Mik. 5

Palelengan Taikamanua pagalaiat sipuute sibara ka Betlehem

1 # Mat. 2:6; Joh. 7:42 Kuanangan si Tuhan, “Oi ekeu Betlehem Efrata, sara laggai sigoiso' ka Jehuda! Katubum Kususuruake te sara sipaneneinei Israel.”

2Oto, iobaake' le paamiannia si Tuhan raguruki sia taisaggakdra teret iteuake' sinanalep nenda ibailiunia ina sipasitu'tu'ake matania. Lepa' nenda sangamberidra sia sikuddu ka pasiribbaiat tupatabra sia minca' ka bangsadra.

3Iageti galaiakenangannia samba jagonangan sia kabagat ron Tuhan,

kabagat puaabeu onin Tuhan Taikamanuania;

pukuddurangan leu simariuriu,

kalulut kineneiget ibailiu le nia siabeu

pat aili ka tu'tut polak,

4samba bailiunangannia paabanan.

Ke'bai tuguru Asyur ka laggaita

samba ke'bai rapaperaki polakta,

iageti ei sia masisaggangi sia pitu pasijago,

samba balu sipasiuteake sirimanua.

5 # 1Mos. 10:8-11 Sia nenda rakalaake' le laggai Asyur pasamba lanjau

samba laggai Nimrod pasamba lanjau situooppat;

belaakerangan geti sita ka Asyur,

ke' bai tugurunia ka laggaita samba masipaperaki laggaita.

6Tai Israel sipulelegei bailiunangan sia tinobut simaleppet sibara kai Tuhan, masileppeni bangsa simigi, samba kele iurani siureman. Puaddairangan ka Taikamanua, samba ta kasirimanua. 7Tai israel sipukukuddu ka talagatda sangamberi bangsa kele singa katalagat tarimeu ka leleu ele ka talagat mungkuat biribiri ka su'su' simaparou. Tugurunangan singa ka talagat mungkuat biribiri nenda paperakinangan sia samba pasabbanginangan sia! Beri sara sia siooi masibelaake biribiri nenda. 8Israel masikalaake' saggaknia samba pakatainangan sia sangamberidra.

9Kuanangan si Tuhan, “ka teteret nenda sapruakekungan sangamberi kuromui samba subuakekungan kereta pasaggaknu. 10Tobbou laggaimui sibara kekre Kupakakatai le', samba sangamberi pujagoat mui Kuraragatnake le'. 11Jagot tubum Kutatataake le' samba sangamberi siagai mupatuptuman Kukaritnake. 12Pakataikungan leu et sangamberi tularat samba bukku arigi kalotoakenen keramatnu; taan nupaninindogi kam buluijiet sigalai kabeinu. 13Bukkatnakekungan arigit katsailamui taikamanuan Asyur ka laggaimui, samba laggainu sibara kekre pakataikunganNia. 14Ka bagat goluKu sabeu siliakekungan pukakatai ka sangamberi bangsa sitaimareddet ka tubuKu.”

Currently Selected:

Mik. 5: MWV

Highlight

Copy

Compare