Rm. 3

1Oto aponia pusasaliura tai Jahudi? Ele apa kauta nia sunat? 2Bulat maigi samba sene ngamata. Siboiki: Ka sia le kasegekat tiboiet Taikamanua. 3Tapoi kipa, ke ai ka talagada taimatonem baga, momoi pa taimatonem bagada ipakatai topit Taikamanua? 4#Psalm. 51:6 Bulat ta momoi! Simaroipo le Taikamanua, sirimanua geti simaboko le, kele sitususurat ka Surat Sipunenan:

“Bule imakoinong roipom ka bagat tiboietnu:

samba numamanang ke tuukum ekeu.”

5Tapoi ke taimaroipota masipakoinong roipot Taikamanua, kipa takukua? Takukua pa ta maroipo Taikamanua ke iukum sita? (Manibo aku ka pusisirimanua.) 6Bulat ta momoi! Ke kisedda bai, kipangan le iooi iukum taikapolak nene Taikamanua?

7Tapoi ke kalulut taimaroipoku memei matotoila pubulanan Taikamanua sibailiu katulatsanannia, tuukumake pei le kodda aku kele sirimanua sijo? 8Angoi ta takua kele sikuada sabagei masigegei sita, rakua atakua, “Kauan tagalai kam sikatai, bule ibara simaeru.” Sirimanua kele nene mateuan iukum sia Taikamanua.

Sangamberi sirimanua sijo le

9Oto kipangan? Ai pa pusasaliura ka sabangsa bagei? Bulat ta anai! Aipoi atapakoinongan ka panandaatnia tai Jahudi ele bangsa bagei, sangamberida ai le sia ka kupkumen jo, 10#Psalm. 14:1-3, 53:2-4 kele sitususurat ka Surat Sipunenan:

“Ta anai simaroipo, beri sara;

11ta anai beri sara siagai paatuat,

ta anai beri sara sigaba Taikamanua.

12Sangamberida atusoipman, sangamberida amusiboboian,

ta anai sigalai simaeru, beri sara ta anai.

13 # Psalm. 5:10, 140:4 Pangoilokatda samba le ratei sipunganganga;

lilada rapakei masipataju,

ka tei biboda ai lagat ulou.

14 # Psalm. 10:7 Ngungunda sun pateleiat samba tiboiet simapongit.

15 # Jes. 59:7, 8 Manangka rereda masipiliake logau.

16Karagatat samba pugejaat baga ragalak ka enunganda,

17samba enungan paabanan ta raagai.

18 # Psalm. 36:2 Loto ka Taikamanua ta anai ka sia.”

19Tapoi ataagaian, sangamberi sinoboi ka Surukat, ka sia sikuddu ka kupkumen Surukat le ititiboi nia, bule ipetpetnake senen ngungu samba sangamberi taikapolak bailiu muutak ka Taikamanua. 20#Psalm. 143:2; Gal. 2:16 Kalulut ta anai beri sara sirimanua momi maroipo ka matat Taikamanua ka pasigagalaiake Surukat, aipoi Surukat ia te pasiagai jo le.

Kalulut tonem baga le ituparoroipo sirimanua

21Tapoi kineneiget amatoilaan ta kalulut pasigagalaiake Surukat iparoipo sirimanua Taikamanua, aimunengakean leu ka buko Surukat samba suratda tai nabi, 22#Gal. 2:16 ia te kalulut tonem baga ka Jesus Kristus le iparoroipo sirimanua Taikamanua sangamberi sirimanua simatonem baga. Ta poi anai pabaggeiatnia. 23Sangamberida poi amajongan samba taan anai ka tubuda pulatsanan Taikamanua. 24Oto ka kiliu bagat Taikamanuangan le ramaroroipo, panguruatnia kalulut panebuiat ka bagat Kristus Jesus. 25Kristus Jesus aikauan Taikamanua bailiu enungan paabanan kalulut tonem baga ka logaunia. Aigalai nene, masipatoila roiponia, kalulut ta aiaddeake sangamberi jo sipuaaili siburu ka teteret aiomake bagania. 26Nene masipatoila puroipoatnia ka tetere kineneiget, bule imatoila simaroipo le nia samba iparoipo sirimanua simatonem baga ka Jesus.

27Oto apangan le atsiakenenta? Taan anai. Kalulut apa? Kalulut pasigagalaiake Surukat? Taa. Sarat kalulut tonem baga le. 28Oto ukkaakenenta: Kalulut tonem baga le ituparoroipo sirimanua, ta kalulut pasigagalaiake Surukat.

29Ele sarat Taikamanuanda tai Jahudi le Taikamanua? Ta Taikamanuanda leu bangsa bagei? Bulatnia, Taikamanuanda leu sabangsa bagei. 30#5Mos. 6:4; Gal. 3:20 Sara le Taikamanua, nia le siparoipo tai Jahudi sipususunat kalulut tonem baga, nia leu masiparoroipo bangsa bagei taipususunat kalulut tonem baga. 31Ke kisedda bai, tapakakataian le pa Surukat kalulut tonem baga? Bulat ta momoi! Bailoknia, ronakenenta le.

Currently Selected:

Rm. 3: MWV

Highlight

Copy