Lk 2
2
Nesans Zezi
(Mt 1:18-25)
1Sa lepok la Sezar Ogis donn lord fer resansman tou bann abitan Lanpir Romin. 2Ti fer sa premie resansman la letan Kirinyis ti gouverner provins Lasiri. 3Tou dimoun ti bizin al dan landrwa kot li ti ne, pou inskrir so nom. 4Zozef kit lavil Nazaret, an Galile, pou al Lazide dan lavil Betleem, la kot lerwa David ti ne, parski Zozef ti enn desandan David. 5Li ti al anrezistre so nom ansam ar Marie, so fianse, ki ti ansint.
6Letan zot ti laba, zour nesans tibaba la arive. 7Marie donn nesans enn garson, so premie zanfan e li anvlop li dan lanz e plas li dan enn manzwar, parski pa ti ena plas pou zot dan lasal pou vwayazer.
Bann berze ek bann anz
8Dan sa mem rezion la ti ena bann berze ki ti pe pas lanwit pou vey zot troupo. 9Enn anz Lesegner paret devan zot e laglwar Lesegner anvlop zot ar enn lalimier. Bannla gagn per. 10Me anz la dir zot, “Pa gagn per, mo pe anons zot enn gran nouvel ki pou fer lazwa boukou dimoun: 11zordi dan lavil David, enn Sover, ki Lekris Lesegner, finn ne pou zot. 12Zot pou rekonet li par enn sign, zot pou trouv enn tibaba anvlope dan lanz e li dan enn manzwar.” 13Enn sel kout enn larme bann anz arive pou zwenn ansam ar sa enn anz la, zot loue Bondie e zot dir:
14“Laglwar pou Bondie lao
e lape lor later ar tou seki li kontan.”
Bann berze al Betleem
15Letan bann anz retourn dan lesiel, bann berze dir, “Anou al Betleem pou gete ki finn arive, ki Lesegner finn fer nou kone.” 16Zot degaze ale, e zot trouv Marie, Zozef, e tibaba la ki ti dan manzwar. 17Apre ki bann berze finn trouv li, zot rakont seki anz ti dir zot lor zanfan la. 18E tou seki ti ekout zot koze ti etone ar zot dialog. 19Me Marie ti gard tou sa bann kiksoz la dan so leker. 20Lerla bann berze retourne; zot glorifie ek loue Bondie pou tou seki zot finn tande ek trouve parey kouma ti dir zot.
Zezi gagn so nom
21Apre wit zour, letan pou sirkonsir li, zot ti apel li Zezi, sa nom lamem ki anz ti done, avan ki Marie ti ansint.
Prezantasion Zezi dan tanp
22Letan ariv ler pou Marie ek Zozef pirifie zotmem dapre lalwa Moiz, zot al Zerizalem pou prezant Zezi devan Lesegner, 23parey kouma ekrir dan lalwa Lesegner: “Bizin konsakre sak garson premie-ne pou Lesegner.” 24Zot ti osi al ofer enn sakrifis kouma lalwa dimande: “Enn per tourtrel ou de ti pizon.”
25Dan Zerizalem ti ena enn dimoun apel Simeon. Li ti viv enn lavi bien drwat, li ti devoue pou Bondie e li ti pe atann seki pou vinn sov Izrael. Lespri Sin ti ar li. 26Lespri ti revel li ki li pa pou mor avan ki li trouv Lekris avoye par Lesegner. 27Simeon ti inspire par Lespri Sin pou vinn dan Tanp. Bann paran Zezi ti amenn zot zanfan pouki zot akonplir seki lalwa dimande. 28Simeon pran li dan so lebra e remersie Bondie, li dir,
29“Asterla, Segner, les to serviter ale dan lape kouma to ti dir.
30Mo lizie finn trouv to delivrans,
31Seki to finn prepare devan tou bann lepep;
32Enn lalimier ki amenn revelasion ar bann payin
e laglwar pou to lepep Izrael.”
Profesi Simeon
33So papa ek so mama ti etone ar tou seki ti dir lor li. 34Simeon beni zot, e li dir Marie, mama Zezi, “Sa garson la pou abes ouswa pou relev boukou dan Izrael, li enn sign Bondie, ki ena dimoun pou konteste. 35Bann panse ki kasiet dan leker boukou dimoun pou sorti okler, e tomem, enn lepe pou transpers to lam.”
36Ti ena enn profetes osi, ki ti apel Ana, tifi Faniel, ki apartenir tribi Aser. Li ti bien vie, e ti viv set-an ar so mari. 37Apre sa li finn res vev ziska laz katrovin-kat-ran. Li pa ti kit tanp, me ti servi Bondie lanwit-lizour; li ti fer karem ek lapriyer. 38Li ti vinn dan tanp zis sa moman la e ti rann gras Bondie. Li ti koz sa zanfan la ar tou bann dimoun ki pe atann ki Bondie delivre Zerizalem.
Bann paran Zezi retourn Nazaret
39Letan zot fini fer tou seki lalwa Lesegner dimande, zot retourn Galile, dan zot prop lavil Nazaret. 40Zanfan la ti grandi e ti vinn for. Li ti ranpli ar sazes e lagras Bondie.
Zezi dan tanp letan li ti ena douz-an
41Toulezan bann paran Zezi al Zerizalem pou fet Pak. 42Letan li ti ena douz-an zot ti al laba kouma zot abitie fer. 43Me letan fet fini, e zot retourne, garson la res Zerizalem, san ki so bann paran kone. 44Zot ti krwar li ansam dan group ki ti pe vwayaze, alor zot finn vwayaz toutenn zourne, lerla ki zot koumans rod li parmi bann fami e kamarad. 45Me letan zot pa trouv li zot retourn Zerizalem pou rod li. 46Apre trwa zour zot retrouv li dan tanp, pe asize parmi bann ki ansegn lalwa, li pe ekout zot e li pe poz zot kestion. 47Tou seki ti tann li ti etone ar so lintelizans e so repons. 48So bann paran ti etone letan zot trouv li, e so mama dir li, “Mo garson, kifer to fer sa ar nou? To papa ek momem nou finn gagn traka ar rod twa.” 49Li dir zot, “Kifer zot ti bizin rod mwa? Zot pa kone ki mo bizin dan lakaz mo Papa?” 50Zot pa ti konpran so repons.
51Zezi retourn Nazaret ar so bann paran. Li ti kontign obeir zot; e so mama ti gard tousala dan so leker. 52Zezi ti grandi dan sazes, ti grandi fizikman, e li ti trouv lagras devan Bondie e devan dimoun.
Currently Selected:
Lk 2: NTKM2009
Highlight
Share
Copy
Want to have your highlights saved across all your devices? Sign up or sign in
Mauritian Kreol New Testament © Bible Society of Mauritius, 2009.