MATIU 20
20
Nuntu mporapa waʼa ntopotetala ri bonde anggoro
20:1-16
1“Ane i Pue Ala anu moparenta, katedikanakanya ndapaporapaka ewaseʼi: Sambaʼa tau anu mampotumpu bonde anggoro, mowuro-wuro mpodago malaimo mampepali tau anu da ndasaro motetala ri bonde anggoronya. 2Butu nasintuwunakamo saro ntau sambaʼa dinari sandeme, napokaumo tau seʼe motetala ri bonde anggoronya. 3Tinti sasio mowuro malai woʼu tumpu bonde setu, jela ri pasari nakita waʼa ntau anu podo motunda-tunda ngkabongo. 4Natoʼoka tau setu, ‘Ndikanjoʼumo motetala ri bonde anggoroku saromi anu sitinaja da kuwaika komi.’ 5Njoʼumo tau seʼe. Tinti sampuyu radua ntongo eo pai ri tinti tatogo lauka reme, malai woʼu tumpu bonde setu mamparuru tau da njoʼu motetala ri bondenya. 6Ri tinti alima ngkinowia malai woʼu siʼa, narata woʼu waʼa ntau anu podo mekakakore ngkabongo. Napeoasi ri tau seʼe natoʼo, ‘Makuja komi seʼi ndiʼeoka podo mekakakore ngkabongo ireʼi bereʼe tetalami?’ 7Mesono waʼa ntau setu natoʼo, ‘Bereʼe tau anu mampokono mawaika kami tetala.’ Mesono siʼa, ‘Ane ewanceʼe ndikanjoʼumo motetala ri bonde anggoroku!’
8 #
Tad. 19:13, Paw. 24:15 Ngkinowiamo, natoʼo ntumpu bonde setu ri mandoronya, ‘Peboomo pura-pura waʼa ntopotetala setu, pai bayarimo saro ntau seʼe sambaʼa pai sambaʼa, montepuʼu ungka ri anu jela ripurinya, nakarataka ri anu jela riu-riunya.’ 9Jelamo waʼa ntopotetala anu montepuʼu motetala ri tinti alima ngkinowia sambaʼa-sambaʼa tau seʼe mantarima sambaʼa dinari. 10Ungka lairia jelamo waʼa ntopotetala anu ndasaro ungka mpowuro. Naendo-endo ntau seʼe da montarima meruu. Ntanoka podo sambaʼa dinari woʼu ndawaika tau seʼe. 11Ri pantarima ntau setu saronya, mongkanguru tau seʼe ri tumpu bonde. 12Natoʼo, ‘Tau anu jela ri puri podo sajaa potetalanya, ndipasiwia saronya pai kami anu motetala muntu-muntu sandeme napaindo-indo ndeme!’ 13Mesono tumpu bonde anggoro setu natoʼoka sambaʼa tau ri oyo tau seʼe, ‘Ee bale, yaku bareʼe mampowia jaʼa ri siko, ara banya sambaʼa dinari saromu sandeme ewa anu roomo taposintuwui? 14Timamo saromu, palaimo! Lawi pepokono ndayaku mawaika tau anu jela ri puri mpodago saronya siwia pai anu kuwaika siko. 15Ara bareʼe maya yaku mampake aga-agaku malulu pepokono ndayaku? Bara manyau rayamu ua yaku pande mporaya?’ ” 16#Mat. 19:30, Mrk. 10:31, Luk. 13:30 Nepa ndatoʼo woʼu i Yesu, “Ewanceʼe woʼu waʼa ntau anu kapusanya da mewali anu kaʼisa, pai waʼa ntau anu kaʼisa mewali anu kapusanya.”
