Mat. 3
3
Johannes Sipasirarau
(Mrk. 1:1-8; Luk. 3:1-18; Joh. 1:19-28)
1Ka teterenia nenda oi si Johannes Sipasirarau mungantoman ka simatangeu Judea, 2#Mat. 4:17; Mrk. 1:15 kuanangan, “Bauake kam paatuatmui, amalegerengan poi Purimataat Sorga!” 3#Jes. 40:3 Nia te nene ikukua nabi Jesaya sikuania kise,
“Ai nganga sipusosoga ka simatangeu,
‘Tarekngake kam enungan Tuhan;
roipoake kam pusilaiatnia.’ ”
4 #
2Rim. 1:8
Leppei Johannes geti bulut onta le, akkik tengania kulit, komennia sin samba suat mani. 5Belarangan tai Jerusalem samba sangamberi tai Judea samba sikuddu ka riringan Jordan ratagetnake nia. 6Seseakerangan joda, raunangan sia si Johannes ka oinan Jordan.
7 #
Mat. 12:34, 23:33 Tapoi kele aiitco maigi tai Parise samba tai Saduse amoi masitiddou turau, kuanangan ka matada, “Kam saulou, kasei amasikua ka matamui momoi nukatsiliake kam tubumui ka golut Taikamanua sibabara geti? 8Patoila kam buat katubabau paatuatmui. 9#Joh. 8:33 Bui te nukua kam ka paatuatmui, ‘Si Abraham le ukkuimai.’ Kukua nia ka matamui: Momoi le ibaraake tatogat Abraham Taikamanua ka bukku nene! 10#Mat. 7:19 Atutarekngakean baliok ka pailakkik loina; senen loina taibuaake bua simaeru, tutatadde le, gik ka api. 11Aku kaku oinan le kukakau masirau kam toggaiat katubabau paatuatmui; siooi kuruk teiteiku geti rauakenennia ka kam Ketsat Sipunenan samba api le, nia pei le poi abeu kaku, beri masiambit tarangainia ta mateu aku. 12Sasatsat aian ka kabeinia; satsatnangan bera pat lina. Berania iruruake ka kudduat pangoirikat, pora geti ilaboake ka api sitaipepee.”
Katuraukat Jesus
(Mrk. 1:9-11; Luk. 3:21-22)
13Ka teterenia nenda oi Jesus ka oinan Jordan barania ka Galilea, bule irau nia si Johannes. 14Tapoi aikeraake le si Johannes, kuanangan, “Aku le mateu nurau, kaku kodda nuoi?”
15Aleginangan nia Jesus, “Eddangannia boiki. Kisedda poi mateu ka sita masisutnake sangamberi siobat Taikamanua.” Reddetnangan nia si Johannes.
16Lepa aiturau Jesus tusakainangan ka pata; tubukanangan manua, itconangan tugorosot Ketsat Taikamanua kele tubut ngorut tuleu ka tubunia. 17#1Mos. 22:2; Psalm. 2:7; Jes. 42:1; Mat. 12:18, 17:5; Mrk. 1:11; Luk. 9:35 Maarepnangan nganga sibara ka sorga masikua, “Nene te Togaku, kilibet bagaku, obaket bagaku te nia.”
Currently Selected:
Mat. 3: MWV
Highlight
Copy
Compare
Share
Want to have your highlights saved across all your devices? Sign up or sign in
@LAI 2015
