HOSEA 2
2
1Inceʼe painaka peboomo kasiyunumu pai toʼo, “Waʼa ntau i mPue Ala” pai “Ndapokapuru i mPue.”
I Gomeri anu bareʼe tumoro mewali tanda nto Isaraeli
2:2-13
2Ndatoʼo i mPue, “Ee waʼa ana-Ku, inemi banyamo rongoku, pai yaku banyamo langkainya. Inceʼe painaka ndipokara-karamo siʼa da naka neʼemo mosalara siʼa pai neʼe napepombaika woʼu koronya. 3Pai ane napepombaika mpaliu koronya, Yaku da mangalambesi rengkonya, da naka melambe-lambe siʼa ewa ri tempo pampoana. Siʼa da kupapewali ewa tana anu mangau pai madusu, painaka siʼa da mate maranganga. 4Komi, waʼa ananya, bareʼe da Kupokapuru, maka komi ndapoana ri posalara. 5Inemi tau anu bareʼe tumoro pai bereʼe ea matanya, maka natoʼo, ‘Yaku da njoʼu ri waʼa ntengeaku anu mangawaika yaku pangkoni pai panginu, ayapa wuyu bimba pai ayapa lena, lana saitu pai anggoro!’
6Inceʼe painaka Yaku da mangawaya kareʼenya pai yopo ndui, pai mangaompo jayanya pai waya tembo. 7Siʼa da mangaduduki waʼa ntengeanya, paikanya siʼa bareʼe da rata ri tau seʼe. Siʼa da mampepali tau seʼe, paikanya bareʼe da narata tau seʼe. Nepa da natoʼo, ‘Yaku da mewalili ri langkaiku anu kaʼisa; iʼowi sangka dagonya katedikanakaku painaka wawaseʼi.’
8Inemi bereʼe napangaʼaku kayakunya anu mawaika siʼa gandu, anggoro, lana saitu, pai waʼa wuyawa salaka anu napake mampanyomba i Baali setu. 9Inceʼe painaka ri turo mpomota, yaku mangawali ntima muni waʼa mpombaiku setu, ewa gandu, anggoro, ayapa wuyu bimba pai ayapa lena anu kuwaika siʼa da naporengko. 10Da kulambesi siʼa ri suara waʼa ntengeanya. Bereʼe mau sambaʼa tau ungka ri oyo ntau seʼe anu mangkoto da mangalapa siʼa ungka ri kuasa-Ku. 11Waʼa mposusanya da kupapeʼonto, madago susanya anu santaʼu, bara susanya anu sambuya pai waʼa eo Umapo; kaʼedenyamo, mpengaya-ngaya susa agamanya. 12Yaku da mangagero waʼa mpuʼu anggoro pai waʼa mpuʼu ara, anu malulu siʼa inceʼemo saro mpowongo-wongonya pai waʼa ntengeanya. Da kuwalisaka waʼa bonde anggoronya pai waʼa bonde aranya mewali yopo; waʼa mpinatuwu anu masii da mangajaʼati. 13Yaku da mangahuku siʼa ua waʼa eo anu napake mangantunju dupa ri Baali, pai pompakagayanya pai waʼa mparewanya da mangaduduki waʼa ntengeanya, painaka nakalinganimo mpaliu Yaku, Yaku i Pue, anu mantoʼomo seʼi.”
I Pue mampotowe waʼa ntaua
2:14-23
14Ndatoʼo i mPue, “Inceʼe painaka yaku da mangangkeni siʼa ri pada bone; njairia siʼa da kukanarasi pai waʼa mpau ngkamawo. 15#Yos. 7:24-26 Waʼa bonde anggoronya da kupapewalili ri siʼa pai Yombo Ngkapari da Kupapewali boboka pampomata-mata. Njairia siʼa da mangasuncu Yaku ewa ri tempo ngkanguranya, ri tempo siʼa nepa mesuwu ungka ri Masiri. 16Nepa da natoʼo Yaku langkainya, pai banyamo i Baalinya. 17Siʼa bareʼemo da kuwai mangantoʼo-ntoʼo Baali, rantani nakalingani ntau toʼo setu.
18Ri tempo setu Yaku da mampareʼe pojanji pai mpengaya-ngaya pinatuwu da naka tau seʼe bareʼe marendosi waʼa ntau-Ku. Yaku da mangampapeʼonto pura-pura poʼiwali pai mangantajika waʼa mparewa mpoʼiwali ungka ri tana waʼa ntauku setu, da mampakalindo pai mampakaʼuono katuwu ntau seʼe.
19Isaraeli, siko da Kupapewali rongo-Ku,
rongo anu mpuʼu rantani masae-sae.
Siko da Kupotowe pai da Kupomawo mpaliu;
Yaku da manoto pai todo.
20Silulu pai janji-Ku, siko da Kuporongo.
Siko da mangaʼaku kayakunya ewa Puemu ngkaliomu.
21-22Ri tempo setu, ane waʼa ntauku Isaraeli mekakai,
Yaku da mampedongeka tau seʼe.
Ungka ri yangi da kupatuduka uja
painaka tana da mampapowua gandu, anggoro pai lana saitu.
23 #
Rom. 9:25, 1 Ptr. 2:10 Da Kupapewali waʼa ntau-Ku uono katuwunya
pai da rodo ri tana ntau seʼe.
Ri waʼa ntau seʼe anu ndatoʼo, ‘Anu Bareʼe Ndapotowe’
da Kutujuka katau seʼenya Kupotowe,
pai ri tau seʼe anu ndatoʼo, ‘Banya Tau-Ku’
tau seʼe da mangancono ewaseʼi, ‘Komimo Pue Ala pue mami.’ ”
Currently Selected:
HOSEA 2: LAIPMF
Highlight
Share
Compare
Copy
Want to have your highlights saved across all your devices? Sign up or sign in
