YEHESIKIELI 48
48
Pantila tana ri waʼa lemba
48:1-7
1-7Tida ntana tondo ri utara moojo ndeku ri pebetea montepuʼu ungka ri Tasi ri Tongo simpontu kota Hetiloni, jaya mpesua ri Hamati, kota Hasari-Enani, rata ri tida ntana ri oyo ngkota Damasi pai kota Hamati. Waʼa lemba anu ndaimbasi seʼi inceʼemo anu sangaya-ngaya da mangarata santila ungka ri tana anu tebini ungka ri tida ntana pebetea njoʼu ri kasoyoa rata ri Tasi ri Tongo, ewaseʼi katedikanakanya ungka ri utara rata ri selata:
Daa
Asere
Natali
Manase
Eparai
Rube
Yahuda
Lemba ntana anu ndapatani ri tongo-tongo ntana setu
48:8-22
8Tana anu yabinya setu sangaya-ngaya da ndapatani ndapampake. Karatenya da gana-gana 12,5 kilometeri ungka ri tida ntana utara rata ri selata. Waʼa tida ntana ri pebetea pai ri kasoyoa sangaya-ngaya da siwia karatenya pai katetila-tilanya pai anu ndawaika ri waʼa lemba Isaraeli. Banua i mPue da ndawangu njairia.
9Santila ungka lemba ntana setu ndapatani tila i mPue, inceʼe tana anu ri tongonya, karatenya 12,5 kilometeri pai kabininya 10 kilometeri. 10Ri tongo-tongonya da ndapawangu Banua i mPue. Waʼa ntadu mpanyomba sangaya-ngaya da mangarata tila ungka ri tana anu magali setu. Anu da mewali tila ntau seʼe inceʼemo 12,5 kilometeri ungka ri pebetea rata ri kasoyoa, pai alima kilometeri ungka ri utara rata ri selata. 11Lemba ntana anu ndapatani setu inceʼemo anu da napotumpu waʼa ntadu mpanyomba anu napomulika ri Sadoki. Tau seʼe anu todo mamporiokoi i Pue, banya ewa to Lewi anu sambaʼa-mbaʼalemba pai tau seʼe, anu sangkani-ngkani mowia salaa pai waʼa nto Isaraeli anu ntaninya. 12Inceʼe painaka ri waʼa muli i Sadoki setu sangaya-ngaya da ndawaika tana anu ntaninya ewa anu ndawaika to Lewi. Pai tana anu ndapatani setu magali kojo. 13Tana waʼa nto Lewi setu karatenya 12,5 kilometeri ungka ri pebetea rata ri kasoyoa; pai kabininya alima kilometeri ungka ri utara rata ri selata pai kareʼe mpotundanya simpontu pai tana anu napotumpu waʼa ntadu mpanyomba. 14Mau sanjanga ntano ungka ri tana setu bareʼe maya napobalu ntau seʼe, bara napotoloka; tana nto Isaraeli anu kono ri kaʼai ngkadagonya bareʼe maya da telimba ri pale ntau ntaninya, maka tana setu lawi ndapatani tila i mPue pai Siramo anu mampotumpu.
15Tondo ri selata ntana anu ndapatani setu, ntongo reʼepa yabinya 12,5 kilometeri karatenya pai 2,5 kilometeri kabininya. Tana setu inceʼe bareʼe magali pai inceʼe maya ndapake da kareʼe mpeari waʼa ntau sondo, pai da kareʼe mpongkambi, pai tondo ri tongonya sangaya-ngaya da ndawangu sambaʼa kota. 16Kota setu sangaya-ngaya da mosulapa aopo, apanya sambali seʼe 2,25 kilometeri. 17Pai mantolilimi kota setu sangaya-ngaya da reʼe tana lapa anu kabininya 125 meteri. 18Tondo ri pebetea pai kasoyoa reʼe tana lapa anu tubunya sambaʼa seʼe alima ngkani radua santongo kilometeri. Tana lapa anu radua setu sangaya-ngaya da ndapake napobonde waʼa ntau anu ri raya ngkota setu. 19Waʼa ntau ungka ri pura-pura lemba nto Isaraeli anu mampeari kota setu maya mampobonde tana setu.
20Mewali juku-juku lemba ntana setu, tesua tana anu ndapatani setu pai tana anu potunda ngkota setu, mosulapa aopo, 12,5 kilometeri karate apanya sambali pai sambali. 21-22Tana anu njau tondo ri kasoyoa pai pebetea ungka ri lemba ntana anu ndapatani setu anu ndapatoka tila da ndapawangu Banua i mPue, tila waʼa ntadu mpanyomba, pai to Lewi ri kota setu, inceʼemo tila waʼa nto poparenta anu moparenta. Tondo ri pebetea tana setu tebini rantani rata ri tida ntana pebetea, pai tondo ri kasoyoa rata ri Tasi ri Tongo, anu njau ri oyo ntana lemba nto Yahuda pai to Benyami.
Tana tila waʼa lemba anu ntaninya
48:13-29
23-27Tana anu reʼe tondo ri selata daera anu ndapatani setu, inceʼemo anu da napotila waʼa lemba ntaninya. Kabini ntana setu tepuʼu ungka ri tida ntana pebetea simpontu kasoyoa rata ri Tasi ri Tongo, ewaseʼi katetilanya ungka ri utara rata ri selata:
Benyami
Simeo
Isakari
Sebulo
Gati
28Tondo ri selata tila nto Gati, njau tida ntana anu tepuʼu ungka ri payompo yangi ri Tamari malempo mata ue Kadesi-Meriba, nepa njoʼu simpontu payompo yangi sambali woʼu sangkarate tida ntana pai Masiri rata ri Tasi ri Tongo.
29I Pue Anu Ndate ri Peawanya mantoʼo, “Ewancetumo da ndapantila tana setu, sangaya-ngaya da ndatilaka waʼa lemba nto Isaraeli.”
Waʼa baa-baa Yerusale
48:30-35
30-34 #
Pepat. 21:12-13
Baa-baa mpesua ri kota Yerusale reʼe sampuyu pai radua pura-pura. Reʼe aopo tembonya sambaʼa-sambaʼa seʼe anu tubunya 2,25 kilometeri pai tatogo baa-baanya. Sambaʼa-sambaʼa baa-baa anu ndapapotoʼoka toʼo sambaʼa lemba nto Isaraeli. Anu njau ri utara ndapapotoʼoka baa-baa i Rube, Yahuda pai Lewi; waʼa baa-baa anu ri tembo pebetea ndapapotoʼoka baa-baa i Yusupu, Benyami pai Daa; anu njau ri tembo selata ndapapotoʼoka baa-baa Simeo, Isakari pai Sebulo; pai anu reʼe ri tembo kesoyoa ndapapotoʼoka Gati, Asere pai Natali. 35Karate ntembo setu pura-pura sasio kilometeri. Pai montepuʼu seʼi-seʼi kota setu da natoʼo ntau: “I Pue NJAU NJAIRIA!”
Currently Selected:
YEHESIKIELI 48: LAIPMF
Highlight
Share
Compare
Copy
Want to have your highlights saved across all your devices? Sign up or sign in
