2 Corintios 11

Ya̱ káchíꞌ Pablo jie̱ꞌe̱ꞌ rá te̱e ya̱ káchíꞌ ráa nika̱ꞌ ya̱ kúvi rá apóstol

1Varésukuáre kɨnetuꞌ ránú nu̱u̱nꞌ nuꞌuꞌ sáá káꞌánꞌ ni̱ꞌ ntíꞌ kuéntáꞌ káꞌánꞌ te̱e naanꞌ. ¡Kɨnetuꞌ rán nu̱u̱nꞌ nuꞌuꞌ! 2Chi ñúꞌún kuíñɨ́ iniꞌ ni̱ꞌ néꞌyá ni̱ꞌ ránoꞌó, sáni kuíñɨ́ iniꞌ maá Ndiosíꞌ néꞌyá re̱ꞌ ránoꞌó. Chi nsa̱ꞌá ni̱ꞌ kuéntáꞌ te̱e jíka na̱ꞌvi̱ꞌ, chi njia̱ꞌayuꞌú ni̱ꞌ ku̱ꞌva ni̱ꞌ ránoꞌó nu̱u̱nꞌ métúꞌún Cristo, kuéntáꞌ kúvi re̱ꞌ yɨɨ́ rán, ku̱ꞌva ni̱ꞌ ránoꞌó nu̱u̱nꞌ re̱ꞌ kuéntáꞌ jiáꞌa ráa ɨɨn ñaꞌan núún íyó ninuꞌun nu̱u̱nꞌ yɨɨ́ ña. 3Soo yúꞌví ni̱ꞌ ya̱ sa̱naanꞌ jee kusɨ́ɨ́n rán nu̱u̱nꞌ yɨ́tíñú rán ne̱ saɨn ninuꞌun iniꞌ rán nu̱u̱nꞌ métúꞌún Cristo, jee sukuán jíta antúníꞌ rán, kuéntáꞌ nxi̱náꞌví ko̱o̱ꞌ Eva jín máñáꞌ ti̱ꞌ. 4Chi ntɨɨn ránú Jesús jín Ta̱chi̱ꞌ Ííꞌ Ndiosíꞌ jín tu̱ꞌun váꞌa jie̱ꞌe̱ꞌ Jesús. Soo va̱ꞌa yɨ́netuꞌ rán, retú kenta ɨɨn ñɨvɨ jee sɨ́ɨ́n stékútu̱ꞌún‑u jie̱ꞌe̱ꞌ Jesús ya̱ nsú tu̱ꞌun na̱a̱ꞌ ya̱ nstékútu̱ꞌún ráníꞌ jie̱ꞌe̱ꞌ re̱ꞌ, áxí tɨɨn rán ɨɨn ta̱chi̱ꞌ ya̱ sɨ́ɨ́n kúvi‑i ya̱ nsú Ta̱chi̱ꞌ Ííꞌ Ndiosíꞌ ya̱ ya ntɨɨn rán, áxí tɨɨn rán ɨɨn tu̱ꞌun ya̱ sɨ́ɨ́n íyó ya̱ nsú tu̱ꞌun na̱a̱ꞌ váꞌa jie̱ꞌe̱ꞌ Jesús ya̱ ya ntɨɨn rán. 5Soo jiáni iniꞌ ni̱ꞌ ya̱ ni ɨɨn nu̱u̱nꞌ ntu núun ka̱ꞌ kúvi ni̱ꞌ nu̱u̱nꞌ rá te̱e vá ya̱ jiáni iniꞌ ñɨvɨ ya̱ kúvi ráa apóstol kúñáꞌnú ka̱ꞌ. 6Chi retú ntu túꞌva ni̱ꞌ kaꞌanꞌ va̱ꞌa ni̱ꞌ, soo nsú sukuán kúvi jie̱ꞌe̱ꞌ ya̱ jíníꞌ va̱ꞌa ni̱ꞌ tu̱ꞌun váꞌa jie̱ꞌe̱ꞌ Jesús, chi nstúvi kájí ni̱ꞌ yaꞌá nu̱u̱nꞌ ránoꞌó, ntáká nu̱u̱nꞌ, ntáká íchí.

