Mark 2
2
1Intyugu sinyèwo pyagaṉa pa, Yesu aṽyeṉi gô Kapèrnaum. N’ayogaṉô inè: are gô nagô, 2n’aṽengaṉi aṉag’awenge, yeṉo e re pegege mbôra gôre waô vangaṉe g’ômpômbala. N’agambiṉi yè waô igamba.
3Aṽyeṉi aṉaga gôre yè, mbagag’ôma wi jogo awogo gôre yè, twaṉô pa n’aṉag’anay. 4Na gw’arweṉi waô wi pa jolya gô sèvya pyèrè gôre yè, g’ômwanja w’ibuṉa s’aṉaga, w’azazi ômwanjamwanja wi nagô gô mbôra y’avegagi yè, n’azônyi waô ôdô w’avegôgô ôma re juwa p’awogo dèwa pa gw’ivôgô mènyoṉo ny’azazyô waô. 5Gw’ayeṉi Yesu ibekelyi saô, awuliny’ôma re juwa p’awogo inè: ’Mwam̃, ibe so s’anyezyô. 6Vovo avegag’irèndisi imyèwo baru ge baru, n’avikilyagi waô gw’irèm̃i yaô inè: 7Ôma wiṉo e kamba yeṉo sèṉi? E pèdy’Anyambyè. Mande re ko jolye nyez’ibe kaô Anyambyè dadyè? 8N’amyeṉi Yesu pelè g’ôrèm̃i wè nt’avikilyagi waô gw’irèm̃i yaô, n’awulinyi yè waô inè: Ntiṉa nde yi pikilya ṉwè isam̃u yiṉo gw’irèm̃i yaṉi? 9Ezom̃a nde zi re dèla gô buliny’ôma re juwa p’awogo inè: Ibe so s’anyezyô, mbè gô bulya inè: Ṉongwa, wong’ôdô wo, ko kèndaga? 10Ndô gôre ṉwè gô mya inè, Ômwaṉa w’ôma are ni ngulu gô ntye yiṉo gô nyez’ibe, abulinyè ôma re juwa p’awogo inè: 11Mi sômbyo inè: Ṉongwa, wong’ôdô wo, ko kèndaga gô nagô yo. 12N’aṉongwi yè pelè, awong’ôdô wè, agogwa gw’azô m’aṉaga waôdu, n’am̃ami waô pôlô, azum̃iny’Anyambyè, awulya inè: Azwè pa jeṉa yeṉo ni mori.
13Arô kogwi Yesu agènda g’ôzamba w’eliṽa. N’aṽyeṉi anaga waôdu gôre yè, n’aṉènji yè waô. 14Na gw’avyagaṉi yè, ayeṉi yè Levi, y’ômwaṉa w’Alifas, dwaṉa pa baru gô nagô yi bongô mpagô. N’awulinyè yè inè: Zônga myè. N’agum̃aṉi Levi, azôngè.
15Arweṉi gw’avegagi Yesu dwaṉa pa baru gw’inya gô nagô yi Levi, ipublikan inyenge n’aṉag’aṽe w’alwaṉi kè baru ni Yesu n’iṉèngi yè gw’inya; konde w’avegagi awenge, n’azôngi waô yè. 16Irèndisi n’ifarisi gw’ayeṉi waô yè e nya n’ipublikan n’aṉag’aṽe, w’awuliny’iṉèngi yè inè: Ntiṉa nde yi nyè ayonga n’ipublikan n’aṉag’aṽe? 17Gw’ayogyô Yesu igamba nyiṉo awulinyi waô inè: Waô wi re mbyambye wi zele n’isolo ny’ôganga, ndô kaô waô wi re n’inkaṉi. Mi re bye gô fwey’aṉag’aṽya, ndô aṉag’aṽe.
