SAKARIA 12
12
Yerusale da ndasorepaka
12:1–13:6
1Ewaseʼi nuntu i mPue kono to Isaraeli. I Pue anu mantale yangi pai anu mampapewali tana pai mangawai katuwu ri tolino, mantoʼo, 2“Yaku da mampowia Yerusale ewa soraya anu ndabanganika anggoro; waʼa lemba samposorinya anu mangainu pai da kampipo-mpipo ewa tau anu mayangu. Pai ane nalimbu ncape iwali Yerusale, waʼa ngkota Yahuda anu ntongo totaʼa da nalimbu ncape iwali woʼu. 3Paikanya ane ratamo eo setu Yaku da mampowia Yerusale ewa watu anu manee; banca mbeʼi ntano anu mampebutuka da mangaʼokotaka da marugi. Pura-pura banca ri dunia da mompasanjuyu maungku Yerusale. 4Ri eo setu pura-pura nyara da kupapolipo-lipo pai waʼa ntau melamba da Kupakawando, bangani Yahuda da kujagai, paikanya waʼa nyara iwalinya da Kupaka buta. 5Nepa da natoʼo waʼa nto Yahuda ri rayanya, ‘I Pue Anu Makuasa anu mawai roso ri waʼa ntaua anu meari ri Yerusale.’
6Ri eo setu waʼa ncombori nto Yahuda, da kupapewali ewa apu ri raya osipa ngkaju apu bara ewa obori anu mareka-reka ri ara dongko gandu, tau seʼe da mangagero waʼa banca anu mantolilimi tau seʼe. Paikanya bangani Yerusale da rodo mpaliu ri raya ngkota ri kaʼuononya.
7Yaku Pue, anu kaʼisa-isanya da mawai penangi ri surodado nto Yahuda, da naka katetubunaka anu natarima muli i Daudi sangkani pai bangani Yerusale bareʼe meruu pai anu natarima bangani Yahuda anu ntaninya. 8Ri eo setu Yaku da mantatondoi tau bangani Yerusale; pai anu maʼai ngkalente ntano ri oyo ntau seʼe da mewali maroso ewa i Daudi. Tau seʼe da naponinika nu muli i Daudi da ewa malaekaku, bara da ewa yaku ngkalioku. 9Ri eo setu Yaku da mangagero sambaʼa-sambaʼa banca anu mampebutuka mangaungku Yerusale.
10 #
Yoh. 19:37, Pepat. 1:7 #Mat. 24:20, Pepat. 1:7 Ungka lairia muli i Daudi pai bangani Yerusale da kuwaika raya anu pande mporaya pai madoyo mekakai. Tau seʼe da mampeole Sira anu roo najalo ntau seʼe nepa nakukuousi ewa tau anu mangkukuousi kamate ananya anu sambaʼa-mbaʼa. Tau seʼe da mokukuou ri kapari ndayanya, ewa tau anu nakamateka ana uyue. 11Ri eo setu da reʼe pokukuou anu maʼai ri Yerusale ewa pangkukuousi i Hadadi-Rimoni ri Rato Megido. 12-14Nepa sambaʼa-sambaʼa sombori ri tana setu da mokukuou; sombori muli i Daudi, sombori muli i Nata, sombori muli i Lewi, sombori muli i Simei pai waʼa ncombori anu ntaninya. Sambaʼa-sambaʼa sombori setu da mokukuou tepatani, waʼa ntuama ungka ri sambaʼa sombori seʼe da tepatani ungka ri waʼa mbeʼa.”
Currently Selected:
SAKARIA 12: LAIPMF
Highlight
Share
Compare
Copy
Want to have your highlights saved across all your devices? Sign up or sign in
