Ezekyèl 28

1Igamba nyi Yeôva ny’arô byeṉi gôre myè, awulya inè: 2Ômwa w’ôma, wulya gôr’ôṽangiṉi wi Tir inè: Yeṉo kambe Rerè, Yeôva, inè: Ôrèm̃i wo w’atômbinyô, n’awè ô re bulya pa inè: Myè Anyambyè, myè dwaṉa tu gw’eka z’Anyambyè, gô garegare yi ntyuṽa! Awè ôma, awè arang’Anyambyè, vangaṉe ô lôṽy’ôrèm̃i wo ga ôrèm̃a w’Anyambyè. 3Vôna, ô re n’imya vyagaṉô ni Danyèl, e zel’iyumbuṉô nyi re ko jumbuṉô avila gôre wè; 4v’imyi so, na v’ikôtizi so ô re dènga p’igumba, na ô re buṉiza pe sika ya teṉateṉa na ya pupu; 5v’imyi so ipôlô na v’ôkiti wo ô re pendiza p’igumbi nyo, n’ôrèm̃i wo w’atômbinyô g’ômwanja w’igumbi nyo. 6Sambô, yeṉo kambe Rerè, Yeôva, inè: Gô re nè, ô re dôṽya p’ôrèm̃i wo ga ôrèm̃a w’Anyambyè, 7sambô, vôna, mi be bag’agènda gôre wè, waô wi r’ererya z’aṉongo; wi be dur’ôkwari waô w’iwora gw’imyi so si pôlô, na waô wi be fweviz’erangi zo. 8Wi be sônyo gw’iṽemba, n’awè ô be juwa ijuwa sa waô wi re jôṉô pa, gô garegare y’intyuṽa. 9G’ôzô w’ôma wi jôṉo awè ko bulya nè, myè ne Anyambyè? Awè ô be dwaṉ’ôma, arang’Anyambyè, g’ôzô w’ôma wi be jôṉo. 10Ô be juwa ijuwa sa mongi w’izombè, vo ago m’agènda. Konde my’akambi, bulye Rerè, Yeôva.

11Igamba nyi Yeôva ny’aṽyeṉi gôre myè, awulya nè: 12Ômwa w’ôm̃a, gamb’igamba ny’edingô gôr’ôga wi Tir, awulinyè inè: Yeṉo kambe Rerè, Yeôva, inè: Awè yi re n’imbya sôdu, ralye n’imya, n’erang’eṽya, 13w’alwaṉi gw’Edèn, ntyaga y’Anyambyè; w’alwaṉi jônyô pa n’adô mi njôni, mô ne sardwane, tôpaze, dayman, kirizôliti, ônisi, yaspe, safir, karbukèl, meralde ni sika ya teṉateṉa; ingom̃a n’abeka m’abôlyô gôre wè, kekizô pa gô ntyugu y’ayanyô wè. 14W’alwaṉi ga kerubin sagyô pa gô penjavenj’aṉaga, n’ampava sambuṉa pa; n’alôṽyi myè wè n’alwaṉi wè gô nômba yi nkèrè y’Anyambyè; n’agèndagi wè gô garegare y’adô mi bambiz’ômwèy. 15W’alwaṉi mèpa pa gw’impoṉo so avila gô ntyugu y’avangyô wè kwanga gw’alèngyô ibe gôre wè. 16V’ibuṉa s’ôkiti wo w’ayônyô ni mbaô, n’awè ô re fwem̃a pa; sambô, vôna, mi falo avila gô nômba y’Anyambyè, na mi jilizo, awè kerubin sagyô pa, gô penjavenj’aṉaga, avila gô garegare y’adô mi bambiz’ômwèy. 17Ôrèm̃i wo w’atômbinyô g’ômwanja w’erangi zo; ô re fweviza p’imyi so n’ônjèlènjèlè wo; mi falo gô ntye, mi dimbiṉo swaswo n’aga ko waô pôno. 18V’ibuṉa s’ibe so, v’ôkiti wo wa règo, ô re fweviza p’inagô so s’ôrunda; yeṉo mi koguny’ôgôṉi avila gô garegare yo, mi kegunyo g’ômbu gô ntye gw’antyo ma waôdu wi pôno. 19Waôdu wi myo gôr’aṉaga wi mamizô g’ômwanji wo; w’atweṉi ga nyawènyawè, n’awè w’arô dwaṉe nyèṉè.

20Igamba nyi Yeôva ny’aṽyeṉi gôre myè, awulya inè: 21Ômwa w’ôma, lôṽy’ôzô wo gô Sidôn, avoga gô yô, awulya inè: 22Yeṉo kambe Rerè, Yeôva, inè: Vôna, mi siro, ô Sidôn! mi be pendyô gô garegare yo, na wi be mya inè, myè ne Yeôva, gô be dwaṉ’ijèkèlyi sam̃ gô yô na gô be tum̃inya myè nkèrè yam̃ gô yô. 23Mi be tôm̃a gô yô evunga, na mi be pôvize ntyiṉa gw’agala ma yô. Ôkwara w’iwora g’ôzamby’edu wa yô wi be bonjaṉ’aṉaga, ayôṉa waô. Na wi be mya inè, myè ne Yeôva. 24Yi ze tô dwaṉe nyèṉè gô nagô y’Israèl irèndè nyi tum̃’aṉaga, nyi bonjaṉa, gô ntangô ya waô wi re vingôvingô yô, na wi sèlya yô. Na wi be mya nè, myè ne Rerè, Yeôva.

25Yeṉo kambe Rerè, Yeôva, inè: Gô be datiza myè nagô y’Israèl avila gôre mongi wi re yè pazangaṉa pa, gambèṉè mi be tum̃inye nkèrè yam̃ gôre yè gw’antyo m’aṉongo, na wi be dwaṉa gô ntye yaômè y’avenyô myè gôre nyôngô yam̃ Yakob. 26Wi be dwaṉa gô yô njuke fo, na wi be nôg’inagô, aṽèṉ’intyaga s’igoli; wi be dwaṉa gô yô njuke fo gô be denda myè ijèkèlyi sam̃ gôre waôdu wi re waô vingôvingô na wi pèdya waô. Na wi be mya inè, myè ne Yeôva, Anyambyè yaô.

Currently Selected:

Ezekyèl 28: MYE

Highlight

Copy