Mrk. 10
10
Pagalaiat pagalangan
(Mat. 19:1-12; Luk. 16:18)
1Lepa tuitui Jesus sedda ei nia ka laggaira tai Judea samba ka silat oinan Jordan. Sedda leu oi sia sirimanua simigi paruru ka matania; samba kele simareirei pangantomannangan sia.
2Ia geti oi piga pa tai Parise masisibo Jesus. Nounourangan nia, “Momoi leu igalak sinanalepnia simanteunia?”
3Aleginangan nia Jesus, “Kipa aikua ka kam si Mose?”
4 #
5Mos. 24:1-4; Mat. 5:31 Kuarangan, “Iobaake le si Mose igalak sinanalepnia simanteunia, ke ikau surat pagalangan.”
5Kuanangan ka matada Jesus, “Kalulut kelat paatuatmui le aisuratnake surukat nene ka kam si Mose. 6#1Mos. 1:27, 5:2 Tapoi taddanangan aibaraake sirimanua Taikamanua aibaraakean sia simanteu samba sinanalep. 7#1Mos. 2:24 Ia te lulunia ikakaddiuake ukkui samba inania simanteu iloplopmake tubunia ka sinanalepnia, 8bailiunangan sia sangaakkula. Oto taan rua, sangaakkulaan le sia. 9Siloplopmakenen Taikamanua poi ta momoi ipasaraake nia sirimanua.”
10Kele aratoili ka lalep, nounourangan nia minca sipasiuluinia pagalaiat nene. 11#Mat. 5:32; 1Kor. 7:10, 11 Kuanangan ka matada Jesus, “Kasei masigalak sinanalepnia, lepa putalimounangan ka sinanalep bagei, sipaeelet le nia ka sinanalepnia nenda. 12Kisedda leu et sinanalep sipasigagalak simanteunia, putalimounangan ka simanteu bagei, sipaeelet leu nia.”
Isukatnake tatoga Jesus
(Mat. 19:13-15; Luk. 18:15-17)
13Ia geti taroakerangan tatoga ka matat Jesus bule irape sia. Tapoi aragolu le sia sipasiuluinia. 14Itco aiitco nene Jesus, pugolunangan, kuanangan ka matada, “Obaake kam tatoga raoi kaku, ba kekera kam sia; sirimanua kele nene le poi sibakkati Purimataat Taikamanua. 15#Mat. 18:3 Kukua nia ka matamui: Kasei pa ke ta kele tatoga ipasiala Purimataat Taikamanua, ta tuguguru nia ka bagania.” 16Lepa lakkaiakenangan tatoga Jesus, kaunangan kabeinia ka utera sukatnakenangan sia.
Sirimanua simakayo
(Mat. 19:16-30; Luk. 18:18-30)
17Kele aibela Jesus iriuriuake puenunganannia, oi sara sirimanua pabalau ka matania. Purapponangan ka matat Jesus inounou nia, “Guru simatopit, kipa kugagalai bule kuikepmake purimanuaiat sitaitatata?”
18Kuanangan ka matania Jesus, “Nukukua kodda aku simatopit? Ta anai kasei pa simatopit, sarat Taikamanua le. 19#2Mos. 20:12-16; 5Mos. 5:16-20 Surukat Taikamanua anuagaian, ‘Bui nupamatei; bui nupaelet; bui nupanangkou; bui numunengake boko; bui nupajo sirimanua; suru ukkuinu samba inam!’ ”
20Kuanangan simakayo, “Guru, sangamberinia nene akugalaiakean ka pusulekatku pei le.”
21Kinerenangan nia Jesus, manuntunangan bagania, kuanangan ka matania, “Ai pei sara simagulai kekeu. Kenan sakiake sangamberi sibabara ka tubum, kaunungan bulagatnia ka simageba, bara ibara pukayoatnu ka sorga; lepa oi ekeu masitut aku.” 22Kele aiarep tiboiet nene mabelenangan bagania, tui nia ka reureu baga, simakope kayo le poi nia.
23Kinerenangan sipasiuluinia Jesus kuanangan ka matada, “Apate besi ka simakayo tuguru ka Purimataat Taikamanua.”
24Kisei le ka bagada sipasiului araarep tiboiet Jesus nene. Tapoi kuanangan minca Jesus, “Ale tatogaku, bulat mabesi tuguru ka Purimataat Taikamanua. 25Onta pei le malabbei tubuluk ka matat susuilak ka simakayo tuguru ka Purimataat Taikamanua.”
26Makeppunangan ka bagada sipasiului kuarangan pasasambada, “Oto kaseian le masisesese puaragat?”
27Kinerenangan sia Jesus kuanangan, “Ka sirimanua bai nia ta momoi; tapoi ta kisedda ka Taikamanua. Aipoi ka Taikamanua sangamberinia le momoi.”
28Kuanangan si Petrus, “Akukaddiuakean tebai kai sangamberinia masitut ekeu.”
