Ezekyèl 27
27
1Igamba nyi Yeôva ny’arô byeṉi gôre myè, awulya inè: 2Awè, ômwa w’ôma, gamb’igamba ny’edingô g’ômwanja wi Tir! 3Ko bulinye Tir inè: Awè yi dwaṉa g’ôzègè wi ntyuṽa, awè yi kôla n’aṉaga w’ineng’inyenge! Yeṉo kambe Rerè, Yeôva inè: Awè, ô Tir! ô re bulya pa inè, my’are mèpa pa n’eranga! 4igômbiṉô yo yi re gô garegare y’intyuṽa; inôgisi yo yi re mèpiza p’erangi zo. 5Wi re panga p’intimbe so sôdu ni rere y’avili gô Senir; wi re bonga p’ikum̃e avila gô Liban gô pang’ôgum̃ya gôre wè. 6Wi re paṉa p’inkaṽi so n’imbilinga si Basan, ni ki yo ni mpunji janjô pa n’ôverô, ni bagô pa avila gw’inenge si Kitim. 7Tvèl’iṽya nyi nogagô avila gw’Egipt ny’alwaṉi gôre wè egolaṉi ga ikuku na ga ntyanga; iṉamba y’ôsolomèngèlè na ya teṉateṉa avila gw’inenge s’Elisa y’avegagi iṉambi yo y’isangala. 8Alwaṉi wi Sidôn n’Arvad w’avegagi iṉugisi yo, n’aṉagi wo w’ôkeli, ô Tir, w’avegagi gôre wè mongi yo wi tev’ôranga. 9Aṉèro wi Gebal n’iyanjisi y’imya ya yô w’avegagi gôre wè gô song’am̃atanga; am̃atanga môdu mi ntyuṽa na mongi wi janja gô mô w’avegagi gôre wè gô jègiṉ’igumbi nyo. 10Waô wi Pèrsya, wi Lud na wi Put w’ayanjagi ga isozè gô nkumbi yo y’isozè; w’avegagi aṉôm̃e w’igoṽi; w’aṽanyi nguṽa n’ipaki gôre wè, aṽag’ônjèlènjèlè gôre wè. 11Aṉaga w’Arvad ni mbèli yo y’ajôny’ikômbi so, n’aṉôm̃e w’eṽèmba w’avegagi vingôvingô gw’inagô so s’adô. W’aṽany’inguṽi saô gw’ikômbi so vingôvingô; wi re mèpiza pa pôlô erangi zo. 12Waô wi Tarsis w’agôlagi na wè g’ômwanja w’ibuṉa s’aṉongo môdu m’igumbi nyo; sika ya pupu, n’ômwanga, n’ingôngô, n’ôsumbu, w’agôlagi ya yiṉo yôdu na wè. 13Yavan, Tubal, Mesèk w’agôlagi na wè; w’agôlag’asaka ni vagô yi nyènyè g’ôkiti wo. 14Waô wi nagô yi Togarma w’agôlagi g’ôkiti wo ikavala, n’aṉaga wi panda gw’ikavala, ni mulèti. 15Aṉaga wi Dedan w’agôlagi na wè; ôkita w’ineng’inyenge w’aṽyeṉi gôre wè; w’aveṉi wè ipa n’impunji n’evila. 16Sirya agôlagi na wè, konde w’avegagi ni yom̃a yenge, mbagaga gw’agôliṉô mo adô m’ôsolomèngèlè, na ma teṉateṉa, n’iṉamba yi nôgagô, n’ivèl’iṽya, ni kôrali, n’adô mi njôni. 17Yuda ni ntye y’Israèl w’agôlagi na wè; w’agôlagi g’ôkiti wo frômènti yi Miniti, n’idega, n’ôṉèmbè, n’agali ni ya yi nkangô. 18Damas agôlagi na wè. konde w’avegagi ni yom̃a yenge, na g’ômwanja w’ibuṉa s’aṉongo m’igumbi nyo nyôdu; agôlag’ivè ny’Elbon, n’imya ya pupu y’adombè. 