Mrk. 11
11
Katugurukat Jesus ka Jerusalem
(Mat. 21:1-11; Luk. 19:28-40; Joh. 12:12-19)
1Kele aramalegere ka Jerusalem, airaamiake Betpage samba Betania, ka leleu Tula, koiniakenangan rua sipasiuluinia Jesus, 2kuanangan ka matada, “Kenan kam ka laggai ipot matamui. Gurumui le ka laggai nenda, sesemuian sara togat kalidei ai kasesereat, taiuuddenietda pei le sirimanua. Rugutmuian nia, ambitmuian nia sene. 3Ke ai bai sipasirerere kam apa lulunia nururugut kam kalidei nenda, kuamui le, ‘Ai kauna nia si Tuhan, ta mauju itoiliake nia minca se.’ ”
4Eirangan leu et, seserangan togat kalidei ai kasesereat ka bebet matatbaliu ka gerat, rugutrangan nia. 5Nounourangan sia sipuririo sedda, kuarangan ka matada, “Apananmui nururugut kam kalidei nenda?”
6Kuarangan kele sikuat Jesus ka matada, obaakerangan leu et nia. 7Taroakerangan kalidei ka matat Jesus, apoakerangan leppeira ka teitei kalidei, jananginangan nia Jesus. 8Maigi sia siapoake leppeira ka enungan, sabagei masipasaragai ran loina ka enungan sinaggirida ka mone. 9#Psalm. 118:25, 26 Sirimanua sipuboboiki samba sipasitutut mugerei, “Hosanna! Kau imatulu tubunia siooi ka onin Tuhan! 10Kau imatulu Purimataat siooi – Purimataat taikebbukatta si David! Hosanna ka Taikamanua Sipulubeunan!”
11Segena le Jesus ka Jerusalem, guru nia ka Uman Taikamanua. Itconangan sangamberinia sedda, lepa tui nia iei ka Betania sambada sipasiuluinia sipulurua, amasoiboan poi.
Itelei sileu Jesus
(Mat. 21:18-19)
12Mancep, kele aratuitui barada ka Betania, malajenangan Jesus. 13Ia geti itconangan ka sareunan sangaloina sileu simaeru buttet. Tagetnakenangan nia masiitco baleu ai buania. Kele aisege ka bakkat sileu, beri aisese buania, sarat buluk le, tapei poi aiaili pubuaiat sileu. 14Kuanangan ka loinat sileu, “Buian rakom buam beri sara sirimanua teret buruburu!” Airaarep sipasiuluinia sikuania.
Ipalina Uman Taikamanua Jesus
(Mat. 21:12-17; Luk. 19:45-48; Joh. 2:13-22)
15Sege sia ka Jerusalem, guru Jesus ka Uman Taikamanua. Taddaakenangan ikekele sirimanua sipasasaki ka bagania. Bailuakenangan mejada sipasisisili bulagat samba uddenanda sipasisasakiake ngorut. 16Ta aiobaake beri sara sirimanua masiambit apa pa masisabau gerat Uman Taikamanua. 17#Jes. 56:7; Jer. 7:11 Pangantomannangan sia Jesus pele ngangania, “Ta atusuratnakean ka Surat Sipunenan, ‘Uma panindogat ka sangamberi bangsa le tuoniake umangku?’ Tapoi anubailiuake le kam nia ngaliura sipasiraraurau!”
18Tiboiet nene araarep tai imam sabeu samba siagaisurat. Gabarangan paluluat itumateiake Jesus; maloto poi sia ka tubunia, aipoi sangamberi sirimanua makisei ka baga masiarep ngantomannia.
19Kasoibokat, tui minca Jesus samba sipasiuluinia, kaddiuakerangan kota.
Nganturat sibabara ka loinat sileu simamattei
(Mat. 21:20-22)
20Kele aratusabau simancep, itcorangan sileu amatteian pat aili ka ungatnia. 21Repdep airepdep nia si Petrus, kuanangan ka matat Jesus, “Guru, itco pei sileu siteleinu amatteian.”
22Kuanangan ka matada Jesus, “Kau imatonem bagamui ka Taikamanua! 23#Mat. 17:20; 1Kor. 13:2 Kukua nia ka matamui: kasei pa sikua ka leleu nene, ‘Akkatnake ekeu, ribbaiake tubum ka koat!’ ta bai makarat bagania, tapoi matonem bagania ipuaili sikuania, ta isosoppi ipuaili. 24Ia te lulunia kukua ka matamui: Ke manindou kam nutiddou kam apa pa, samba matonem bagamui iaake Taikamanua sinindoumui, ta isosoppi nusilo kam nia. 25#Mat. 6:14, 15 Samba ke manindou kam, tapoi ai ngungut bagamui ka tubut kasei pa, appeake kam boiki seleda, bule iappeake leu selemui Ukkuimui ka sorga. [26Ta geti nuappeake kam, ta leu et iaappeake selemui Ukkuimui ka sorga.”]
Panounogat pagalaiat geget Jesus
(Mat. 21:23-27; Luk. 20:1-8)
27Lepa ei minca Jesus samba sipasiuluinia ka Jerusalem. Aimugegejek Jesus ka bagat Uman Taikamanua, oi ka matania tai imam sabeu, siagaisurat samba tai bajara tai Jahudi 28nounourangan nia, “Ka geget apa nugalai nene? Kasei amasiake gege kekeu masigalai nene?”
29Kuanangan ka matada Jesus, “Kunounou kam boiki sara panounogat. Ke nualegi kam, kuakungan leu ka matamui ka geget apa kugalai nene. 30Pasiraukat Johannes nenda, sibara ka Taikamanua ele sibara ka sirimanua? Alegi pei kam!”
31Patiborangan pasasambada kuarangan, “Ke takua, ‘Sibara ka Taikamanua,’ kuanangan te ka matata, ‘Oto angoi ta matonem bagamui ka tubunia?’ 32Tapoi ke takua, ‘Sibara ka sirimanua,’ maloto sita ka sirimanua simigi, aipoi sangamberida arapunabingan si Johannes.” 33Kuarangan raalegi Jesus, “Ta kuagai kai.”
Kuanangan ka matada Jesus, ‘Oto kaku leu ta kukukua ka matamui ka geget apa kugalai nene.”
Currently Selected:
Mrk. 11: MWV
Highlight
Copy
Compare
Share
Want to have your highlights saved across all your devices? Sign up or sign in
@LAI 2015