18Iṉèngi yi Yôan n’ifarisi w’avengagi esônge. N’aṽyeṉi waô gô bulinye Yesu inè: Ntiṉa nde yi peng’iṉèngi yi Yôan na y’ifarisi esônge, ndô iṉèngi yo yi pa penga du esônge? 19N’awiṉizô waô ne Yesu inè: Indegô s’ôṉôm̃e wi jômba sô ko jolya gô peng’esônge gô p’ar’ôṉôm̃e wi jômba na waô? Ôlingô wi re waô n’ôṉôm̃e wi jômba w’ayolye peng’esônge. 20Ndô intyugu si be bya si be bongiṉô waô ôṉôm̃e wi jômba, gambèṉè wi be peng’esônge gô ntyugu mèyoṉo. 21E zel’ôma wi tum̃’engala z’ôṉamb’ômwoṉa gô ngoy nungu; konde erèndè z’ôṉamb’ômwoṉa zi susum̃’ôṉamb’ôlungu, ko ijôkwa penda. 22E zele kè ôma wi jir’iv’inyoṉa gw’imbute inungu si banda; konde ivè nyi jôṉ’imbute si banda, ko ivè n’imbute bundakaṉa; ndô iv’inyoṉa nyi ga yirô gw’imbute inyoṉa si banda.
23Arweṉi nè, Yesu avyagaṉi gw’intyaga s’ibile, gô ntyugu yi soṉo. Gw’agèndag’iṉèngi yè w’avakilyi gô dul’ibile. 24N’awulinyô yè n’ifarisi inè: Vôna, ntiṉa nde yi denda waô ndaga yi re yi zele kwèkwè gô dendô gô ntyugu yi soṉo? 25N’awiṉizô waô ne Yesu inè: Aṉwè pa tanguṉa ni mori ga nt’alendi David gw’ayeli yè, ayogo njaṉa, ayè na waô w’avegagi na yè; 26nt’ayingiṉi yè gô nagô y’Anyambyè, gw’egômbe z’Abyatar, yi miṉisè mpôlô, anye mpèmba yi dôṽyô g’ôzô w’Anyambyè, yi re yi zele kwèkwè gô nyô kaô imiṉisè, ava kè waô w’avegagi na yè? 27N’awulinyi yè waô inè: Soṉo y’avangyô g’ômwanja w’aṉaga, arang’aṉaga w’avangyô g’ômwanja wi soṉo. 28Yeṉo kè Ômwaṉa w’ôma ayè aṉivi ôwenja wi soṉo.
Currently Selected:
Mark 2: MYE
Highlight
Share
Copy
Want to have your highlights saved across all your devices? Sign up or sign in
Published by the British and Foreign Bible Society in 1927.
Mark 2
2
1Intyugu sinyèwo pyagaṉa pa, Yesu aṽyeṉi gô Kapèrnaum. N’ayogaṉô inè: are gô nagô, 2n’aṽengaṉi aṉag’awenge, yeṉo e re pegege mbôra gôre waô vangaṉe g’ômpômbala. N’agambiṉi yè waô igamba.
3Aṽyeṉi aṉaga gôre yè, mbagag’ôma wi jogo awogo gôre yè, twaṉô pa n’aṉag’anay. 4Na gw’arweṉi waô wi pa jolya gô sèvya pyèrè gôre yè, g’ômwanja w’ibuṉa s’aṉaga, w’azazi ômwanjamwanja wi nagô gô mbôra y’avegagi yè, n’azônyi waô ôdô w’avegôgô ôma re juwa p’awogo dèwa pa gw’ivôgô mènyoṉo ny’azazyô waô. 5Gw’ayeṉi Yesu ibekelyi saô, awuliny’ôma re juwa p’awogo inè: ’Mwam̃, ibe so s’anyezyô. 6Vovo avegag’irèndisi imyèwo baru ge baru, n’avikilyagi waô gw’irèm̃i yaô inè: 7Ôma wiṉo e kamba yeṉo sèṉi? E pèdy’Anyambyè. Mande re ko jolye nyez’ibe kaô Anyambyè dadyè? 8N’amyeṉi Yesu pelè g’ôrèm̃i wè nt’avikilyagi waô gw’irèm̃i yaô, n’awulinyi yè waô inè: Ntiṉa nde yi pikilya ṉwè isam̃u yiṉo gw’irèm̃i yaṉi? 9Ezom̃a nde zi re dèla gô buliny’ôma re juwa p’awogo inè: Ibe so s’anyezyô, mbè gô bulya inè: Ṉongwa, wong’ôdô wo, ko kèndaga? 10Ndô gôre ṉwè gô mya inè, Ômwaṉa w’ôma are ni ngulu gô ntye yiṉo gô nyez’ibe, abulinyè ôma re juwa p’awogo inè: 11Mi sômbyo inè: Ṉongwa, wong’ôdô wo, ko kèndaga gô nagô yo. 12N’aṉongwi yè pelè, awong’ôdô wè, agogwa gw’azô m’aṉaga waôdu, n’am̃ami waô pôlô, azum̃iny’Anyambyè, awulya inè: Azwè pa jeṉa yeṉo ni mori.
