DANIELI 8
8
Pepatongawa anu nakita i Danieli kono bimba laki pai mbula laki
8:1-14
1Ri taʼu katatogo poparenta i Datu Belisasari yaku mangarata pepatongawa anu karadua. 2Ri pepatongawa setu kuepe koroku reʼe ri poropenci Elami, ri Susani, ibu kota Perisia. Yaku ntongo mpekakore mosu ri wingke Koro Ulai, 3pai ri wingke ngkoro ue setu kukita sambaʼa bimba laki anu reʼe radua tondunya anu marate, anu sambaʼa meruu ngkarate pai meruu ngkadawoʼu painaka anu sambaʼa. 4Kukita bimba laki setu metondu-tondu ri kasoyoa, ri utara pai ri selata. Bereʼe mau sambaʼa pinatuwu anu mangkoto maewa siʼa bara anu lapa ungka ri kuasanya. Siʼa mowia gori mpepokononya pai mewali mobangke-bangke.
5Sindara kupaole-oleka inceʼe, kukita sambaʼa mbula laki molonco-lonco ungka ri tondo kasoyoa malempo lino seʼi. Nakeni ngkagasi mpolumbanya painaka witinya bareʼe tudu ri tana. Ri oyo matanya radua reʼe sambaʼa tandu anu mejunjoa. 6Mbula laki setu mantimosuki bimba laki anu kukita ri wingke ngkoronya setu, nepa merumpa gori ngkasengkenya. 7Kupatomata mpodago napangarumpa bimba laki setu. Maʼai kojo kasengkenya painaka narumpa bimba laki setu liu mapuʼa tondunya anu radua setu. Bimba laki setu bereʼe rosonya meewa. Siʼa madungka ri tana nepa naija-ija, pai bereʼe mau sambaʼa tau anu mangkoto mampesangkai.
8Mbula laki setu kakobangke-bangke. Paikanya jabutu sawimo ri ungka ngkakuasanya, mapuʼamo tondunya anu bangke setu, nepa ri wakanya setu tuwu aopo tondu anu marate, sambaʼa-sambaʼa seʼe moara ntaninya. 9Ungka ri sambaʼa tondu setu tuwu woʼu sambaʼa tondu kodi, anu mewali maʼai kabangkenya pai kakuasanya tebini tondo selata, tondo pebetea pai tondo ri tana anu madolidi. 10#Pepat. 12:4 Tondu setu kakomaʼai-ai kabangkenya rantani gana rosonya da mangaungku surodado ncuruga inceʼemo waʼa betuʼe, painaka reʼe bara tesangkuja ri oyonya napetasoka ri tana nepa naija-ijaki. 11Naewa sako tadulako ncurodado ncuruga, napapeʼ onto pawianaka pawai panyomba saeo-saeo ndapanyombaka ri tadulako setu, pai maruasi banua mpanyomba ri siʼa. 12Inceʼe painaka waʼa ntau njairia montepuʼu mowia salaa pai bareʼemo mampanyombaka waʼa mpanyomba anu roo ndapakanoto setu. Panyomba anu monco ndanawumo ri tana. Reʼe wuanya pura-pura waʼa anu nawianaka ntondu setu.
13Ungka lairia kudonge sambaʼa malaeka mompau ri yununya natoʼo, “Sangkuja ngkasaepa pura-pura anu tongawa ri pepatongawa setu da tewianaka? Sangkuja ngkasae woʼu salaa bangke setu da mangancawani panyomba anu sandeme-sandeme? Sangkuja ngkasae woʼu surodado ncuruga pai Banua mPanyomba setu da ndaija-ijaki?”
14Kudonge woʼu malaeka anu sambaʼa mesono natoʼo, “Ntongo 1.150 ndemepa kasaenya. Sangkasae setu panyomba ngkinowia pai panyomba mowuro bareʼe da ndapanyombaka. Roo setu nepa da ndawali wangu muni Banua mPanyomba.”
I malaeka Jebaraeli mantotoraka posoki mpepatongawa setu
8:15-27
15Sindara ntongo kupari-pari manawa-nawa da kuparata ndaya posoki mpepatongawa setu, tingkarasaka mekakore ri suaraku sangaya anu ewa tolino. 16#Luk. 1:19,26 Kudonge oni nganga meboo ungka ri sambote Koro Ulai mantoʼo, “Jabaraeli, totorakamo siʼa posoki mpepatongawa setu.” 17Nepa mekakore i Jabaraeli ri suaraku mantimosuki yaku. Nakeni ngkaʼai ngkaeka ndayaku madungka yaku.
Natoʼo i Jabaraeli ri yaku, “Tolino anu podo awu ntana, siko sangaya-ngaya da mangaincani kono pepatongawa setu inceʼe kono kapusa lino.” 18Ntongo mompau siʼa yaku malimpu. Paikanya siʼa mangkekeni yaku, pai mantulungi mampapekakore muni yaku, nepa natoʼo, 19“Yaku da mangantoʼoka siko nunjaa anu da mewali ri purinya ua karau ndaya i mPue Ala. Maka pepatongawa anu nukita setu inceʼe mantuju kapusa lino.
20Bimba laki anu nukita setu, anu mampotumpu tondu radua, inceʼe mantuju kamokole Media pai Perisia. 21Mbula laki setu mantuju kamokole Yunani, pai tondu anu mojunjoa ri oyo matanya radua, inceʼemo kamokole anu kaʼisa. 22Tondu aopo anu tuwu ri kapuʼamo ntondu anu kaʼisa, posokinya komokole Yunani da tebureka mewali aopo kamokole, paikanya bareʼemo reʼe mau sambaʼa ri oyonya anu da ewa karoso ngkamokole anu uyu-uyunya setu.
23Mosu ri da potando waʼa ngkamokole setu, ane sawimo ri puncunya kajaʼa, da meokomo sambaʼa mokole anu mapeni woʼo, pai loʼe metengosi. 24Siʼa da mewali maroso kojo, paikanya banya ua rosonya ngkalionya. Siʼa da mampareʼe kagero anu ndapokaeka pai nunjaa ntano anu napowia sangaya-ngaya da mewali. Siʼa da mangagero waʼa ntau anu maroso pai waʼa ntau mPue Ala. 25Ua siʼa maria akalanya waʼa mpombambanya da moyowe. Siʼa da mampobangke-bangkeka koronya, pai ri kabareʼenya ndasoro-soro siʼa da maʼopisaka sondo tau. Sako Mokole Anu Makuasa nataha maewa. Paikanya siʼa da ndalesaki banya ua roso ntolino. 26Pepatongawa kono panyomba ngkinowia pai mowuro anu roo ndatotorakaka siko setu, monco-monco kojo da mewali. Paikanya pura-pura setu da tepewali ri tempo anu nepa da rata masaepa; mewali neʼe nupauka bara isema ntano.
27Ungka lairia kuepe malente wukuku painaka majuʼa yaku bara sangkuja ndeme kasaenya. Roo setu nepa membangu yaku mawianaka tetala anu ndapepombaika i datu ri yaku. Paikanya mapari rayaku manawa-nawa waʼa mpepatongawa setu pai bareʼe kukota marata ndaya.
Currently Selected:
DANIELI 8: LAIPMF
Highlight
Share
Compare
Copy
Want to have your highlights saved across all your devices? Sign up or sign in