Katatogo ngkaninya i Yesu mampau kono kapatea
20:17-19
(Mrk. 10:32-34, Luk. 18:31-34)
17Ri tempo ngkandeku i Yesu ri Yerusale, ri yae njaya ndapeboo anaguru-A sampuyu pai radua, mompasambaka tepatani. Nepa ndatoʼoka tau seʼe, 18“Ndipedongeka! Kita wawaseʼi da ndeku ri Yerusale. Ndatiria i Ana Manusia da ndapepombaika ri waʼa ntadulako ntadu mpanyomba pai guru agama. Pai siʼa da ndapepate. 19Pai Siʼa da ndapepombaika ri pale ntau anu banya to Yahudi. Da napasinggiri ntau seʼe Siʼa, da najeani Siʼa pai mampaku Siʼa ri kaju ndapanggo. Paikanya ri katatogo ndemenya da ndapapembangu muni Siʼa.”
Perapi ine i Yakobu pai i Yohane
20:20-28
(Mrk. 10:35-45)
20Roo setu jelamo rongo i Ncebedeu pai waʼa ananya ri Yesu. Mombukotu tau seʼe ri suara-A maka reʼe anu da naperapi.
21Meoasi i Yesu ndatoʼo, “Ine, nunjaa anu nditinako ndaya?” Mesono ine ananggodi setu natoʼo, “Tangara ndayaku da naka ndipakanotomo anaku anu radua seʼi, sambaʼa da motunda ri tondo mokana-Mi, sambaʼa da motunda ri tondo mokaii-Mi ane mewali Mokole Komi.”
22Mesono i Yesu ndatoʼoka tau seʼe, “Bareʼe ndiincani nunjaa anu ndiperapi. Ara da ndikoto mampanginu tabo mpanginu ngkapari anu sangaya-ngaya da Kuinu?”
Mesono tau seʼe, “Kakoto!”
23Ndatoʼo i Yesu, “Lawi da ndipanginu tabo mpanginu-Ku. Paikanya kaʼisemanya anu da motunda ri tondo mokaii pai mokana-Ku, inceʼe banya Yaku anu mampakanoto. Waʼa ngkareʼe setu tila waʼa ntau anu roomo ndapakanoto mPapa-Ku.”
24Ri padonge anaguru anu sampuyu perapi setu, majaʼa raya ntau seʼe ri tau radua santuaʼi setu. 25#Luk. 22:25-26 Inceʼe painaka ndapeboo i Yesu tau seʼe pura-pura nepa ndatoʼo, “Ndiincani waʼa nto poparenta anu bareʼe maincani i Pue Ala mamparini palilinya. Pai waʼa ntau bangke anu makuasa, mabaruku tau seʼe. 26#Mat. 23:11, Mrk. 9:35, Luk. 22:26 Paikanya komi bareʼe maya ewanceʼe. Motada pai nceʼe, tau anu da rayanya mewali tau bangke ri oyomi, sangaya-ngaya da mewali toporiokomi. 27Pai tau anu da rayanya mewali tadulako ri oyomi, da mewali anamayunumi. 28Da ewa i Ana Manusia setu woʼu; kamaʼinya banya da naka ndaporiokoi paikanya da naka mamporiokoi, pai mampepombaika inosa-Nya tila ngkatesorepaka sondo tau.”
I Yesu mampakaʼosa tau buta radua
20:29-34
(Mrk. 10:46-52, Luk. 18:35-43)
29Palai i Yesu pai anagurua ungka ri lipu Yeriko, maria kojo tau anu malulu Sira. 30Tau buta radua ntongo motunda-tunda ri wiwi njaya. Padongenya poliu i Yesu, meboo-boo tau radua setu, natoʼo, “Ana i Daudi ndipokapurumo kami!”
31Napokarau ntau sondo tau radua setu da naka neʼe maʼase, paikanya janaʼaiwaka mampakarimbo peboonya, natoʼo, “Pue, Ana i Daudi, ndipokapurumo kami!”
32Meʼonto i Yesu nepa ndapeboo tau seʼe ndapeoasi, “Nunjaa anu ndipodaraya da Kupowiaka komi?”
33Mesono tau seʼe, “Pue, da raya mami menaa mata mami!”
34Mapuru raya i Yesu ri tau seʼe nepa ndajama mata ntau seʼe liu-liu yosamo matanya. Nepa nalulu ntau seʼe i Yesu.
Currently Selected:
MATIU 20: LAIPMF
Highlight
Share
Compare
Copy
Want to have your highlights saved across all your devices? Sign up or sign in
