Rôm̃i 27
27
1Gw’agenjyô inè, azwè be kènda n’ôwatanga gw’Italya, w’aveṉi Pol n’ikôt’im̃ori gôre yôfisyè yi nkumba y’isozè y’aweyôgô inè, nkumba y’Auguste, ina nyi yôfisyè mèyoṉo ne Yulyus. 2Agweṉi zwè g’ôwatanga w’Adramite w’arweṉi gô kènda gw’inkala s’Azya si re gô ntyuṽa, n’aluli zwè agèndaga; n’Aristarkus, ya mwô’Makedônya, avili gô Tesalônika, agèndi kè na zwè.
3Bunya, avungi zwè gô Sidôn; ni Yulyus alendiṉi Pol nkèngo, arigi yè gô talwa gô ntye gô ke jeṉ’indegô sè, ko yè dèng’iṉunguṉa gôre waô. 4Aluli zwè avila vovo, aṽyagaṉe nenge yi Kiprus, g’ôzamba w’avegagi zwè diṽiṉô pa avila g’ômpunga, konde w’avegag’akôm̃a gôre zwè. 5N’azwè dalya pe mbeṉe yi re swaswo ni Kilikya ni Pamfilya, aṽyeṉi zwè gô Mira, nkala yi Lisya. 6Vovo alèngi yôfisyè ôwatanga w’Alekisandrya wi kènda gw’Italya, n’aweli yè zwè gô wô.
7Azwè kènda p’intyugw’inyenge ni nkèngo, ayeṉe njuke gô bya vangaṉe swaswo ni Kinide, vovo ômpunga wi pa jivira zwè gô tô kènda gô nkôṽa mèyoṉo. Yeṉo azombuṉi zwè ômpunga g’ôzamba wi nenge yi Krèti, swaswo ni Salmône. 8Avyagaṉi zwè yô ni njuke nsôngage ntye, n’aṽyeṉi zwè gô mbôra yi fweyô inè, Akwèt’ambya, pyèrè na mô avegagi nkala yi Lasaya.
9Waô periza p’egômb’ela, mbeṉe y’arweṉi mbe gô kèndô, konde egômbe zi peng’esônge z’aliwô pyagaṉi. 10Ndô Pol aveṉi waô ôkeli awulya inè: Aṉôm̃e mi jeṉa nè, ôgèndo wiṉo wi be dwaṉa ni njuke n’iperô sipôlô, aranga dadyè s’igumba na s’ôwatanga, ndô si m̃èṉo yazô kè. 11Yôfisyè ayogiṉô ôma wi tev’ôronga ni ngowè y’ôwatanga vyagaṉô n’agamba m’agambyô Pol. 12Na gô re nè ikwèta nyi pa pegag’iṽya gô dwaṉô egômbe z’ifwe, awenge gôre waô w’awulyi nè, azwè ga lule avila vèṉo, vendetwa azwè ko bôm̃wa gô Foynika avyagaṉ’egômbe z’ifwe vovo, Foynika ne ikwèta nyi nenge yi Krèti, nyi re swaswo ni Nor‐est ni Sud‐est.
13Gw’avèviṉ’ômpunga wi Sud ni nkèngo, w’avikilyi nè, w’adèngi ntondiṉi yaô, w’aluli, avyagaṉa pyèrè ni nenge yi Krèti nsôngage ntye. 14Ndô kwè ômpung’ôyoli, wi fweyô inè, Yurakulon, w’avèviṉi gô nenge. 15Gw’awôli ômpunga ôwatanga, ko w’ayolye sindiṉa wô, azw’agegwi agènda n’ômpunga. 16N’age sombuṉi zwè ômpunga g’ôzamba wi nenge nyangô yi fweyô inè, Klôda, n’azw’ayeṉi njuke vovo gô penjavenj’elende; 17waô tômbiṉa pa zô, w’aṉunguṉi ôwatanga ni taga wô n’igoli vingôvingô, na gw’aryeṉi waô inè, waô vende siga gô ntômba yi fweyô inè, Sirte, w’azôny’ikuku. Yeṉo agèndi waô n’ômpunga. 18Gw’awôlyô zwè ôgula pôlô, bunya w’avakilyi gô pung’igumba gô mbeṉe, 19na gô ntyugu yi ntyarô, avungi waô n’ago maômè yom̃a y’ôwatanga. 20Intyugu sinyenge nkômbe n’igègèṉi yi pa bamba gôre zwè, n’ômpunga w’avegagi ôyoli awôlaga zwè, yeṉo igum̃u nyôdu, inè, azwè be sungiṉô, ny’averi.