7Áxí, ¿á nsa̱ꞌá ni̱ꞌ kua̱chi ya̱ nsa̱ꞌá láꞌví ni̱ꞌ maáníꞌ sáva xináa Ndiosíꞌ ránoꞌó kúñáꞌnú rán, jie̱ꞌe̱ꞌ ya̱ ntu kéꞌen ni̱ꞌ ya̱ꞌvi ni̱ꞌ nu̱u̱nꞌ ránoꞌó sáva stekútu̱ꞌún saɨn ni̱ꞌ tu̱ꞌun váꞌa Ndiosíꞌ jie̱ꞌe̱ꞌ Jesús nu̱u̱nꞌ rán rúja? 8Chi ntɨɨn ni̱ꞌ xu̱ꞌún rá inka grupo ñɨvɨ kúneí iniꞌ ráa Jesús, kuéntáꞌ nsa̱kuíꞌná ni̱ꞌ, chi ntɨɨn ni̱ꞌ ya̱ꞌvi ni̱ꞌ ya̱ ntaji ráa nu̱u̱nꞌ ni̱ꞌ, sáva saꞌá ni̱ꞌ tiñu Ndiosíꞌ nteñu ránoꞌó. 9Jee sáá nneeꞌ ni̱ꞌ jín ránoꞌó jee ntu nkúvi ni̱ꞌ tiñu véi nu̱u̱nꞌ ni ɨɨn ránoꞌó, sú nkumaniꞌ nu̱u̱nꞌ ni̱ꞌ. Chi rá ñanitáꞌán‑ó ya̱ nkiji ichi rá ñuunꞌ Macedonia nkenta ráa ntaji ráa ya̱ niniñúꞌún ni̱ꞌ. Jee íchí ntu njiáꞌa ni̱ꞌ maáníꞌ kúvi ni̱ꞌ tiñu véi nu̱u̱nꞌ ránoꞌó, jee kunikɨnꞌ ni̱ꞌ saꞌá ni̱ꞌ suꞌva. 10Kuéntáꞌ kua̱ꞌ káꞌánꞌ na̱a̱ꞌ Cristo, suni sukuán káꞌánꞌ na̱a̱ꞌ ni̱ꞌ. Jee sukuán káchíꞌ ni̱ꞌ ya̱ ni ɨɨn ñɨvɨ rá ñuunꞌ Acaya nka̱sɨ́ꞌ ráa nu̱u̱nꞌ ni̱ꞌ ya̱ káꞌánꞌ téyɨ́ɨ́ ni̱ꞌ jie̱ꞌe̱ꞌ vá. 11¿Na̱ kuvi chi káꞌánꞌ ni̱ꞌ sukuán rúja? ¿Á ntu ñúnúunꞌ ni̱ꞌ ránoꞌó rúja? Jíníꞌ Ndiosíꞌ ya̱ ñúnúunꞌ ni̱ꞌ ránoꞌó.

