Matay 26
26
1Arweṉi gw’am̃azi Yesu agamba miṉo môdu, awulinyi yè iṉèngi yè inè: 2Aṉw’avôrô inè, ntyugu mbaṉi vyagaṉô, gambèṉè Paki y’adwaṉa, n’Ômwaṉa w’ôma e be piṉô gô banyô gô krosi.
3Vovo alataṉ’ imiṉisè impôlô n’aṉèro w’aṉaga, gw’ evungu zi miṉisè mpôlô, y’aweyôgô inè, Kayifa; 4n’awôndi waô môndo gô kôte Yesu n’avôṉô gô jôṉè. 5Ndô w’awulyi nè: Aranga gw’egômbe zi fèti, aṉaga wi vende kwez’edungu.
6Gw’avegagi Yesu gô Betani, gô nagô yi Simôn y’avegagi ni nkaṉi ya gelô, 7aṽyeṉ’ômwantô gôre yè, n’eva z’agali mi nkangô m’avegagi ni njôni mpôlô; na gw’avegagi Yesu gô tavulu y’inya, ômwantô ayiri mô gw’ ewônjô zè. 8Ndô gw’ayeṉ’iṉèngi igamba mè, w’aṽendi awulya inè: Mbundakaṉi yiṉo yi re ntiṉa nde? 9Konde agali miṉo m’arô kôlyô n’igumb’inyenge, ko nyô pô gôr’ikuge. 10Ndô gw’amyeṉi Yesu, awulinyi waô inè: Ntiṉa nde yi jeṉiza ṉwè ômwantô wiṉo ekèṽa? Are denda p’ igamb’iṽya gôre myè; 11konde aṉw’are n’ikuge egômbe zôdu, ndô myè zele na ṉwè egômbe zôdu. 12Gw’ajirè agali miṉo g’ôkuṽi wam̃, are denda pa yeṉo gw’ibèṉô sam̃. 13Rèti mi bulinya ṉwè inè, mbôry’edu yi be kambiṉô ntyangô mbya yiṉo, gô ntye yôdu, igamba nyiṉo kè nyi be takilyô gô jônginy’ ômwantô wiṉo ga nt’are yè denda pa.
14Egômbe mè ôm̃ori w’igôm̃i n’aṽaṉi, aweyôgô inè, Yudas Iskaryot, agèndi gôr’imiṉisè impôlô awulya inè: 15Aṉwè be pa myè sè, ko mi nozè gôre ṉwè? N’aveṉi waô yè agôm̃i m’idolè s’imyanga ararô. 16N’avila gw’egômbe mè, Yudas awutag’egômb’eṽya gô kôtize Yesu.
17Gô ntyugu nônga yi mpèmba yi re levèn fo, aṽyeṉ’iṉèngi gôre Yesu, awulya inè: Ô bela zwè gô kekiza gôre wè gô nye Paki na gweṉi? 18N’awiṉizi yè inè: Gèndaṉi gô nkala gôre rekadyè, ko bulinyaṉi yè inè: Rerè e bulya inè: Egômbe zam̃ z’atweṉi pyèrè, mi be pange Paki n’iṉèngi yam̃ gô nagô yo. 19N’alend’ iṉèngi ga nt’azômbyô waô ne Yesu, n’agekizi waô Paki.
20Nkôlô alwaṉi yè gw’inya ayè n’igôm̃i ny’iṉèngi n’iṉèngi mbaṉi. 21Gw’anyeṉagi waô, awulyi nè: Rèti mi bulinya ṉwè inè, ôm̃ori gôre ṉwè e be kôtiza myè. 22N’ayeṉi waô ekèṽ’evôlô, n’avakilyi ôm’edu gô bulinyè inè: Myè Rera? 23N’awiṉizi yè inè: Ayè y’aduṽy’ôgo na myè gô ntyèngè, ayè mèmô be kôtiza myè. 24Ômwaṉa w’ôma e kènda ga nt’are tèndô pa g’ômwanji wè. Ndô azile gôr’ôma mè e kôtiz’Ômwaṉa w’ôma! Arô dwaṉi mbya gôr’ôma mè inè, e pa jaṉô. 25Awiṉizi Yudas y’agôtizè inè: Myè, Rera? Awiṉizyô yè ne Yesu inè: Èñ, nt’abulyo.