21Alwaṉi waô ôling’ôla wi pa ny’inya. Vovo agum̃aṉi Pol gôre gô garegare yaô, awulinya waô inè: Aṉôm̃e, gavoṉo aṉw’avôganyô myè, ko ṉw’alula avila gô Krèti, alènge njuke yiṉo n’iperô siṉo. 22Vèṉo mi tevuṉa ṉwè inè, zindyaṉ’irèm̃a, konde e ze dwaṉ’ipera si m̃èṉo gôre ṉwè, ndô kaô s’ôwatanga. 23Ôgwèra wiṉo akum̃aṉa yenjèl y’Anyambyè pyèrè na myè yi niva myè, na yi janjiṉô myè, awulinya myè inè: 24Arya Pol, ô be bagô g’ôzô wi Sezar, na vôna, Anyambyè are po pa waôdu wi re na wè g’ôwatanga. 25Sambô, aṉôm̃e, zindyaṉ’irèm̃a, konde my’are n’ibekelya siṉo gôr’Anyambyè inè, e be dwaṉa vangaṉe nt’abulinyè myè. 26Ndô azwè be falô gô nenge.
27Igôm̃i ny’intyugu ni ntyugu nay pyagaṉa pa, gw’awôlangaṉagi zwè vèṉo na voṉo gô mbeṉe y’Adrya, ôgwèra ṉengeṉenge mongi w’ayanji g’ôwatanga w’avikilyi nè, wi susa pyèrè ni ntye. 28Gw’avungi waô ntyôngi, alèngi waô agôm̃i mi guṽa ambaṉi; avila vovo kwè w’arô pungi, n’alèngi waô igôm̃i nyi guṽa ni guṽ’ôtaṉè. 29Na gw’aryeṉi waô inè, azwè vende siga gô ntye gô mbôra y’adô, w’avungi nyilô nay avila gw’atiṉa, avengiṉ’ôwenja.
30Ndô gw’aṽelagi mongi wi janja g’ôwatanga gô pera avila g’ôwatanga, azôny’elende gô mbeṉe, mpondyaga inè, wi be pung’inyilô gô numbu, 31Pol awulinyi yôfisyè n’isozè inè: J’aṉôm̃e wiṉo w’alwaṉa g’ôwatanga, aṉw’ayolye sungiṉô. 32Vovo azèr’isozè igulu y’elende, n’avôswi zô gô mbeṉe.
33Ôwenja yenjaga ro, Pol agwen’aṉaga waôdu inkolo inè, wi ga ny’inya, awulya inè: Ṉèṉo wiṉo ne ntyugu y’igôm̃i ni nay yi re ṉwè dwaṉa pa mpengag’esônge ko ṉwè any’inya. 34Sambô kokoloṉi nyaṉ’inya, konde yeṉo r’isolo gw’isungiṉô saṉi, konde e ze pere vangaṉ’ôrwe avila gw’ewônjô z’ôm’edu gôre ṉwè. 35Ayè kamba pa yeṉo, awongi mpèmba, n’ayè pa p’akeṽa gôr’Anyambyè gw’azô m’aṉaga waôdu, amoguṉi yè yô, avakilya gô nya. 36Vovo azindyô waôdu irèm̃a, awong’inya gô nya kè waômè. 37Azw’avegagi g’ôwatanga aṉaga waôdu nkam̃a mbaṉi n’agôm̃i m’aṉaga ôrwageṉô n’aṉag’ôrôṽa. 38Gw’anyeṉi waô ayôra, w’ayavuri ôwatanga, mpungag’inya gô mbeṉe.
39Gw’ayenj’ôwenja, wi pa mya du ntye mè, ndô w’ayeṉ’ikwèta ny’avegagi n’ôzègè, n’agenji waô gô kèndy’ôwatanga gôgô ja w’ajolya. 40Avuruṉi waô inyilô ariga sô gô mbeṉe n’avuruṉi waô kè igulu y’agôryô n’evèpa egômbe mô; vovo aluri waô ikuku nyi numbu g’ômpunga, age kombiz’ôzègè. 41Ndô w’aṽyeṉi gô ntômba, n’azigi waô n’ôwatanga vovo; n’agèndi numbu gô ntômba ayola vovo, ndô atiṉa m’avakilyi gô jarwa ni ngulu y’ikeṽa.
42N’isozè s’aṽeli gô jôṉ’ikôte, ôm’edu gôre waô e vende joga gô ntye, avera. 43Ndô yôfisyè aṽeli gô sungiṉe Pol, n’alegi yè waô avila gô môndo y’agenjyô waô. N’azômbyi yè inè, waô wi re w’avôrô joge wi ga lônge pôswe gô mbeṉe, agènda gô ntye. 44Na mongi mori, awèwo gw’intimbe, awèwo gô yom̃a mori y’ôwatanga. Yeṉo arweṉi nè, waôdu w’aziṽi mbyambye gô ntye.
Currently Selected:
Rôm̃i 27: MYE
Highlight
Copy
Compare
Share
Want to have your highlights saved across all your devices? Sign up or sign in
Published by the British and Foreign Bible Society in 1927.
