યાકૂબ નો 2

ભેદ-ભાવ નેં વિરુધ સેતવણી

1હે મારં વાલોં, તમું આપડા મહિમાવાન પ્રભુ ઇસુ મસીહ ઇપેર વિશ્વાસ કર્યો હે, એંતરે હારુ તમં મ ભેદ-ભાવ નેં રેંવો જુગે. 2માન લો અગર એક માણસ હુંના ની વીટી અનેં અસલ ન સિસરં પેરેંલો તમારી સભા મ આવે, અનેં એક ગરિબ હુંદો મેલં સિસરં પેરેંલો આવે, 3અનેં તમું હેંના અસલ ન સિસરં વાળા નેં વદાર માન આલેંનેં કો, “તમું તાં અસલ જગ્યા મ બેંહો,” અનેં હેંના ગરિબ નેં કો, “તું આં ઇબો રે,” કે “આં મારં પોગં કન નિસં બેંહ.” 4તે હું તમવેં એંના મ ભેદ-ભાવ નહેં કર્યો, અનેં હું તમું ભુંડા વિસાર થી નિયા કરવા વાળં નહેં થાય? 5હે મારં વાલં ભાજ્યોં અનેં બુંનો, હામળો હું પરમેશ્વરેં ઇની દુન્ય ન ગરિબં નેં નહેં પસંદ કર્ય, કે વિશ્વાસ મ ધનવાન, અનેં હેંના રાજ ન અધિકારી થાએ, ઝેંનો વાએંદો હેંને હેંનં હાતેં કર્યો હે, ઝી હેંનેં ઇપેર પ્રેમ રાખે હે? 6પુંણ તમવેં હેંના ગરિબ નું અપમાન કર્યુ, તમું જાણો હે કે ઇય ધનવાન મનખસ હે, ઝી તમં ઇપેર જુલમ કરે હે, અનેં વેયસ હે ઝી તમનેં જબર જસ્તી થી કસેરજ્ય મ લેં જાએ હે. 7આ વેયસ હે, ઝી ઇસુ મસીહ ના ખાસ નામ ની વિરુધ ભુંડી વાતેં બુંલે હે, ઝેંનનેં હાતેં તમું સબંધ રાખો હે. 8તે હુંદં અગર તમું પવિત્ર શાસ્ત્ર ના એંના વસન પરમણે, કે “તું પુંતાના પાડુસી નેં પુંતાનેં જેંમ પ્રેમ રાખ,” તે હાસેં હાસ હેંના ખાસ નિયમ નેં પૂરુ કરો હે, તે અસલેંસ કરો હે. 9પુંણ અગર તમું પક્ષા-પક્ષી કરો હે, તે પાપ કરો હે, અનેં નિયમ તમનેં ગુંનેગાર બણાવે હે. 10કેંમકે ઝી કુઇ બદ્દા નિયમ નેં પાળે હે, પુંણ અગર એક આજ્ઞા હુદી તુંડે હે, તે વેયુ બદ્દી વાતં મ હુંદું ગુંનેગાર ગણવા મ આવે હે. 11કેંમકે ઝેંને કેંદું, “સિનાળવું નહેં કરો,” હેંને ઇયુ હુંદું કેંદું, “હત્યા નહેં કરો,” એંતરે હારુ અગર તમું સિનાળવું નહેં કરતં, પુંણ હત્યા કરો હે, તે હુંદં તમું નિયમ નેં તુંડવા વાળં ગણાય. 12તમું હેંનં મનખં નેં જેંમ બુંલો અનેં વેવહાર કરો, ઝેંનો નિયા આજાદી ના નિયમ પરમણે કરવા મ આવહે. 13કેંમકે ઝેંને દયા નહેં કરી, હેંનો નિયા હુંદો દયા વગર થાહે, દયા નિયા ઇપેર જીત મેંળવહે.