26Gw’anyeṉagi waô, Yesu awongi mpèmba, n’ayè pa p’akeṽa, am̃oguṉi yô, ava yô gôr’iṉèngi, awulya inè: Wongaṉi ko nyaṉi, wiṉo n’ôkuṽi wam̃. 27N’awongi yè imogi, n’ayè pa p’akeṽa, aveṉi nyô gôre waô, awulya inè: Yongaṉi gô nyô, aṉwèdu; 28konde nyiṉo ne ntyiṉi yam̃, ntyiṉa yi njeka, yi pôvizô g’ômwanja w’awenge, gw’inyeza s’ibe. 29Mi bulinya ṉwè inè, my’ayonge nyèṉè ilônda yiṉo y’ôgoli, kaô gô ntyugu mè yi be jonga myè yô imyoṉa na ṉwè gw’iṉongo nya Reri yam̃.
30Waô jemba p’ôwembô w’agogwi agènda gô nômba yi yôlivi.
31Vovo awulinyô waô ne Yesu inè: Aṉwè du aṉwè be sogizô g’ômwanji wam̃ ôgwèra wiṉo; konde re tèndô pa inè: Mi be bôl’ôvenjavenji w’dombè, ko adombè m’ôlemba pazangaṉô. 32Ndô myè tôngwa pa, mi be kènda gô bôsô yaṉi gô Galile. 33N’awiṉizi Pyère awulinyè inè: Ja waôdu w’asogizô g’ômwanji wo, my’azogizô du. 34Awulinyô yè ne Yesu inè: Rèti, mi bulinyo inè: Ôgwèra wiṉo, njogoṉi gôgaga ro, ô be danda myè nyongo ntyarô. 35Pyère awulinyi yè inè: Vangane my’ajuwa na wè, my’alande wè. Yeṉo kè awuly’iṉèngi yôdu.
36Vovo aṽyeṉi Yesu na waô gô mbôra yi fweyô inè, Gètsemane, n’awulinyi yè iṉèngi yè inè: Lwaṉaṉi baru vèṉo gô be kènda myè gô kambiṉa. 37N’awongi yè Pyère n’awaṉ’aṽaṉi wi Zebeday, avakilya gô jeṉ’ekèṽa n’añandi. 38Vovo awulinyi yè waô inè: Iṉiṉi nyam̃ nyi jeṉ’ ekèṽ’evôlô kwanga gô juwa; rigaṉaṉi vèṉo, ko bèmbagaṉi na myè. 39N’agèndi yè gô bôsô kwè, avôsuny’ôzô wè gô ntye, agambiṉa inè: Reri yam̃, ja ny’ajolyô, imogi nyiṉo nyi ga vyagaṉe avila gôre myè. Ndô arange nte bela myè, ndô nte belo. 40N’aṽyeṉi yè gôr’iṉèngi, aliṽinya waô gw’antyôviṉô, n’awulinyi yè Pyère inè: Sambô, aṉw’ayolye bèmbe na myè igwèr’im̃ori? 41Ṽèmbagaṉi ko kambiṉaṉi, ko ṉw’agweṉa gw’isoryô; iṉiṉa nyi re keka pa, ndô ôzôṉe wi re dèla. 42N’arô kèndi yè nyongo yi mbaṉi, agambiṉa inè: Reri yam̃, j’imogi nyiṉo ny’ayolye pyagaṉe, kaô my’ajonga nyô, ntondiṉi yo yi ga lendô! 43N’arô byeṉi yè, aliṽinya waô gw’antyôviṉô, konde antyo maô m’avegagi dira. 44N’arigi yè waô, arô kènda, agambiṉe nyongo yi ntyarô, nkambag’agamba mèmô. 45Vovo aṽyeṉi yè gôr’iṉèngi yè, awulinya waô inè: Aṉwè dèwa vèṉo, ayowa! Vônaṉi, igwèra ny’atweṉi, n’Ômwaṉa w’ôma aṉozyô gw’ago m’aṉag’aṽe. 46Gum̃aṉaṉi, gèndôṉi; vônaṉi, ayè yi kôtiza myè atweṉi pyèrè.
