SAKARIA 10
10
I Pue mojanji da mancorepaka waʼa ntau-A
10:1-12
1Ane ratamo tempo mporeme, ndiperapimo uja ungka ri Pue. I Pue da mampasambaka limu makundongi da mampatudu uja marombo da naka waʼa jamaa ndakita mayawuyu, lese nakita ntau pura-pura. 2#Mat. 9:36, Mrk. 6:34 Waʼa ntau merapi totoraka ungka ri waʼa lamoa pai waʼa ntopontonaa, paikanya waʼa sononya anu da rata ntau seʼe inceʼe podo mbamba podo pau soa ngkabongo. Reʼe anu mamposoki pangipi, paikanya totoraka ntau seʼe podo mampakalingu komi, pai pompalindo anu nawai ntau seʼe bereʼe yowenya. Inceʼe painaka waʼa mpalilinya tewuraga ewa bimba. Mapari raya ntau seʼe maka bemoreʼe tepombawanaka.
3Ndatoʼo i mPue, “Maʼai karau ndayaku ri tau anu makuasa anu mamparenta waʼa ntau-Ku, inceʼe painaka tau seʼe da kuhuku. Paikanya bangani Yahuda Yaku tumpunya, Yaku Pue Anu Makuasa da mangkariani tau seʼe. Tau seʼe da kupapewali ewa nyara mpoʼiwaliku anu makaliki. 4Ungka ri oyo ntau seʼe da kupilisi anu makuasa, topombawanaka, pai tadulako ncurodado anu da mamparenta waʼa ntau-Ku.” 5Bangani Yahuda da menangi da ewa waʼa mpomakoje anu da malandasi waʼa iwali ewa loge ri tongo njaya. Tau seʼe da mompakaroso ua kayakunya, i Pue mampelae tau seʼe, pai surodado anu melamba ri nyara da nanangi ntau seʼe pura-pura.
6“Bangani Yahuda da kupakaroso,
waʼa nto Isaraeli da Kusorepaka.
Kukeni mpewalili tau seʼe ri tananya,
ua mapuru rayaku ri tau seʼe.
Tau seʼe da kupowia
ewa sambaʼa banca anu bereʼe Kupampesapuka.
Yakumo Pue Ala pue ntau seʼe
waʼa mpekakainya da kupedongekamo.
7Waʼa nto Isaraeli da ewa waʼa mpomakoje anu maroso,
ewa tau anu mainu anggoro, da mawongko raya ntau seʼe.
Muli ntau seʼe popalapi-lapi
bareʼe da mangkalingani penangi anu kuwai seʼi.
Tau seʼe da modoro-doro ua waʼa mpowiaku tila ntau seʼe.
8Waʼa ntauku da Kupeboo pai da Kupasambaka mewali sambaʼa-mbaʼa.
Tau seʼe da Kulapasaka pai da Kupapewali sondo ewa iʼowi.
9Mau roomo kusebu tau seʼe ri oyo waʼa banca,
bareʼe bali da napaendo ntau seʼe Yaku njairia.
Tau seʼe tesorepaka, ewanceʼe seʼe waʼa ananya
pai da mewalili sangkani-ngkani ri tananya.
10Ungka ri Masiri pai ungka ri Asuri da kupampapewalili tau seʼe.
Ri tananya ngkalionya da kupadika tau seʼe.
Da kukeni woʼu tau seʼe njoʼu ri Gilea pai Libano
pai samalele ntana da buke tau seʼe.
11Ane tau seʼe da mangawote tasi ngkapari,
Yaku, Pue da mangamposo waʼa balumbanya;
inceʼe painaka oru ngKoro Nili mangau-ngau.
Banca Asuri anu mobangke-bangke da kukodisi,
pai masiri anu makaliki da paya kojenya.
12Yaku da mampakaroso waʼa ntau-Ku,
tau seʼe da mepoʼinaya pai da manyomba ri Yaku.
Yaku Pue anu mantoʼomo seʼi.”
Currently Selected:
SAKARIA 10: LAIPMF
Highlight
Share
Compare
Copy
Want to have your highlights saved across all your devices? Sign up or sign in