વિશ્વાસ અનેં કામં

14હે મારં વાલોં, અગર કુઈક કે, કે હૂં પ્રભુ ઇસુ ઇપેર વિશ્વાસ કરું હે, પુંણ ભલાઈ ન કામં નેં કરે, તે હેંનેં થી હું ફાએંદો? હું એંવો વિશ્વાસ કેંરં હેંનું તારણ કરેં સકે હે? 15અગર કુઇ વિશ્વાસી ભાઈ કે બુંન નેં સિસરં ની જરુરત વેહ, અનેં હેંનં કન દર-રુંજ ખાવા હારુ ખાવાનું નેં વેહ, 16અનેં તમં મહં કુઇ હેંનનેં કે, “પરમેશ્વર તમનેં આશિષ આલે, તમું ઉંનં રો અનેં ધાપેંલં રો,” પુંણ ઝી વસ્તુવેં શરીર હારુ જરુરી હે, અગર તમું વેયુ હેંનનેં નેં આલો તે હું ફાએંદો? 17વેમેંસ વિશ્વાસ હુંદો, અગર ભલાઈ ન કામં હાતેં નેં વેહ, તે જીવ વગર નો હે.

18પુંણ કુઇ કેં સકે હે, “તનેં વિશ્વાસ હે, અનેં હૂં ભલાઈ ન કામં કરું હે,” પુંણ હૂં કું હે, તું પુંતાનો વિશ્વાસ મનેં ભલાઈ ન કામં વગર વતાડ, અનેં હૂં પુંતાનો વિશ્વાસ પુંતાનં ભલાઈ ન કામં દુવારા તનેં વતાડેં. 19તનેં વિશ્વાસ હે કે એકેંસ પરમેશ્વર હે, તું તાજું કરે હે, ભૂત હુંદા વિશ્વાસ કરે હે, અનેં બીક થી ફફડે હે. 20પુંણ હે મુરખ માણસ, હું તું ઇયુ હુંદું નહેં જાણતો કે વિશ્વાસ વગર ભલાઈ ન કામં બેકાર હે? 21ઝર આપડા બા ઇબ્રાહેંમેં પુંતાના બેંટા ઇસાગ નેં વેદી ઇપેર સડાયો, તે હું વેયો ભલાઈ ન કામં થી ધર્મી નેં બણ્યો હેંતો? 22તું જાણે હે કે ઇબ્રાહેંમેં નેં ખાલી પરમેશ્વર ઇપેર વિશ્વાસ કર્યો હેંતો, પુંણ હેંને વેયુ હુંદું કર્યુ હેંતું ઝી કઇ પરમેશ્વરેં હેંનેં કેંદું, અનેં હેંનો વિશ્વાસ હેંનં કામં દુવારા પાક્કો થાયો. 23અનેં પવિત્ર શાસ્ત્ર નું ઇયુ વસન પૂરુ થાયુ, “ઇબ્રાહેંમેં પરમેશ્વર ઇપેર વિશ્વાસ કર્યો, અનેં હેંના વિશ્વાસ નેં લેંદે હેંનેં એક ધર્મી માણસ ના રુપ મ ગણવા મ આયો,” અનેં વેયો પરમેશ્વર નો દોસદાર કેંવાયો. 24ઇવી રિતી તમવેં ભાળેં લેંદું કે મનખં ખાલી વિશ્વાસ થકીસ નહેં, પુંણ પુંતાનં કામં દુવારા ધર્મી ગણાએ હે. 25વેમેંસ રાહાબ વેશ્યા હુદી, ઝર હીન્યી ભેદ લેંવા વાળં નેં પુંતાના ઘેર રેંવા હારુ જગ્યા આલી, અનેં હેંનનેં બીજે રસ્તે થી વળાયા, તે વેયે પુંતાનં કામં દુવારા ધર્મી ગણાએં ગઈ. 26ઝેંમ શરીર હાહ વગર મરેંલું હે, વેમેંસ વિશ્વાસ હુંદો ભલાઈ ન કામં વગર મરેંલો હે.

Currently Selected:

યાકૂબ નો 2: GASNT

Highlight

Copy