12Soo kunikɨnꞌ ni̱ꞌ saꞌá ni̱ꞌ sánikua̱ꞌ sáꞌá ni̱ꞌ, sáva kasɨꞌ ni̱ꞌ ichi nu̱u̱nꞌ rá ñɨvɨ ya̱ kúvi iniꞌ ráa núne nu̱u̱nꞌ ráa kaꞌanꞌ téyɨ́ɨ́ ráa ya̱ nuún túvi ráa jín ránuꞌuꞌ. 13Chi rá te̱e vá jee kátúꞌún ráa ya̱ níso ráa tiñu apóstol, soo ntu̱ví. Tiñu xínáꞌví sáꞌá ráa. Sáꞌá ráa nika̱ꞌ maáráa ya̱ kúvi ráa apóstol ya̱ chúichi Cristo. 14Jee nsú tiñu tívɨ́ xíniꞌ‑ó ví‑i, chi ne̱ maá Satanás sáꞌá re̱ꞌ nika̱ꞌ maáréꞌ ya̱ kúvi re̱ꞌ najiáꞌáꞌ jiánu̱te̱ꞌ kuéntáꞌ ɨɨn najiáꞌáꞌ ííꞌ Ndiosíꞌ. 15Jee saáva nsú a̱nasɨ́ ví retú rá ñɨvɨ yɨ́tíñú ráa nu̱u̱nꞌ Satanás suni sukuán sáꞌá ráa nika̱ꞌ maáráa ya̱ yɨ́tíñú ráa nu̱u̱nꞌ Ndiosíꞌ kuéntáꞌ ñɨvɨ na̱a̱ꞌ. Sijíta Ndiosíꞌ ráa xinóꞌo re̱ꞌ ráa sánikua̱ꞌ tiñu sáꞌá ráa.

Tu̱nóꞌó nnoꞌo Pablo jie̱ꞌe̱ꞌ ya̱ kúvi re̱ꞌ apóstol

16Tukuni káchíꞌ ni̱ꞌ ya̱ ni ɨɨn rán koto jiáni iniꞌ rán ya̱ te̱e naanꞌ kúvi ni̱ꞌ. Soo retú jiáni iniꞌ rán ya̱ te̱e naanꞌ kúvi ni̱ꞌ, soo koo ma̱ni̱ꞌ iniꞌ rán kune̱ꞌyá rán nuꞌuꞌ, sáva nuꞌuꞌ suni kúvi kaꞌanꞌ téyɨ́ɨ́ ni̱ꞌ ntíꞌ, na̱sa yɨ́tíñú ni̱ꞌ nu̱u̱nꞌ Ndiosíꞌ. 17Soo sáá káꞌánꞌ ni̱ꞌ suꞌva, jee ntu káꞌánꞌ ni̱ꞌ sáni nkaꞌanꞌ I̱toꞌoꞌ‑ó. Chisaꞌ kuéntáꞌ káꞌánꞌ naanꞌ ni̱ꞌ, sáá kúneí iniꞌ ni̱ꞌ ya̱ kaꞌanꞌ téyɨ́ɨ́ iniꞌ ni̱ꞌ. 18Íyó kue̱ꞌe̱ꞌ ñɨvɨ ya̱ káꞌánꞌ téyɨ́ɨ́ ráa jie̱ꞌe̱ꞌ maáráa sánikua̱ꞌ íyó ráa, jee suni sukuán kaꞌanꞌ téyɨ́ɨ́ ni̱ꞌ. 19Chi va̱ꞌa yɨ́netuꞌ rán jiéꞌnéꞌ iniꞌ rán nu̱u̱nꞌ néni ɨɨn ñɨvɨ naanꞌ, sú jiáni iniꞌ rán ya̱ níchí xíniꞌ rán. 20Chi yɨ́netuꞌ rán jiéꞌnéꞌ iniꞌ rán nu̱u̱nꞌ ráa retú néni ɨɨn ñɨvɨ chíꞌi‑i ránoꞌó xi̱ntíín‑i kuéntáꞌ musúꞌ saɨn kéꞌen ñɨvɨ,

retú néni ɨɨn ñɨvɨ xínɨ́ꞌɨ‑ɨ ránoꞌó jín nantíñú rán,

retú néni ɨɨn ñɨvɨ nééꞌ nu̱u̱nꞌ‑u ránoꞌó jie̱ꞌe̱ꞌ rá nantíñú rán,

retú néni ɨɨn ñɨvɨ sáꞌá ñáꞌnú‑u maáa,

retú néni ɨɨn ñɨvɨ kátúꞌ‑u nu̱u̱nꞌ rán.

21Jee kúkanuun ni̱ꞌ ya̱ káchíꞌ ni̱ꞌ ya̱ táyáꞌ iniꞌ ránꞌ ntu tiɨ́kɨ́ iniꞌ ráníꞌ saꞌá ránꞌ sukuán.

