SAKARIA 7
7
I Pue mamposari puasa anu bareʼe malino
7:1-7
1Ri aopo eo mbuya Kisileu inceʼe wuya kasasio, taʼu kaʼaopo poparenta i Datu Dariusi, ndawai woʼu i mPue nuntu ri yaku.
2Tau ri Beteli mampokaumo i Sarese pai Rege-Meleki sangkani pai waʼa ntaunya njoʼu ri Banua i mPue Anu Makuasa merapi popadonco-A. 3Tau seʼe woʼu ndapokau da mampeoasi ri waʼa ntadu mpanyomba pai waʼa nabi ewaseʼi, “Bara ntongo moyowe kami dan mangkukuousi kagero Banua i mPue, da mopuasa ane rata ri wuya kaʼalima, ewa anu biasamo kawianaka motaʼu-taʼumo kasaenya?”
4Ewaseʼi nuntu i mPue anu rata ri yaku, 5Ndatoʼo, “Paratamo ri pura-pura tau bangani ntana seʼi, pai ri waʼa ntadu mpanyomba, kono puasa pai pokukuou anu nawianaka ntau seʼe ri wuya kaʼalima pai kapapitu ri raya anu pitu mpuyu ntaʼu seʼi banya katetubunaka ri Yaku. 6Ewanceʼe seʼe tempo mpangkoni pai panginu ntau seʼe, podo mampakaʼosa rayanya ngkalionya.”
7Incetumo anu ndatoʼo i mPue mampaliu waʼa nabia ri tempo anu ndaliunakamo ri sindara Yerusale ndapeari pai waʼa ntaua gana-gana katuwunya. Ri tempo setu waʼa ntau banya podo mampeari waʼa lipu anu mantolilimi kota, paikanya sako ri tondo selata pai ri waʼa puʼu mpongkuntana tondo kasoyoa.
Peewa anu mampapopuʼu pantawani
7:8-13
8I Pue Anu Makuasa mawai nuntu seʼi ri Yaku, 9“Motaʼu-taʼu anu ndaliunakamo Yaku mangawai waʼa ncongka seʼi ri waʼa ntau-Ku, ‘Komi sangaya-ngaya da monco poʼengkomi, da pande mporaya ri kasiyunumi. 10Neʼe ndiparini waʼa bemba, waʼa ana ilu, waʼa ntau mencua anu maroo-roo ri oyomi pai bara isema ntano anu napere ncura ndaya. Da neʼe woʼu marecana anu majaʼa ri kasiyunumi!’
11Paikanya waʼa ntauku mapeni woʼonya pai bareʼe liu-liu napokono mampedongeka. Da nadampo ntau seʼe talinganya da naka neʼe nadonge. 12Napakapeni ntau seʼe rayanya painaka mapeni ewa watu. Maʼai karau ndayaku maka tau seʼe bareʼe malulu waʼa pompaguru anu roomo kuwaika tau seʼe mampoliu waʼa nabi anu riunya. 13Yaku bareʼe mangasono pekakai ntau seʼe, maka tau seʼe woʼu bareʼe mampedongeka tempo Yaku mompau. 14Ewa lompiu, Yaku mancaewemo tau seʼe painaka tau seʼe ndariso maroo-roo ri waʼa ntana ntau ntaninya. Tana anu maboko seʼi njiimo bemoreʼe mampeari pai mance-mancegi.
Currently Selected:
SAKARIA 7: LAIPMF
Highlight
Share
Compare
Copy
Want to have your highlights saved across all your devices? Sign up or sign in
