Lk 3
3
Predikasion Zan Batis
(Mt 3:1-12; Mk 1:1-8; Zn 1:19-28)
1Dan kinziem lane regn Tiber Sezar, letan Pons Pilat ti gouverner Zide, Erod ti sef Galile, so frer Filip ti sef rezion Itire ek Trakonitid, Lizias ti sef Abilenn; 2letan Ann ek Kaif ti gran pret, Zan garson Zakari ti tann parol Bondie dan dezer. 3Zan ti al anons dan tou bann rezion Zourdin enn batem pouki dimoun sanz zot leker, pouki zot pese pardone.
4Kouma finn ekrir dan liv profet Izai,
“Enn lavwa ape kriye dan dezer,
prepar sime Lesegner,
dres so santie drwat.
5Tou vale pou konble,
sak montagn ek kolinn pou aplati,
saki traver pou vinn drwat,
sime kabose pou vinn plat
6ek Bondie pou sov tou dimoun.”
7Alor li ti dir lafoul ki ti vini pou resevwar batem, “Bann espes serpan, kisannla finn montre zot ki zot pou sape devan koler Bondie ki pe aprose? 8Prodwir bon fri ki montre ki zot finn sanz zot leker. Pa nek zis dir dan zotmem, ‘Abraam nou papa!’ Parski les mo dir zot, avek sa bann ros la, Bondie kapav fer bann desandan Abraam leve. 9Asterlamem laserp finn fini pare pou koup bann pie depi zot rasinn. Tou bann pie ki pa raport bon fri pou koupe e pou zet dan dife.”
10Lafoul dimann li, “Ki nou bizin fer alor?” 11Li reponn zot, “Dimoun ki ena de palto bizin partaz ar seki pena, seki ena manze bizin fer parey.”
12Bann komi tax ousi ti vini pou pran batem ek zot dir li, “Met, ki nou bizin fer?” 13Li reponn zot, “Pa pran plis ki zot gagn drwa.” 14Bann solda ousi dimann li, “Be nou, ki nou bizin fer?” Li reponn zot, “Pa kokin personn, pa fer fos akizasion; kontant zot ar zot lapey.”
15Tou dimoun dan lepep ti pe atann kiksoz, ek tou dimoun ti pe poz kestion dan zot leker, sipa Zan mem ki Lemesi. 16Zan reponn zot tou, “Mwa, mo batiz zot ar dilo; me ena enn ki pli for ki mwa ki pe vini; mwa, mo mem pa dign pou larg so lase soulie; li pou batiz zot ar Lespri Sin ek dife. 17Li finn pran lapel dan so lame pou netway anba lor sali; li pou ramas lagrin dible dan so grenie, me li pou bril lapay dan enn dife ki zame pou tegn.”
18Koumsamem e avek lezot parol ankor, Zan ti sakouy zot e li ti pe anons zot Bonn Nouvel. 19Me Zan ti repros Erod, gran sef Galile, parski li ti pran Erodiad, fam so frer, e parski li finn fer boukou move kiksoz ankor; 20pa fini, lor la li finn fer kiksoz pir ankor, li ferm Zan dan prizon.
Batem Zezi
(Mt 3:13-17; Mk 1:9-11)
21Letan tou bann dimoun finn fini pran batem, e ki Zezi ousi finn fini batize, letan li pe priye, 22lesiel ouver, e Lespri Sin desann lor li dan form enn vre kolonb, ek enn lavwa sorti dan lesiel, li dir, “Tomem mo Garson ki mo kontan, to fer mo boner.”
Zenealozi Zezi
(Mt 1:1-17)
23Letan Zezi ti koumans so minister li ti ena ape pre trant-an. Dapre bann dimoun, li 24garson Zozef, ki ti garson Eli, garson Matat, garson Levi, garson Melki, garson Innai, garson Zozef, 25garson Matatias, garson Amos, garson Nahoum, garson Esli, garson Nagai, 26garson Maat, garson Matatias, garson Semein, garson Zozek, garson Yoda, 27garson Yoanan, garson Reza, garson Zeroubabel, garson Sealtiel, garson Neri, 28garson Melki, garson Adi, garson Kosam, garson Elmadan, garson Er, 29garson Zezi, garson Eliezer, garson Yorim, garson Matat, garson Levi, 30garson Simeon, garson Zida, garson Zozef, garson Yonam, garson Eliakim, 31garson Melea, garson Mena, garson Matata, garson Natan, garson David, 32garson Zese, garson Obed, garson Boaz, garson Sala, garson Nason, 33garson Aminadab, garson Admin, garson Arni, garson Esron, garson Perez, garson Zida, 34garson Zakob, garson Izaak, garson Abraam, garson Tara, garson Naor, 35garson Serig, garson Reou, garson Peleg, garson Eber, garson Sela, 36garson Kenan, garson Arfakzad, garson Sem, garson Noe, garson Lamek, 37garson Metousalem, garson Enok, garson Yared, garson Malaleel, garson Kenan, 38garson Enos, garson Set, garson Adam, garson Bondie.
Currently Selected:
Lk 3: NTKM2009
Highlight
Share
Copy
Want to have your highlights saved across all your devices? Sign up or sign in
Mauritian Kreol New Testament © Bible Society of Mauritius, 2009.