47Gw’agambagi yè, vôna, Yudas, ôm̃ori w’igôm̃i n’aṽaṉi, aṽyeṉi n’aṉag’awenge na yè n’ikwara ni viso, avila gôr’imiṉisè impôlô n’aṉèro w’aṉaga. 48N’ayè y’agôtizi yè aliwô apeṉi waô elingilyô inè: Ayè yi be sombô myè, ne yè; gôtaṉi yè ngwasi. 49N’aṽyeṉi yè pelè gôre Yesu, awulinyè inè: Mbôlô, Rera! N’azombyè yè. 50N’awulinyô yè ne Yesu inè: Ndeg’wam̃! ntiṉa nde y’abyo vèṉo? Vovo aṽyeṉi aṉaga mèwoṉo, araly’ago gôre Yesu, agôtè.
51Na vôna, ôm̃ori avila gôre waô w’avegagi ni Yesu, alam̃iṉ’ôgo wè, agoguny’ôkwari wè; n’agwèri yè nyôngô yi miṉisè mpôlô, areṉ’ôrôy wè nkwe. 52Vovo awulinyô yè ne Yesu inè: Wiz’ôkwari wo gw’egôrô; konde waôdu wi kôt’ôkwara wi be jôṉô n’ôkwara. 53Ô pikilya nè, my’ayolye bambye Reri yam̃, ko yè pe myè gôtèvèṉo vyagaṉô n’igôm̃i ny’inkumba ni nkumba mbaṉi s’iyenjèl? 54Ndô irèndo yô ko twa rèti sè inè, ga lwaṉe yeṉo?
55Gw’egômbe mèzoṉo, Yesu awulinyi aṉaga inè: Aṉw’abya n’ikwara n’iviso gô kôta myè egolaṉi gôr’ekuya. Ntyugw’edu my’avegagi dwaṉa pa baru na ṉwè, nènjaga gô nagô y’Anyambyè, ko ṉw’agôta myè. 56Ndô isam̃u yiṉo yôdu yi twa inè, irèndo y’ivogisi yi ga rwe rèti.
Vovo iṉèngi yôdu y’arigi yè, awanga.
57Waô w’agôti Yesu w’aviṉi yè gôre Kayifa, yi miṉisè mpôlô, mbôra y’avegag’irèndisi n’aṉèro dataṉa pa. 58Ndô Pyère azôngi yè davadavye kwanga gw’evungu zi nagô yi miṉisè mpôlô, n’ayingiṉi yè gôgô, alwaṉa baru na mongi w’agôti Yesu gô jeṉa nte be twa.
59Imiṉisè impôlô n’ôvagô wôdu w’awutag’iyeṉi y’inôka yi sire Yesu, gô jôṉè. 60Ndô vangaṉe gw’aṽyeṉ’iyeṉ’imyenge y’inôka, wi re dènge. 61Avila vovo aṽyeṉ’iyeṉi y’inôka imbaṉi, awulya inè: Ôma wiṉo awulyi nè, myè ko saze nagô y’Anyambyè, arô nôga yô ni ntyugu ntyarô. 62N’agum̃aṉi miṉisè mpôlô awulinyè inè: Ô re fwiṉiz’igamba gw’isam̃u yiṉo yi takilyô ne mongi siṉo g’ômwanji wo sè? 63Ndô Yesu alwaṉi dodo. N’awulinyô yè ne miṉisè mpôlô inè: Mi sômbyo, gw’ina ny’Anyambyè ya bo, inè, wulinya zwè j’awè ne Krist, y’Ômwaṉa w’Anyambyè. 64Yesu awulinyi yè inè: Èñ, nte bulyo. Ndô mi bulinya ṉwè kè inè: Avila vèṉo aṉwè be jeṉ’Ômwaṉa w’ôma baru g’ôgo ôṉôm̃yè w’Anyambyè yi ngulu; aṉwè be jeṉè kè e bya gô vindi y’ôrôṽa. 65Vovo ayôkuṉi miṉisè mpôlô ingoy sè, awulya inè: Are pèdya p’Anyambyè! Azw’are n’isolo nde ny’iyeṉi? Vônaṉi vèṉo, aṉw’ajogyô ipèdya si pèdyô Anyambyè. 66Aṉwè tanga sè? Awiṉizi waô inè: Are n’inyanga nyi juwa. 67Vovo arônyi waô yè igwaṉa g’ôzô, awôlè, n’am̃ori w’awôli yè asapôga, awulya inè: 68Krist, voga; abôlo mande?
