2 Corintios 10

Nte̱tíñú Ndiosíꞌ tiñu si̱kɨ̱ꞌ Pablo ya̱ kuvi re̱ꞌ apóstol

1Nuꞌuꞌ Pablo jíkánꞌ táꞌvíꞌ ni̱ꞌ nu̱u̱nꞌ ránoꞌó jee másúꞌ káꞌánꞌ ni̱ꞌ jee káꞌánꞌ vi̱tá ni̱ꞌ kuéntáꞌ káꞌánꞌ Cristo. Jee ñɨvɨ káꞌvi ni káchíꞌ ya̱ sáá nééꞌ ni̱ꞌ jín rán jee ñúꞌún láꞌví iniꞌ ni̱ꞌ, soo sáá íyó íká ni̱ꞌ nu̱u̱nꞌ rán jee ñúꞌún tiɨ́kɨ́ iniꞌ ni̱ꞌ káꞌánꞌ ni̱ꞌ jín ránoꞌó, sáá tée ni̱ꞌ nu̱u̱nꞌ tutuꞌ nu̱u̱nꞌ rán. 2Soo jíkánꞌ táꞌvíꞌ ni̱ꞌ nu̱u̱nꞌ ránoꞌó ya̱ koto núkú rán ya̱ kuꞌun tiɨ́kɨ́ iniꞌ ni̱ꞌ nu̱u̱nꞌ rán sáá kuneeꞌ ni̱ꞌ jín rán. Chi kúneí iniꞌ ni̱ꞌ Ndiosíꞌ ya̱ ɨɨn ni ñúꞌún iniꞌ ni̱ꞌ kaꞌanꞌ tiɨ́kɨ́ iniꞌ ni̱ꞌ nu̱u̱nꞌ rá ñɨvɨ jiáni iniꞌ ya̱ jiáꞌnu ráníꞌ sánikua̱ꞌ jiáꞌnu rá ñɨvɨ ñɨ̱vɨ́ yaꞌá, ya̱ ntu yɨ́ꞌɨ́ ráa xi̱ntíín Ndiosíꞌ. 3Chi sú kúvi ráníꞌ ñɨvɨ ñunéꞌyúꞌ jiáꞌnu ránꞌ nu̱u̱nꞌ ñɨ̱vɨ́ yaꞌá, jee kúvi ránꞌ kuéntáꞌ soldado jiátíñú Cristo sáva núnasɨ́ ránꞌ kántáꞌán ránꞌ, soo ntu kántáꞌán ránꞌ sánikua̱ꞌ kántáꞌán rá ñɨvɨ ñɨ̱vɨ́ yaꞌá. 4Chi ya̱ jiátíñú ránꞌ kántáꞌán ránꞌ nsú nantíñú ya̱ jiátíñú rá ñɨvɨ ñɨ̱vɨ́ yaꞌá kúvi‑i. Chisaꞌ táji Ndiosíꞌ ya̱ maá ñáꞌnú mánasɨ́ ví ya̱ jiátíñú ránꞌ sáva kántáꞌán ránꞌ, sáva xináánꞌ ránꞌ fuersáꞌ ya̱ níkó neí ñɨvɨ núníꞌin iniꞌ ánímaꞌ ráa sáva ntɨ́ɨn ráa tu̱ꞌun váꞌa Jesús. 5Jee xínáánꞌ ránꞌ tu̱ꞌun ya̱ va̱ji xi̱ni̱ꞌ ñɨvɨ, jee xínáánꞌ ránꞌ nta̱ká tu̱ꞌun jiáni téyɨ́ɨ́ iniꞌ‑i ya̱ jiásɨ́ꞌ ya̱ kuniꞌ ñɨvɨ iniꞌ Ndiosíꞌ, jee sáꞌá ránꞌ ya̱ nakɨ̱ꞌɨ nta̱ká antúníꞌ rá ñɨvɨ xi̱ntíín Cristo, sáva kaníjiá ráa re̱ꞌ. 6Jee sáá nɨꞌɨ noo kuitɨꞌ kaníjiá va̱ꞌa ránú jee ɨɨn ni íyó iniꞌ ráníꞌ xinóꞌo ránꞌ rá ñɨvɨ grupo rán ya̱ ntu káníjiá ráa.