29Kuanangan Jesus, “Kukua nia ka matamui: senen sikaddiuake lalepnia, ele sasarainania, ele samaniunia, ele inania, ele ukkuinia, ele tatogania, ele monenia kalulut aku samba kalulut Katuareman Simaeru, 30ka tetere kineneiget pei le isisilo sangotu ngaminca lalep, saraina, maniu, ina, tatoga, mone, kenanen ka bagat paoreat. Samba ka gogoi sialu ikepmakenangan purimanuaiat sitaitatata. 31#Mat. 20:16; Luk. 13:30 Tapoi maigi sipuboboiki ibabailiu sikateitei samba sikateitei ibabailiu sipuboboiki.”
Pangasegekat Jesus sikatelunia pagalaiat kamateiatnia
(Mat. 20:17-19; Luk. 18:31-34)
32Ai sia mueenung raei ka Jerusalem, Jesus samba sipasiuluinia, boikiakenangan tubunia Jesus ka sipasiuluinia. Makiseinangan ka bagada sipasiuluinia samba sipasitutut ka teitei leu bailiu maloto. Ia geti sogainangan minca sipasiuluinia Jesus sarada segeakenangan ka matada sipuaaili geti ka tubunia. 33Kuanangan, “Aian tebai sita mananatara ka Jerusalem, seddangan te itusesegeake Togatsirimanua ka tai imam sabeu samba siagaisurat, raukum nia imatei samba rasegeake nia ka sipuarat sabulungan. 34Paloloirangan nia, lujirangan nia, boborangan nia samba mateiakerangan nia. Tapoi pasat telu ngagogoi suru nia minca.”
Panindogat Jakobus samba Johannes
(Mat. 20:20-28)
35Lepa oi si Jakobus samba si Johannes tatogat Sebedeus ka matat Jesus kuarangan ka matania, “Guru, ai tiddogetmai akenenenu ka kai.” 36Kuanangan ka matada, “Aponia tiddogetmui akenenku ka kam?” 37Kuarangan ka matania, “Bule nukau kai muuddet sara kai kattoet, sara kai katsiunu ka pulatsanannu geti.”
38 #
Luk. 12:50
Kuanangan ka matada Jesus, “Ta nuagai kam tiddogetmui. Momoi pa nulo kam ka pulokat pangoringan loketku? Ele momoi pa turau kam pasiraukat rauakenen ka tubuku?”
39Alegirangan nia, “Momoi.”
Kuanangan ka matada Jesus, “Nulolo tedda kam ka pulokat pangoringan loketku, samba turarau tedda kam pasiraukat rauakenen ka tubuku. 40Tapoi muuddet kai kattoet ele kai katsiuku, ta aku tuteteu. Aipoi sipuuddet sedda sarat sia pinatarek Taikamanua le.”
41Kele araarep nia sipasiului sipulu, mangoingoinangan bagada kai Jakobus samba kai Johannes. 42#Luk. 22:25, 26 Ia geti sogainangan sia Jesus kuanangan ka matada, “Nuagai kam, saute ka polak, masipaneinei bangsada le sia, samba sia siabeu mugege le ka tubuda. 43#Mat. 23:11; Mrk. 9:35; Luk. 22:26 Ka kam geti bui kisedda. Ke ai ka talagamui sioba muabeu, kau le ibailiu nia sipuuku kam. 44Samba ke ai ka talagamui sioba muute, kau le ibailiu nia paguguletmui. 45Aipoi beri Togatsirimanua ta mubeunan aioi, mupagugulet le samba masikau engania panebui simigi.”
Ialeake si Bartimeus simapeset Jesus
(Mat. 20:29-34; Luk. 18:35-43)
46Ia geti sege Jesus ka Jeriko. Kele aituitui Jesus samba sipasiuluinia samba sirimanua simigi ka Jeriko, ai sara simapeset sipuoni si Bartimeus, togat Timeus, ai nia mukukuddu ka bebet enungan manindou panguruat. 47Kele aiarep Jesus tai Natsaret le tusasabau pugereinangan, “Jesus, Togat David, kau imakate bagam kaku!”
48Aserangan nia sirimanua simigi ipumengmeng. Tapoi ia pei iabeuake ipugerei, “Togat David, kau imakate bagam kaku!”
49I geti tokko Jesus, kuanangan, “Sogai kam nia.”
Sogairangan simapeset, kuarangan ka matania, “Bui imakarat bagam, suruake ekeu, aisogaian ekeu Jesus.”
50Ribbaiakenangan sobbenia simapeset, suru nia iei ka Jesus. 51Kuanangan ka matania Jesus, “Aponia noba kugalai ka tubum?”
Aleginangan nia simapeset, “Bule imaitco mataku, Guru.” 52Kuanangan ka matania Jesus, “Kenanan, aiabauakean ekeu tonem bagam.” Maitconangan leu et matania, tutnangan Jesus ka puenunganannia.
Currently Selected:
Mrk. 10: MWV
Highlight
Copy
Compare
Share
Want to have your highlights saved across all your devices? Sign up or sign in
@LAI 2015