13Arô kogwi Yesu agènda g’ôzamba w’eliṽa. N’aṽyeṉi anaga waôdu gôre yè, n’aṉènji yè waô. 14Na gw’avyagaṉi yè, ayeṉi yè Levi, y’ômwaṉa w’Alifas, dwaṉa pa baru gô nagô yi bongô mpagô. N’awulinyè yè inè: Zônga myè. N’agum̃aṉi Levi, azôngè.
15Arweṉi gw’avegagi Yesu dwaṉa pa baru gw’inya gô nagô yi Levi, ipublikan inyenge n’aṉag’aṽe w’alwaṉi kè baru ni Yesu n’iṉèngi yè gw’inya; konde w’avegagi awenge, n’azôngi waô yè. 16Irèndisi n’ifarisi gw’ayeṉi waô yè e nya n’ipublikan n’aṉag’aṽe, w’awuliny’iṉèngi yè inè: Ntiṉa nde yi nyè ayonga n’ipublikan n’aṉag’aṽe? 17Gw’ayogyô Yesu igamba nyiṉo awulinyi waô inè: Waô wi re mbyambye wi zele n’isolo ny’ôganga, ndô kaô waô wi re n’inkaṉi. Mi re bye gô fwey’aṉag’aṽya, ndô aṉag’aṽe.
18Iṉèngi yi Yôan n’ifarisi w’avengagi esônge. N’aṽyeṉi waô gô bulinye Yesu inè: Ntiṉa nde yi peng’iṉèngi yi Yôan na y’ifarisi esônge, ndô iṉèngi yo yi pa penga du esônge? 19N’awiṉizô waô ne Yesu inè: Indegô s’ôṉôm̃e wi jômba sô ko jolya gô peng’esônge gô p’ar’ôṉôm̃e wi jômba na waô? Ôlingô wi re waô n’ôṉôm̃e wi jômba w’ayolye peng’esônge. 20Ndô intyugu si be bya si be bongiṉô waô ôṉôm̃e wi jômba, gambèṉè wi be peng’esônge gô ntyugu mèyoṉo. 21E zel’ôma wi tum̃’engala z’ôṉamb’ômwoṉa gô ngoy nungu; konde erèndè z’ôṉamb’ômwoṉa zi susum̃’ôṉamb’ôlungu, ko ijôkwa penda. 22E zele kè ôma wi jir’iv’inyoṉa gw’imbute inungu si banda; konde ivè nyi jôṉ’imbute si banda, ko ivè n’imbute bundakaṉa; ndô iv’inyoṉa nyi ga yirô gw’imbute inyoṉa si banda.
23Arweṉi nè, Yesu avyagaṉi gw’intyaga s’ibile, gô ntyugu yi soṉo. Gw’agèndag’iṉèngi yè w’avakilyi gô dul’ibile. 24N’awulinyô yè n’ifarisi inè: Vôna, ntiṉa nde yi denda waô ndaga yi re yi zele kwèkwè gô dendô gô ntyugu yi soṉo? 25N’awiṉizô waô ne Yesu inè: Aṉwè pa tanguṉa ni mori ga nt’alendi David gw’ayeli yè, ayogo njaṉa, ayè na waô w’avegagi na yè; 26nt’ayingiṉi yè gô nagô y’Anyambyè, gw’egômbe z’Abyatar, yi miṉisè mpôlô, anye mpèmba yi dôṽyô g’ôzô w’Anyambyè, yi re yi zele kwèkwè gô nyô kaô imiṉisè, ava kè waô w’avegagi na yè? 27N’awulinyi yè waô inè: Soṉo y’avangyô g’ômwanja w’aṉaga, arang’aṉaga w’avangyô g’ômwanja wi soṉo. 28Yeṉo kè Ômwaṉa w’ôma ayè aṉivi ôwenja wi soṉo.
Currently Selected:
:
Highlight
Share
Copy
Want to have your highlights saved across all your devices? Sign up or sign in
Published by the British and Foreign Bible Society in 1927.