69Alwaṉi Pyère gw’igala gw’evungu. N’aṽyeṉi nyôngô nyantô, y’ayandam̃iṉag’iguge, gôre yè, awulya inè: Awè kè w’avegagi ni Yesu ya mwô’Galile. 70Ndô alandi gw’azô m’aṉaga waôdu, awulya inè: My’amye nt’akambo. 71Na gw’agogwi yè g’ômpômbala, ayenyô ne nyôngô nyantô nyèṉè, n’awulinyi yè waô w’avegagi vovo inè: Ôma wiṉo kè avegagi ni Yesu yi Nazarèt. 72N’arô dandi yè n’ôrangô inè: Mi pa my’ôma mèwoṉo. 73Mw’ôlingô vyagaṉô, waô w’avegagi gôre w’aṽyeṉi, awulinye Pyère inè: Rèti giligili awè kè ôm̃ori gôre waô, konde nkambiṉi yo yi pango myô. 74Vovo avakilyi yè gô tang’irangô nè: Mi pa my’ôma mèwoṉo. N’agôgi njogoṉi pelè. 75N’ayônginyi Pyère igamba ny’awulinyô yè ne Yesu inè: Njogoṉi gôgaga ro, ô be danda myè nyongo ntyarô. N’agogwi yè gw’igala aleṉa n’ekèṽ’evôlômè.
Currently Selected:
Matay 26: MYE
Highlight
Share
Copy
Want to have your highlights saved across all your devices? Sign up or sign in
Published by the British and Foreign Bible Society in 1927.
Matay 26
26
1Arweṉi gw’am̃azi Yesu agamba miṉo môdu, awulinyi yè iṉèngi yè inè: 2Aṉw’avôrô inè, ntyugu mbaṉi vyagaṉô, gambèṉè Paki y’adwaṉa, n’Ômwaṉa w’ôma e be piṉô gô banyô gô krosi.
3Vovo alataṉ’ imiṉisè impôlô n’aṉèro w’aṉaga, gw’ evungu zi miṉisè mpôlô, y’aweyôgô inè, Kayifa; 4n’awôndi waô môndo gô kôte Yesu n’avôṉô gô jôṉè. 5Ndô w’awulyi nè: Aranga gw’egômbe zi fèti, aṉaga wi vende kwez’edungu.
6Gw’avegagi Yesu gô Betani, gô nagô yi Simôn y’avegagi ni nkaṉi ya gelô, 7aṽyeṉ’ômwantô gôre yè, n’eva z’agali mi nkangô m’avegagi ni njôni mpôlô; na gw’avegagi Yesu gô tavulu y’inya, ômwantô ayiri mô gw’ ewônjô zè. 8Ndô gw’ayeṉ’iṉèngi igamba mè, w’aṽendi awulya inè: Mbundakaṉi yiṉo yi re ntiṉa nde? 9Konde agali miṉo m’arô kôlyô n’igumb’inyenge, ko nyô pô gôr’ikuge. 10Ndô gw’amyeṉi Yesu, awulinyi waô inè: Ntiṉa nde yi jeṉiza ṉwè ômwantô wiṉo ekèṽa? Are denda p’ igamb’iṽya gôre myè; 11konde aṉw’are n’ikuge egômbe zôdu, ndô myè zele na ṉwè egômbe zôdu. 12Gw’ajirè agali miṉo g’ôkuṽi wam̃, are denda pa yeṉo gw’ibèṉô sam̃. 13Rèti mi bulinya ṉwè inè, mbôry’edu yi be kambiṉô ntyangô mbya yiṉo, gô ntye yôdu, igamba nyiṉo kè nyi be takilyô gô jônginy’ ômwantô wiṉo ga nt’are yè denda pa.