19Vedan ni Yavan, avila gô Uzal, w’agôlagi na wè; imyanga yi re janjô pa, rere yi nkangô mbya, n’akôkô mi nkangô, m’avegagi nkôlaga na wè. 20Dedan agôlagi na wè ôkita wi fu yi fwelô gw’ikavala gw’ibanja sa sô. 21Arabya n’ivangiṉi yôdu yi Kedar w’agôlagi na wè, nkôlaga na wè ôkita m’awaṉa w’adombè, n’adombè aṉôm̃e, n’imbôṉi. 22Igôlisi yi Seba na yi Rama w’agôlagi na wè, nkôlaga na wè ôkita wi yom̃a yi njôni yi nkangô yôdu, ta n’adô mi njôni môdu ni sika ya teṉateṉa. 23Karan, ni Kane, n’Eden, n’igôlisi yi Seba, y’Asur, na yi Kilmal w’agôlagi na wè; 24ôkiti waô w’avegag’igumb’iṽya, afunda mi ya y’ôsolomèngèlè na mi ya yi nogagô, ambor’ambya fwelô pa gô gara ṽya, pèṉô pa n’igoli, ni pangô pa n’intimbe s’ikum̃e. 25Am̃atanga mi Tarsis m’aṽagag’igumbi nyo g’ôkiti wo; gô garegare y’intyuṽa w’apegaga ni sika nyenge n’ivenda ralye. 26Iṉugisi yo yi re wè baga pa gô ntyuṽa mpôlô; ômpunga wi nkôṽa yi tongwa ni nkômbe w’ajilizi wè gô garegare y’intyuṽa. 27Aṉivi mo, agôliṉô mo, n’igumbi nyo, mongi yo wi janja gô mbeṉe na waô wi tev’ôronga; waô wi song’am̃atangi mo, na waô wi jegiṉ’igumbi nyo, n’aṉagi wo w’igoṽi waôdu wi re gôre wè, ni nkumba yôdu yi re gô garegare yo, waôdu wi be pôswa gô garegare yi ntyuṽa gô ntyugu y’ijilizô so. 28Gô nyongolè y’itônga sa mongi yo wi tev’ôronga ikeṽa yi be bôl’ôzègè wi ntyuṽa; 29na waôdu wi kôt’inkaṽi, mongi wi janja gô mbeṉe, na mongi wi tev’ôronga wi ntyuṽa wi be sum̃iṉa avila gw’am̃atangi maô. Wi be kum̃aṉa gô ntye; 30wi be pang’anyôy maô gô jogaṉô gôre wè, na wi be tônga pôlô, wi be fwele ntyèngè y’iroy gô wônjô yaô, wi be sèliz’ikuṽi yaômè g’ômbu. 31Wi be sèngiṉe wônjô yaô pôndô g’ômwanji wo, aworiza waô ni pinde, na wi be deṉa g’ômwanji wo n’iṉiṉa ny’ekèṽa n’azingw’ampôlô. 32Gw’ideṉi saô wi be kamb’igamba ny’edingô g’ômwanji wo, n’aleṉa gôre wè inè: mande re vovo egolaṉi ga Tir, egolaṉi ga nkala mè yi re jilizô pa gô garegare yi ntyuṽa? 33Gw’agogw’ôkiti wo avila gw’intyuṽa, w’ayôriz’aṉag’awenge; w’avagiz’aga wi ntye n’ibuṉa s’igumbi nyo n’ikôli so. 34Ndô vèṉo gô re nè, ô re jilizô pa ne intyuṽa, g’ôronga w’aṉingô, ikôli so ni nkumbi yô yôdu y’aṉaga y’apôswi na wè. 35Alwaṉi m’ inenge waôdu wi tatam̃iṉa g’ômwanji wo, agi waô w’atyeṉi pôlô, w’ajeṉi njuke gw’azô maô. 36Igôlisi gôr’aṉaga yi sèlyo n’isôsi, w’atweṉi ga nyawènyawè, n’awè w’arô dwaṉe nyèṉè.
Currently Selected:
Ezekyèl 27: MYE
Highlight
Share
Copy
Want to have your highlights saved across all your devices? Sign up or sign in
Published by the British and Foreign Bible Society in 1927.
