Rôm̃i 26
26
1Awulinyi Agripa Pol inè: Zoza gô kaṉ’ôkuṽi womè.
Vovo anyonyuṉi Pol ôgo wè, azoza inè:
2Mi jeṉe mbya, ôga Agripa, gô kaṉ’ôkuṽi wam̃ ṉèṉo wiṉo g’ôzô wo g’ômwanja w’isam̃u yôdu yi sozizô myè n’Iju, 3konde pôsô w’avôrô mbyambye intyale sôdu s’Iju n’impagi saô. Sambô kokolo vôganyô myè n’isindiṉa.
4Ndwaṉi yam̃ nônga avila gw’erumbe zam̃ y’amyenyô n’Iju sôdu, konde my’alwaṉi yô gôr’iṉongo nyam̃imè gô Yerusalèm. 5Wi re mya pa mbyambye avila gw’ipakilya, ja w’abela gô jivir’igamba, inè, my’alwaṉi gô nkumba y’ifarisi; waô gôre zwè wi penjavenj’ivanga pôsô. 6Na vèṉo, mi kum̃aṉa gô jèkèlyô g’ômwanja w’igum̃u nyi dwaṉiz’ômpangaṉô w’avanganyô gôr’ireri sazô, 7na gô wô ireri sazô igôm̃i ni mbaṉi si janjiṉ’Anyambyè egômbe zôdu ôgwèra n’ôm̃anda, ndeṽiṉaga gô bôm̃wa g’ômpangaṉô mèwoṉo. Na g’ômwanja w’igum̃u nyiṉo e sozizô myè n’Iju, Rera, ôga! 8Ezom̃a nde zi jeṉa ṉwè yô ndaga yi re y’ayolye bekelyô gôr’Anyambyè gô tôngunye mongi wi re juwa pa?
9Rèti, myè kè my’avikilyi nè, mi ga lend’isam̃u imyenge gô sir’ina nyi Yesu yi Nazarèt. 10Na ziṉo z’alendyô myè gô Yerusalèm. Myè bonga p’inyanga avila gôr’imiṉisè impôlô, my’awel’iyombw’imyenge gô ntyôgô, na gw’ayônyô waô, my’ayivir’igamba kè. 11Inyongo sinyenge my’ayeṉiz’awenge azingô gw’inagô si soṉo, aṽangatya waô gô pèdy’Anyambyè. N’aṽendiṉi myè waô pôlô, agombiza waô kwanga gw’inkala s’aṉongw’am̃ori.
12Yeṉo, myè pô p’inyanga n’ezangô avila gôr’imiṉisè impôlô, agèndi myè gô Damas. 13Nkômbenyôndô, rera ôga, my’ayeṉi gô mpoṉo ôzange avila g’ôrôṽa, vyagaṉô n’ôzange wi nkômbe, mbambaga gôre myè vingôvingô na gôre waô w’agèndyi myè. 14N’avôswi zwèdu gô ntye, n’ayogyô myè inyôy nyi bulinya myè ni nkambiṉi y’Ebèr inè: Sol, Sol, ntiṉa nde yi kombizo myè? Are jola gôre wè gô sik’imyang’irweṉi. 15Awiṉizi myè inè: Awè mande, Rera? N’awulyi Rerè inè: Myè ne Yesu yi kombizô wè. 16Ndô ṉongwa, ko kum̃aṉa gôre n’agôlô mo, konde my’are bôm̃unya pa gô dôṽyo miṉisè n’ôyeṉi w’isam̃u yi re wè jeṉa pa n’isam̃u yi be bôm̃unyô myè gôre wè. 17My’avinji wè kè avila gôr’iṉongo nyiṉo, n’avila gôr’aṉongo mi be tôm̃a myè wè, 18ko wè nunguṉa waô antyo maô, ko waô kalwa avila gô mpiri aṽya g’ôzange, n’avila gô ngulu yi Satan aṽya gôr’Anyambyè, ko waô dèng’inyezô s’ibe n’ijiga na waô wi re mèpa pa v’ibekelya gôre myè.
19Yeṉo, ôga Agripa, mi pa pegag’ijogiṉô fo gw’ayeṉi myè isam̃u mèyoṉo avila g’ôrôṽa: 20my’agambiṉi gw’alônga gôre mongi Damas, na gô Yerusalèm, na gô ntye yi Yuda yôdu, na gôr’aṉongo inè, wi ga ṉige nkôndi agalwa gôr’Anyambyè, njanjag’isam̃u yi keka n’iniga si nkôndi. 21Gô ntiṉa yiṉo Iju s’agôti myè gô nagô y’Anyambyè, agèṉiza gô jôṉa myè. 22Ndô my’aṉungunyô n’Anyambyè, ko mi dwaṉe kwanga ṉèṉo wiṉo, ntankilyaga gw’azô m’awangô n’aṉèro, ndô mi pa kamb’igamba, kaô agamba mèmô m’awulyô n’ivogisi ni Môsès inè, mi be twa, 23inè, Krist e be juwa, na inè, ayè tôngwa pa gw’alônga avila gw’ijuwa, e be myez’ôzange gôr’Iju na gôr’aṉongo.
24Gw’agambagi yè yeṉo gô kaṉ’ôkuṽi wè, Festus awulyi n’inyôy ivôlô inè: Pol, ô taṉa! Inèngi so ipôlô si pang’ewônjô zo gô fweva.
25Ndô Pol awulyi nè: Mi pa taṉa, Rera Festus; ndô mi kamb’agamba m’ôrèti na m’ôzim̃a. 26Konde ôga avôrô isam̃u yiṉo, mi kambiṉè yô buku, konde mi tanga inè, gw’isam̃u yiṉo e zel’igamba jumbuṉô pa avila gôre yè, konde isam̃u yiṉo yi pa dendô gô ntulungu. 27Ôga Agripa! ô bekely’ivogisi? My’avôrô inè, ô bekelya yô.
28N’awulinyi Agripa Pol inè: Ô be panga myè gô kalwe kirisoṉi kwè. 29N’awiṉizi Pol inè: Ntyo kwè, ntyo ôling’ôla, Anyambyè e ga yivir’arang’awè dadyè, ndô waôdu wi pôganyô myè ṉèṉo wiṉo, inè, wi ga rwe ga nt’are myè, tômbare p’igôrô yiṉo!
30Vovo agum̃aṉ’ôga, ni guvèrnèr, ni Bèrnike na waôdu w’avegagi dwaṉa pa baru na waô; 31waô kogwa pa, w’awulyaṉi nè: Ôṉôm̃e wiṉo e pa dende ndaga yi re yè n’inyanga nyi juwa ge nyi fwelô gô ntyôgô. 32N’awuliny’Agripa Festus inè: Ôṉôm̃e wiṉo ko dèkizô dyè, arwe nè, pa bambya gô jèkèlyô gôre Sezar.
Currently Selected:
Rôm̃i 26: MYE
Highlight
Copy
Compare
Share
Want to have your highlights saved across all your devices? Sign up or sign in
Published by the British and Foreign Bible Society in 1927.