14Egômbe mè ôm̃ori w’igôm̃i n’aṽaṉi, aweyôgô inè, Yudas Iskaryot, agèndi gôr’imiṉisè impôlô awulya inè: 15Aṉwè be pa myè sè, ko mi nozè gôre ṉwè? N’aveṉi waô yè agôm̃i m’idolè s’imyanga ararô. 16N’avila gw’egômbe mè, Yudas awutag’egômb’eṽya gô kôtize Yesu.
17Gô ntyugu nônga yi mpèmba yi re levèn fo, aṽyeṉ’iṉèngi gôre Yesu, awulya inè: Ô bela zwè gô kekiza gôre wè gô nye Paki na gweṉi? 18N’awiṉizi yè inè: Gèndaṉi gô nkala gôre rekadyè, ko bulinyaṉi yè inè: Rerè e bulya inè: Egômbe zam̃ z’atweṉi pyèrè, mi be pange Paki n’iṉèngi yam̃ gô nagô yo. 19N’alend’ iṉèngi ga nt’azômbyô waô ne Yesu, n’agekizi waô Paki.
20Nkôlô alwaṉi yè gw’inya ayè n’igôm̃i ny’iṉèngi n’iṉèngi mbaṉi. 21Gw’anyeṉagi waô, awulyi nè: Rèti mi bulinya ṉwè inè, ôm̃ori gôre ṉwè e be kôtiza myè. 22N’ayeṉi waô ekèṽ’evôlô, n’avakilyi ôm’edu gô bulinyè inè: Myè Rera? 23N’awiṉizi yè inè: Ayè y’aduṽy’ôgo na myè gô ntyèngè, ayè mèmô be kôtiza myè. 24Ômwaṉa w’ôma e kènda ga nt’are tèndô pa g’ômwanji wè. Ndô azile gôr’ôma mè e kôtiz’Ômwaṉa w’ôma! Arô dwaṉi mbya gôr’ôma mè inè, e pa jaṉô. 25Awiṉizi Yudas y’agôtizè inè: Myè, Rera? Awiṉizyô yè ne Yesu inè: Èñ, nt’abulyo.
26Gw’anyeṉagi waô, Yesu awongi mpèmba, n’ayè pa p’akeṽa, am̃oguṉi yô, ava yô gôr’iṉèngi, awulya inè: Wongaṉi ko nyaṉi, wiṉo n’ôkuṽi wam̃. 27N’awongi yè imogi, n’ayè pa p’akeṽa, aveṉi nyô gôre waô, awulya inè: Yongaṉi gô nyô, aṉwèdu; 28konde nyiṉo ne ntyiṉi yam̃, ntyiṉa yi njeka, yi pôvizô g’ômwanja w’awenge, gw’inyeza s’ibe. 29Mi bulinya ṉwè inè, my’ayonge nyèṉè ilônda yiṉo y’ôgoli, kaô gô ntyugu mè yi be jonga myè yô imyoṉa na ṉwè gw’iṉongo nya Reri yam̃.
30Waô jemba p’ôwembô w’agogwi agènda gô nômba yi yôlivi.
31Vovo awulinyô waô ne Yesu inè: Aṉwè du aṉwè be sogizô g’ômwanji wam̃ ôgwèra wiṉo; konde re tèndô pa inè: Mi be bôl’ôvenjavenji w’dombè, ko adombè m’ôlemba pazangaṉô. 32Ndô myè tôngwa pa, mi be kènda gô bôsô yaṉi gô Galile. 33N’awiṉizi Pyère awulinyè inè: Ja waôdu w’asogizô g’ômwanji wo, my’azogizô du. 34Awulinyô yè ne Yesu inè: Rèti, mi bulinyo inè: Ôgwèra wiṉo, njogoṉi gôgaga ro, ô be danda myè nyongo ntyarô. 35Pyère awulinyi yè inè: Vangane my’ajuwa na wè, my’alande wè. Yeṉo kè awuly’iṉèngi yôdu.
