Mik. 6

Pasuksungan Tuhan ka tubutdra tai Israel

1Arepake kam pasuksungan Tuhan ka tai Israel. Suruake ekeu, oi Tuhan, segeakean kuanenNu! Eddangannia leleu samba tinambu masiarepi tiboietNu.

2Ale leleu, ale saisai polak arepmake segeakenen Tuhan! Ai Nia pakakaro ka tai Israel paamianNia samba ituntut sia.

3Kuanangan si Tuhan, Kam sapaamianKu, aponia akugalai katubumui? Ka bagat aponia akusaggoiji kam? Alegi kam! 4#2Mos. 4:10-16, 12:50-51, 15:20 Aku belaakean kam ka Misir samba akubelaakean kam ka paoreat; akukoiniakean si Mose, si Harun, samba si Meryam masipanenei kam. 5#4Mos. 22:2–24:25; Jos. 3:1–4:19 SapaamianKu, repdep kam siisiakenen Balak rimatadra tai Moab ka tubumui, samba apania aialegi si Bileam, togat Beor ka tubunia. Repdepkam aponia sipuaaili kapuenunganan kapaoggangan pusapougat ka Sitim samba ka Gilgat. Ke nurepdep bai kam sangamberinia nenda, agaimuan sigalaiku masipaarau kam.

Panguruat siobat Tuhan

6Aponia tapangunguruatnake ka tubut Tuhan Taikamanua ka manua, kebai moi sita paruru' ka tubuNia? Taambit pa jaui sibautubu, simalainge bule' tapanguruatakenia sibailiu buluakenenta ka tubuNia? 7Maangka leu pa bagania si Tuhan ketaambit katubuNia sipuriribu biribiri ele tulat zaitun simalilimai? Tapangunguruatake pa katubunia togatta sikebbukat sitebui jotta? 8Ta! Aipatoilaan poi simaeru ka tubutta si Tuhan. BesiakenenNia ka tubutta geti iate bule tagalaiake simaroipo, masiparaboatnake pununtuat baga, puepekat paatuat, masisuraake puririmanua ka Taikamanuanta.

9Bulat sipaatu muloto kai Tuhan. Pusoganangan ka sipulalagggai, “Arepake kam ale kam siparuru ka laggai! 10Kalalepda si jo ai bibilet sibara kapatajuat rapakei kirekat sikatai, sara galaiakenen kasitsitakenenKu. Sia sipasigalaiake bui ta' kuukumake. Kuaappeaake pa sia sipakei kilo sikatai?. 11Kuobaake pa' masiappeake sirimanua sipasiaambit kilo sikatai? 12Simakayo ka laggainu masiorei simageba, samba kam sangamberimui simaboko. 13Kineiget kutaddaake masibobo samba masipakatai kam kalulut jomui. 14Pukommuian tapoi tak maengtek, sarat malaje. Abbitnungan bibilet, bule nupasikelinia. Aponia nupasikelinia pakataikuingannia kapasaggangan. 15Pangarapnungan gandum tapoi tak numomonei buania. Galainungan tula sibara kabuat zaitun, tapoi tak momoi nupakei tulania. Piotnunganm buat anggur, tapoi tak nulolo'. 16#1Rim. 16:23-34, 21:25-26 Aibara nenda sangamberinia Kalulut tututnu katai sigalai rimata Omri samba togania iate rimata Ahab. Anututnan poi enunganda kalulut nenda pakataikungan ekeu samba geigeirangan ekeu samba teleirangan ekeu samberi bangsa.

Currently Selected:

Mik. 6: MWV

Highlight

Copy

Compare