Soo na̱ni jie̱ꞌe̱ꞌ ya̱ kíji iniꞌ néni ɨɨn ñɨvɨ káꞌánꞌ téyɨ́ɨ́‑ɨ, sunisaá nuꞌuꞌ kíji iniꞌ ni̱ꞌ, sú kuéntáꞌ káꞌánꞌ naanꞌ ni̱ꞌ.

22¿Á kúvi ráa rá te̱e hebreo?

Jee sunisaá ranika̱ꞌ nuꞌuꞌ.

¿Á kúvi ráa ñɨvɨ Israel ya̱ kúvi ñɨvɨ Ndiosíꞌ?

Jee sunisaá ranika̱ꞌ nuꞌuꞌ.

¿Á kúvi ráa se̱ꞌya ichiyúkúnꞌ váji ráa nu̱u̱nꞌ Abraham?

Jee sunisaá ranika̱ꞌ nuꞌuꞌ.

23¿Á sátíñú ráa nu̱u̱nꞌ Cristo?

Soo saꞌ víꞌí káꞌ va̱ꞌa jiáꞌa ni̱ꞌ nu̱u̱nꞌ tiñu sáꞌá ráa.

(Káꞌánꞌ ni̱ꞌ kuéntáꞌ ɨɨn ya̱ jíkó xíniꞌ.)

Nnu̱nasɨ́ ni̱ꞌ nsa̱tíñú ni̱ꞌin ni̱ꞌ ka̱ꞌ nsú káꞌ suviráa.

Nyɨ̱ꞌɨ víꞌí ni̱ꞌ ka̱ꞌ veka̱a nsú káꞌ maáráa.

Ntu ñúkúꞌvá njia̱ꞌa ñɨvɨ nuꞌuꞌ.

Yatin kuviꞌ ni̱ꞌ kue̱ꞌe̱ꞌ íchí.

24Rá ñɨvɨ Israel u̱ꞌu̱nꞌ íchí nxi̱nóꞌo ráa nuꞌuꞌ,

jee ta íchí nchiꞌi ráa o̱ko̱ꞌ xa̱ꞌu̱nꞌ ku̱mi̱ꞌ (39) íchí yoꞌo nuꞌuꞌ.

25U̱ni̱ꞌ íchí nxi̱nóꞌo ñɨvɨ nuꞌuꞌ jee nchiꞌi ráa tu̱xíi nuꞌuꞌ.

Ɨɨn íchí nkuun ñɨvɨ yu̱u̱ꞌ nuꞌuꞌ.

U̱ni̱ꞌ íchí nke̱i rá barkúꞌ ya̱ nñúꞌun ni̱ꞌ.

Ɨɨn nuví ɨɨn niñuꞌ nñu̱ꞌun ni̱ꞌ sava nteñúꞌún.

26Kue̱ꞌe̱ꞌ íchí ña̱ꞌa̱nꞌ ni̱ꞌ kue̱ꞌe̱ꞌ nu̱u̱nꞌ.

Jee ntaꞌanꞌ ni̱ꞌ tu̱nóꞌó nu̱u̱nꞌ rá ntekáꞌnú.

Ntaꞌanꞌ ni̱ꞌ tu̱nóꞌó nu̱u̱nꞌ rá ñɨvɨ kuíꞌná.

Ntaꞌanꞌ ni̱ꞌ tu̱nóꞌó nu̱u̱nꞌ rá ñɨvɨ táꞌán ñuunꞌ ni̱ꞌ.

Ntaꞌanꞌ ni̱ꞌ tu̱nóꞌó nu̱u̱nꞌ rá ñɨvɨ ntu kúvi Israel.

Ntaꞌanꞌ ni̱ꞌ tu̱nóꞌó nu̱u̱nꞌ rá ñuunꞌ.

Ntaꞌanꞌ ni̱ꞌ tu̱nóꞌó nu̱u̱nꞌ ñu̱ꞌún saɨn.