36Vovo aṽyeṉi Yesu na waô gô mbôra yi fweyô inè, Gètsemane, n’awulinyi yè iṉèngi yè inè: Lwaṉaṉi baru vèṉo gô be kènda myè gô kambiṉa. 37N’awongi yè Pyère n’awaṉ’aṽaṉi wi Zebeday, avakilya gô jeṉ’ekèṽa n’añandi. 38Vovo awulinyi yè waô inè: Iṉiṉi nyam̃ nyi jeṉ’ ekèṽ’evôlô kwanga gô juwa; rigaṉaṉi vèṉo, ko bèmbagaṉi na myè. 39N’agèndi yè gô bôsô kwè, avôsuny’ôzô wè gô ntye, agambiṉa inè: Reri yam̃, ja ny’ajolyô, imogi nyiṉo nyi ga vyagaṉe avila gôre myè. Ndô arange nte bela myè, ndô nte belo. 40N’aṽyeṉi yè gôr’iṉèngi, aliṽinya waô gw’antyôviṉô, n’awulinyi yè Pyère inè: Sambô, aṉw’ayolye bèmbe na myè igwèr’im̃ori? 41Ṽèmbagaṉi ko kambiṉaṉi, ko ṉw’agweṉa gw’isoryô; iṉiṉa nyi re keka pa, ndô ôzôṉe wi re dèla. 42N’arô kèndi yè nyongo yi mbaṉi, agambiṉa inè: Reri yam̃, j’imogi nyiṉo ny’ayolye pyagaṉe, kaô my’ajonga nyô, ntondiṉi yo yi ga lendô! 43N’arô byeṉi yè, aliṽinya waô gw’antyôviṉô, konde antyo maô m’avegagi dira. 44N’arigi yè waô, arô kènda, agambiṉe nyongo yi ntyarô, nkambag’agamba mèmô. 45Vovo aṽyeṉi yè gôr’iṉèngi yè, awulinya waô inè: Aṉwè dèwa vèṉo, ayowa! Vônaṉi, igwèra ny’atweṉi, n’Ômwaṉa w’ôma aṉozyô gw’ago m’aṉag’aṽe. 46Gum̃aṉaṉi, gèndôṉi; vônaṉi, ayè yi kôtiza myè atweṉi pyèrè.
47Gw’agambagi yè, vôna, Yudas, ôm̃ori w’igôm̃i n’aṽaṉi, aṽyeṉi n’aṉag’awenge na yè n’ikwara ni viso, avila gôr’imiṉisè impôlô n’aṉèro w’aṉaga. 48N’ayè y’agôtizi yè aliwô apeṉi waô elingilyô inè: Ayè yi be sombô myè, ne yè; gôtaṉi yè ngwasi. 49N’aṽyeṉi yè pelè gôre Yesu, awulinyè inè: Mbôlô, Rera! N’azombyè yè. 50N’awulinyô yè ne Yesu inè: Ndeg’wam̃! ntiṉa nde y’abyo vèṉo? Vovo aṽyeṉi aṉaga mèwoṉo, araly’ago gôre Yesu, agôtè.
51Na vôna, ôm̃ori avila gôre waô w’avegagi ni Yesu, alam̃iṉ’ôgo wè, agoguny’ôkwari wè; n’agwèri yè nyôngô yi miṉisè mpôlô, areṉ’ôrôy wè nkwe. 52Vovo awulinyô yè ne Yesu inè: Wiz’ôkwari wo gw’egôrô; konde waôdu wi kôt’ôkwara wi be jôṉô n’ôkwara. 53Ô pikilya nè, my’ayolye bambye Reri yam̃, ko yè pe myè gôtèvèṉo vyagaṉô n’igôm̃i ny’inkumba ni nkumba mbaṉi s’iyenjèl? 54Ndô irèndo yô ko twa rèti sè inè, ga lwaṉe yeṉo?
55Gw’egômbe mèzoṉo, Yesu awulinyi aṉaga inè: Aṉw’abya n’ikwara n’iviso gô kôta myè egolaṉi gôr’ekuya. Ntyugw’edu my’avegagi dwaṉa pa baru na ṉwè, nènjaga gô nagô y’Anyambyè, ko ṉw’agôta myè. 56Ndô isam̃u yiṉo yôdu yi twa inè, irèndo y’ivogisi yi ga rwe rèti.
