Mik. 2

Uktuk tubutda sipasioorei si mageba

1Paan te kakam siisiake sikatai, kenanen ai kam memerep sinoibo, lepa galaiakerangannia simanceman aipoi aironda masigalaiakenia. 2Kemakiddi bagada masibakkati mone, rauraurangannia. Kemakiddi bagada masibakkati lalep, alaurangania. Bibilet samba lalep, taanai simaaman.

3Ia geti kuangan si Tuhan, “Kuusiake' le pasisiobat ka tubumui bule bui ioi nubela kam. Kateteret taimaungtuk taan mueenung kam kabagat buak paatuat. 4Uktuk tubum rapakei le sirimanua sibailui pasailukat, samba leu ragalai urai pureureugat baga.

Aialaan si Tuhan laggaimai nene

samba aikauannia ketubutda sipasiuukumkai.

5Kelulut nenda, keaiailingan teterenia itutoiliake laggai nenda katubutda sabangsat Tuhan, berisara katalagamui sipasisilo rubeiatna.

6Sirimanua mungantoman katubukku, kuanangan, “Bui nupungantoman katubumai. Bui nupungantoman pagalaiat sangamberinia nenda. Taipakakailakai. 7Bui nupaatukam tai Israel aiteleian sia si Tuhan! taigagalaiake kele nenda si Tuhan. Maom le bagaNia. Tapa amanibonganNia kaerut baga katubutda sirimanua sipasigagalaiake simaroipo?”

8“Aleginangannia siTuhan, kam te sipasisaggangi paamianku. Toili sia kapasaggangan rakaroni masanang le sia kalalepdra, tapoi anungena le kam sia sedda bule' nuraurau kam lalepdra. 9Tainanalep katalagat paamianku tuituiakemuian sia ka lalep simanuntu bagadra, samba rauraumuian sia teret buruburu'. Bujai kukau katubut tatogadra. 10Suruake' ekeu samba tuitui ekeu; sene' taanai amaaman. Jo samba paoreat aibaraake simakope ka kudduat nene.

11Nuoba' kam nabi sioba paboko samba pataju samba sioba masitoggaiji bule ibara anggur samba lo simapuinengen simalilimai.”

Palelengan pagalaiat katuaragat

12Kuanangan minca si Tuhan, “Kam tai israel sipulelegei! Kurururuake te kam samba Kusaraake kele biribiri sitotoili ka gelinia. Kele biribiri ka su'sut parou, kisedda leu et laggaimui sun minca sirimanua.

13Buka'akekungan enungan samba ambitkungan kam bela ka pasiribbaiat. Pakataimuian gugurukat samba ei kam ka siobat bagamui. Aku, si Tuhan, iate Rimatamui samba sibelaake' kam.”

Currently Selected:

Mik. 2: MWV

Highlight

Copy

Compare