Ntaꞌanꞌ ni̱ꞌ tu̱nóꞌó nu̱u̱nꞌ nteñúꞌún.

Ntaꞌanꞌ ni̱ꞌ tu̱nóꞌó nteñu rá ñɨvɨ ya̱ káchíꞌ nika̱ꞌ ya̱ kúvi ñanitáꞌán‑ó.

27Tiñu yɨ́ɨ́ nsa̱ꞌá ni̱ꞌ, jee nsa̱tíñú ni̱ꞌ ne̱ nkui̱tá ni̱ꞌ.

Kue̱ꞌe̱ꞌ íchí ntu nkíxíꞌ ni̱ꞌ.

Kéꞌín íchí niso̱ko ni̱ꞌ jee nichiꞌ ni̱ꞌ nute.

Kéꞌín íchí nneeꞌ niteꞌ ni̱ꞌ.

Nkuijin ni̱ꞌ jee nkumaniꞌ saꞌma kuꞌun ni̱ꞌ.

28Jee sáá nóꞌo ni̱ꞌ rá tu̱nóꞌó vá, jee ni ki̱vɨ̱ꞌ ne̱ sávéi nuꞌuꞌ nániꞌvɨꞌ iniꞌ ni̱ꞌ jie̱ꞌe̱ꞌ nta̱ká rá grupo ñɨvɨ ya̱ kúneí iniꞌ ráa Jesús. 29Retú táyáꞌ iniꞌ ɨɨn ñɨvɨ, jee ne̱ jíꞌín ni̱ꞌ táyáꞌ iniꞌ ni̱ꞌ jie̱ꞌe̱ꞌ‑e. Jee retú xinínkava ɨɨn ñɨvɨ inka ñɨvɨ nu̱u̱nꞌ kua̱chi, jee káyúꞌ xi̱ni̱ꞌ ni̱ꞌ. 30Jee retú íyó kaꞌanꞌ téyɨ́ɨ́ ni̱ꞌ, jee kaꞌanꞌ téyɨ́ɨ́ ni̱ꞌ ya̱ stúvi‑i ya̱ táyáꞌ iniꞌ ni̱ꞌ. 31Ndiosíꞌ, ya̱ kúvi Tátáꞌ I̱toꞌoꞌ‑ó Jesús, suvire̱ꞌ jíníꞌ va̱ꞌa re̱ꞌ ya̱ ntu kátúꞌún ni̱ꞌ. Jee nakuetúꞌún‑ó re̱ꞌ nɨ́ɨ́nkání. 32Sáá nneeꞌ ni̱ꞌ ñuunꞌ Damasco, jee te̱e nísotíñú nu̱u̱nꞌ ñuunꞌ vá ya̱ yɨ́ꞌɨ́ re̱ꞌ xi̱ntíín Aretas, ya̱ tátúníꞌ‑i rá ñuunꞌ yukuán, jee sáá nééꞌ ni̱ꞌ yukuán, ñani te̱e nísotíñú vá rá te̱e kúmí ñuunꞌ vá, sáva tɨɨn ráa nuꞌuꞌ. 33Soo nki̱vɨ ni̱ꞌ iniꞌ ɨɨn chikívɨ́ꞌ, jee rá ñanitáꞌán‑ó ntavaꞌ ráa nuꞌuꞌ ɨɨn ventana ya̱ta̱ꞌ nu̱u̱nꞌ nsamaꞌ súkún yu̱u̱ꞌ ya̱ násɨ́ꞌ ti̱yu̱ꞌ kua̱íyó ñuunꞌ, jee ni ñúꞌún ni̱ꞌ iniꞌ chikívɨ́ꞌ vá, jee nsi̱kúun ráa nuꞌuꞌ nu̱u̱nꞌ ñu̱ꞌún, saájee nka̱ku ni̱ꞌ nu̱u̱nꞌ re̱ꞌ.

Currently Selected:

2 Corintios 11: meh

Highlight

Copy

Compare