱nꞌ ráa ñasɨ́ꞌɨ́ ráa, kuéntáꞌ kua̱ꞌ nñunu̱u̱nꞌ Cristo yó ya̱ kúneí iniꞌ‑ó re̱ꞌ, jee nna̱ku̱ꞌva re̱ꞌ maáréꞌ ni̱ꞌi̱ꞌ re̱ꞌ jie̱ꞌe̱ꞌ‑ó. 26Nsa̱ꞌá re̱ꞌ sukuán sáva saꞌá sɨ́ɨ́n re̱ꞌ yó sáva nkɨ́ꞌɨ‑ó ka̱ꞌ nu̱u̱nꞌ kua̱chi‑ó, jee nna̱sánoo re̱ꞌ ánímaꞌ‑ó jín tu̱ꞌun re̱ꞌ, kuéntáꞌ nna̱kete re̱ꞌ yó jín nute. 27Nsa̱ꞌá re̱ꞌ sukuán sáva sáá naku̱ꞌva re̱ꞌ yó nu̱u̱nꞌ maáréꞌ ya̱ kúneí iniꞌ‑ó re̱ꞌ jee viiꞌ kuñáꞌnú‑ó, chi nkóo kua̱chi ánímaꞌ‑ó, ni ya̱ niváꞌa, ni néni ɨɨn rá yukuán, sáva koo sɨ́ɨ́n‑ó nkɨ́ꞌɨ‑ó nu̱u̱nꞌ ya̱ niváꞌa jee koo ninuꞌun‑ó nu̱u̱nꞌ re̱ꞌ. 28Jee suni sukuán rá te̱e íyó ñasɨ́ꞌɨ́ íyó kunu̱u̱nꞌ ráa rá ñasɨ́ꞌɨ́ maáráa, kuéntáꞌ ñúnúunꞌ ráa rá yɨkɨkúñu maáráa. Chi te̱e ya̱ ñúnúunꞌ re̱ꞌ ñasɨ́ꞌɨ́ maáréꞌ, jee ñúnúunꞌ re̱ꞌ maáréꞌ. 29Chi ni ɨɨn ñɨvɨ ntu̱ví táꞌvi iniꞌ‑i néꞌyá‑a yɨkɨkúñu maáa, chisaꞌ síkájíꞌ‑i vá, jee jíto va̱ꞌa‑a vá, kuéntáꞌ kua̱ꞌ sáni sáꞌá Cristo jín‑ó ya̱ kúneí iniꞌ‑ó re̱ꞌ. 30Chi yɨ́ꞌɨ́‑ó nu̱u̱nꞌ re̱ꞌ kuéntáꞌ kúvi‑ó pedasúꞌ yɨkɨkúñu re̱ꞌ. 31Chi káchíꞌ nu̱u̱nꞌ Tutuꞌ Ííꞌ níso Tu̱ꞌun Ndiosíꞌ:

Saáva xinóo ɨɨn te̱e tátáꞌ re̱ꞌ jín nánáꞌ re̱ꞌ,

jee kutayú re̱ꞌ jín ñasɨ́ꞌɨ́ re̱ꞌ.

Jee ɨɨn ni kuvi núvíꞌ ráa kuéntáꞌ íyó ɨɨn yɨkɨkúñu ni.

32Jee tu̱ꞌun kúñáꞌnú nasɨ́kuitɨꞌ ka̱ꞌ kúvi tu̱ꞌun nyɨse̱ꞌí vá, chi káꞌánꞌ ni̱ꞌ tu̱ꞌun yaꞌá jie̱ꞌe̱ꞌ ɨɨn ni kúvi Cristo jín maáórán ya̱ kúneí iniꞌ‑ó re̱ꞌ. 33Jee suni jie̱ꞌe̱ꞌ yukuán kúvi ya̱ ta ɨɨn ta ɨɨn rán ya̱ kúvi te̱e íyó ñasɨ́ꞌɨ́ íyó kunu̱u̱nꞌ nú ñasɨ́ꞌɨ́ nú, kuéntáꞌ ñúnúunꞌ nú maánú. Jee ñaꞌan ya̱ kúvi ñasɨ́ꞌɨ́ ɨɨn te̱e íyó koo ya̱ ñáꞌnú ña nu̱u̱nꞌ yɨɨ́ ña.

Currently Selected:

Efesios 5: meh

Highlight

Copy

Compare