Vovo iṉèngi yôdu y’arigi yè, awanga.
57Waô w’agôti Yesu w’aviṉi yè gôre Kayifa, yi miṉisè mpôlô, mbôra y’avegag’irèndisi n’aṉèro dataṉa pa. 58Ndô Pyère azôngi yè davadavye kwanga gw’evungu zi nagô yi miṉisè mpôlô, n’ayingiṉi yè gôgô, alwaṉa baru na mongi w’agôti Yesu gô jeṉa nte be twa.
59Imiṉisè impôlô n’ôvagô wôdu w’awutag’iyeṉi y’inôka yi sire Yesu, gô jôṉè. 60Ndô vangaṉe gw’aṽyeṉ’iyeṉ’imyenge y’inôka, wi re dènge. 61Avila vovo aṽyeṉ’iyeṉi y’inôka imbaṉi, awulya inè: Ôma wiṉo awulyi nè, myè ko saze nagô y’Anyambyè, arô nôga yô ni ntyugu ntyarô. 62N’agum̃aṉi miṉisè mpôlô awulinyè inè: Ô re fwiṉiz’igamba gw’isam̃u yiṉo yi takilyô ne mongi siṉo g’ômwanji wo sè? 63Ndô Yesu alwaṉi dodo. N’awulinyô yè ne miṉisè mpôlô inè: Mi sômbyo, gw’ina ny’Anyambyè ya bo, inè, wulinya zwè j’awè ne Krist, y’Ômwaṉa w’Anyambyè. 64Yesu awulinyi yè inè: Èñ, nte bulyo. Ndô mi bulinya ṉwè kè inè: Avila vèṉo aṉwè be jeṉ’Ômwaṉa w’ôma baru g’ôgo ôṉôm̃yè w’Anyambyè yi ngulu; aṉwè be jeṉè kè e bya gô vindi y’ôrôṽa. 65Vovo ayôkuṉi miṉisè mpôlô ingoy sè, awulya inè: Are pèdya p’Anyambyè! Azw’are n’isolo nde ny’iyeṉi? Vônaṉi vèṉo, aṉw’ajogyô ipèdya si pèdyô Anyambyè. 66Aṉwè tanga sè? Awiṉizi waô inè: Are n’inyanga nyi juwa. 67Vovo arônyi waô yè igwaṉa g’ôzô, awôlè, n’am̃ori w’awôli yè asapôga, awulya inè: 68Krist, voga; abôlo mande?
69Alwaṉi Pyère gw’igala gw’evungu. N’aṽyeṉi nyôngô nyantô, y’ayandam̃iṉag’iguge, gôre yè, awulya inè: Awè kè w’avegagi ni Yesu ya mwô’Galile. 70Ndô alandi gw’azô m’aṉaga waôdu, awulya inè: My’amye nt’akambo. 71Na gw’agogwi yè g’ômpômbala, ayenyô ne nyôngô nyantô nyèṉè, n’awulinyi yè waô w’avegagi vovo inè: Ôma wiṉo kè avegagi ni Yesu yi Nazarèt. 72N’arô dandi yè n’ôrangô inè: Mi pa my’ôma mèwoṉo. 73Mw’ôlingô vyagaṉô, waô w’avegagi gôre w’aṽyeṉi, awulinye Pyère inè: Rèti giligili awè kè ôm̃ori gôre waô, konde nkambiṉi yo yi pango myô. 74Vovo avakilyi yè gô tang’irangô nè: Mi pa my’ôma mèwoṉo. N’agôgi njogoṉi pelè. 75N’ayônginyi Pyère igamba ny’awulinyô yè ne Yesu inè: Njogoṉi gôgaga ro, ô be danda myè nyongo ntyarô. N’agogwi yè gw’igala aleṉa n’ekèṽ’evôlômè.
Currently Selected:
:
Highlight
Share
Copy
Want to have your highlights saved across all your devices? Sign up or sign in
Published by the British and Foreign Bible Society in 1927.