7Jee ránoꞌó chi kua̱chi kuitɨꞌ néꞌyá rán na̱sa túvi nijinꞌ ránuꞌuꞌ. Soo retú néni ɨɨn ñɨvɨ ínúꞌ iniꞌ‑i ya̱ yɨ́ꞌɨ́‑ɨ nu̱u̱nꞌ Cristo, jee maáa íyó kani va̱ꞌa tuku iniꞌ‑i, chi sánikua̱ꞌ yɨ́ꞌɨ́‑ɨ nu̱u̱nꞌ Cristo, suni sukuán yɨ́ꞌɨ́ ránuꞌuꞌ nu̱u̱nꞌ Cristo. 8Chi nkóo tu̱ꞌun kánuun ni̱ꞌ, retú kaꞌanꞌ téyɨ́ɨ́ ni̱ꞌ ka̱ꞌ jie̱ꞌe̱ꞌ tiñu níso ráníꞌ ya̱ ntaji I̱toꞌoꞌ‑ó nu̱u̱nꞌ ránꞌ sáva sikújia ránꞌ iniꞌ ránoꞌó kuneí iniꞌ rán Cristo, jee nsú sáva xináánꞌ ránꞌ ránoꞌó. 9Soo ntu kuíni ni̱ꞌ ya̱ kani iniꞌ rán ya̱ núkú ni̱ꞌ siúꞌví ni̱ꞌ ránoꞌó jie̱ꞌe̱ꞌ tutuꞌ tée ni̱ꞌ nu̱u̱nꞌ ránoꞌó. 10Chi íyótúníꞌ ni ñɨvɨ káchíꞌ jie̱ꞌe̱ꞌ nuꞌuꞌ ya̱: “Rá tutuꞌ tée re̱ꞌ nu̱u̱nꞌ ráníꞌ, máá tu̱ꞌun xichiꞌ káꞌánꞌ re̱ꞌ jee tu̱ꞌun ni̱ꞌin tiɨ́kɨ́ káꞌánꞌ re̱ꞌ. Soo sáá nééꞌ re̱ꞌ jín ránꞌ, jee táyáꞌ iniꞌ ni túvi re̱ꞌ, jee ni ntu yɨ́yáꞌvi tu̱ꞌun káꞌánꞌ re̱ꞌ”, káchíꞌ ráa. 11Soo ɨɨn ñɨvɨ ya̱ íyó sukuán, jee íyó kani va̱ꞌa tuku iniꞌ‑i jie̱ꞌe̱ꞌ vá, chi sánikua̱ꞌ íyó ráníꞌ káꞌánꞌ ránꞌ nu̱u̱nꞌ rá tutuꞌ tée ránꞌ sáá íyó íká ránꞌ, jee suni sukuán íyó rán jín sáꞌá ránꞌ sáá nééꞌ ránꞌ jín ránoꞌó.

12Chi ntu kíji iniꞌ ráníꞌ kachiꞌ ránꞌ ya̱ ɨɨn ni kúvi ránꞌ jín ráa jee ni ntu nuún íyó ránꞌ jín rá ñɨvɨ vá ya̱ nákutíñú va̱ꞌa ráa jie̱ꞌe̱ꞌ maáráa. Chúkúꞌva ráa sáá sáꞌá maáráa jín maáráa sáva kene ya̱ jiáni iniꞌ ráa ya̱ kúñáꞌnú ráa, jee tɨ́ɨn kuéntáꞌ ráa sáá íyó maáráa jín táꞌán maáráa. Ntu̱náꞌ jiáku̱ꞌun iniꞌ ráa. 13Chisaꞌ ntu náchisó ráníꞌ si̱kɨ̱ꞌ ka̱ꞌ káꞌánꞌ téyɨ́ɨ́ ránꞌ jie̱ꞌe̱ꞌ tiñu sáꞌá ránꞌ. Chi káꞌánꞌ téyɨ́ɨ́ ránꞌ kua̱chi jie̱ꞌe̱ꞌ tiñu sáꞌá ránꞌ ya̱ ntaji Ndiosíꞌ nu̱u̱nꞌ ránuꞌuꞌ sáva saꞌá ránꞌ maa. Jee ntaji re̱ꞌ tiñu vá nu̱u̱nꞌ ráníꞌ sánikua̱ꞌ nchu̱ku̱ꞌva re̱ꞌ. Jee tiñu vá kénta‑a ne̱ nu̱u̱nꞌ ránoꞌó. 14Chi ntu síkáa ráníꞌ si̱kɨ̱ꞌ ka̱ꞌ káꞌánꞌ téyɨ́ɨ́ ránꞌ, kuéntáꞌ retánꞌ ntu kénta ránꞌ nu̱u̱nꞌ ránoꞌó. Chi nkenta nijia ránꞌ nu̱u̱nꞌ ránoꞌó ranika̱ꞌ stékútu̱ꞌún ránꞌ tu̱ꞌun va̱ꞌa jie̱ꞌe̱ꞌ Cristo. 15Jee ntu jiáꞌa ráníꞌ nu̱u̱nꞌ sáni íyó káꞌánꞌ ránꞌ, chi ntu káꞌánꞌ téyɨ́ɨ́ ránꞌ jie̱ꞌe̱ꞌ tiñu ya̱ sáꞌá rá inka ka̱ꞌ te̱e, kuéntáꞌ retánꞌ nsa̱ꞌá ránꞌ maa. Chisaꞌ íyó tu̱neí iniꞌ ráníꞌ kujia iniꞌ ránú ya̱ kúneí iniꞌ rán Cristo, sáva kueꞌnu tiñu sáꞌá ráníꞌ nteñu ránoꞌó sáni nte̱tíñú Ndiosíꞌ ránuꞌuꞌ. 16Sáva stekútu̱ꞌún ránꞌ tu̱ꞌun váꞌa jie̱ꞌe̱ꞌ Cristo nu̱u̱nꞌ rá ñuunꞌ káá íká ka̱ꞌ. Sáva ntu kaꞌanꞌ téyɨ́ɨ́ ni̱ꞌ jie̱ꞌe̱ꞌ tiñu ya̱ ya ñakɨnꞌ inka rá te̱e. 17Soo: “Retú néni ɨɨn ñɨvɨ káꞌánꞌ téyɨ́ɨ́‑ɨ, va̱ꞌa ka̱ꞌ kaꞌanꞌ téyɨ́ɨ́‑ɨ jie̱ꞌe̱ꞌ I̱toꞌoꞌ‑ó.” 18Chi nsú ñɨvɨ ya̱ nákutíñú va̱ꞌa ráa maáráa ví ya̱ kene na̱a̱ꞌ, chisaꞌ ñɨvɨ ya̱ maá I̱toꞌoꞌ‑ó ví ya̱ nákutíñú va̱ꞌa re̱ꞌ maa ví ya̱ kene na̱a̱ꞌ.

Currently Selected:

2 Corintios 10: meh

Highlight

Copy

Compare