Mat. 12
12
Sipasiului masiakpek bera ka gogoi Sabat
(Mrk. 2:23-28; Luk. 6:1-5)
1 #
5Mos. 23:25
Ka teteret nenda ka gogoi Sabat amuenung Jesus ka bera. Lajeda sipasiuluinia akpekrangan ottit bera komrangan nia. 2Kele araitco nene tai Parise kuarangan ka matat Jesus, “Itco pei sipasiuluinu ragalai simakeikei tugalai ka gogoi Sabat.”
3 #
1Sam. 21:1-6
Kuanangan ka matada Jesus, “Tapei anubasa kam sigalai David ka teteret aimalaje sambada saaleinia? 4#3Mos. 24:9 Guru nia ka Uman Taikamanua, komnangan roti simakeikei, sitaioi ikom ele saaleinia, sarat tai imam le? 5#4Mos. 28:9, 10 Ele tapei anubasa kam ka buko Surukat, raapaake gogoi Sabat tai imam ka Uman Taikamanua, tapoi ta tuseseleake sia? 6Kukua nia ka matamui: Sisaliu pei le Uman Taikamanua ai nia sene. 7#Hos. 6:6; Mat. 9:13 Nuagai bai kam katukolobat tiboiet nene, ‘Katet baga le siobaku, ta buluakenen,’ ta nujojoake kam sitaimasele. 8Aipoi Togatsirimanua Tuhan gogoi Sabat le.”
Pasialeat simasakit kabei sangasila ka gogoi Sabat
(Mrk. 3:1-6; Luk. 6:6-11)
9Lepa tui Jesus sedda ei nia ka uma parurukatda. 10Sedda aian sara sirimanua simasakit kabei sangasila. Bule ioi rajoake Jesus nounourangan nia kuarangan, “Momoi leu tualeake sirimanua ka gogoi Sabat?”
11 #
Luk. 14:5
Kuanangan ka matada Jesus, “Ke ai sara ka talagamui sibara biribiri sangamuneng, samba biribiri nenda bele ka bagat guluggu ka gogoi Sabat, ta pa ilalaba ibelaake nia? 12Iangan pa sirimanua sisaliu pei le biribiri. Oto momoi tugalai galajet simaeru ka gogoi Sabat.” 13Lepa kuanangan ka matat sirimanua nenda, “Totoiake kabeinu!”
Totoiakenangan nia, malenangan leu kabeinia kele kabeinia sila. 14Lepa bela sia tai Parise, pukererangan baga masimateiake Jesus.
Pagugulet sipilit Taikamanua
15Kele aiagai paatuatda Jesus tuitui nia sedda. Ia geti tutrangan nia sirimanua simigi, aleakenangan sia sangamberida. 16Tapoi ikera le sia bui rakua nia ka sirimanua, 17bule ipuaili siniboi nabi Jesaya,
18 #
Jes. 42:1-4
“Ia te nene paguguletku sipiliku,
kilibet bagaku, obaket bagaku.
Kukakau Ketsatku ka tubunia,
samba ipaagai puroipoat ka tai bangsa.
19Ta mugegege nia, ta mugegerei nia,
ta tuaarep ngangania ka enungan.
20Popoupou situlelemu ta itatakkiake, kape sipukukujuk ta ipepeake,
teret imanangake puroipoat.
21Ka tubunangan le rapukakaronan tai bangsa.”
Jesus samba Beelsebul
(Mrk. 3:20-30; Luk. 11:14-23)
22Lepa taroakerangan ka matat Jesus sara simapeset taiagai manibo pinasaileu sanitu. Aleakenangan nia Jesus, againangan manibo samba maitconangan matania. 23Makiseinangan ka bagada sirimanua simigi kuarangan, “Taleu niangan ne Togat David?”
24 #
Mat. 9:34, 10:25 Kele araarep nia tai Parise kuarangan, “Ka geget Beelsebul, utera sanitu le ipasiusi sanitu sinene.”
25Iagai le poi Jesus paatuatda kuanangan ka matada, “Senen purimataat sipaaggara pasasambada, matatangeu le, samba senen laggai ele lalep sipaaggara pasasambada ta matotom. 26Kisedda leu ke Sanitu masiusiake Sanitu, aisaggangingan tubunia; matotom pa purimataatnia? 27Oto ke ka geget Beelsebul kupasiusi sanitu, ka geget kaseian le rapasiusi ka sia tatogamui? Bailiu siangan le geti masiuukumake kam! 28Tapoi ke ka geget Ketsat Taikamanua le kupasiusi sanitu, aian te ka talagamui Purimataat Taikamanua.
29Kipa te iooi iguruki sirimanua lalep sara sirimanua simagege masiraurau bibiletnia, ke ta ikabe boiki simagege nenda? Ia pei oi iparauragi bibiletnia.
30 #
Mrk. 9:40
Sitaipaalei aku, saggakku te nia; sitaipaalei aku masiruru, sipasisasaragai te nia. 31Oto kukua nia ka matamui: Sangamberi jo samba paloloiat sirimanua tuaappeake; tapoi paloloiat ka Ketsat Sipunenan geti ta tuaappeake. 32#Luk. 12:10 Samba kasei sipakatai nganga ka Togatsirimanua tuaappeake nia; tapoi sipakatai nganga ka Ketsat Sipunenan, ta tuaappeake nia barania kise teret buruburu.”
Loina samba buania
(Luk. 6:43-45)
33 #
Mat. 7:20; Luk. 6:44 “Pasi pei kam loina, maeru loina, maeru buania; ele makatai loina, makatai leu buania. Aipoi ka buania le ituaagai loina. 34#Mat. 3:7, 15:18, 23:33; Luk. 3:7, 6:45 Kam saulou, kipa te iooi nutiboi kam simaeru, sikatai le kam? Aipoi sitububura ka paatuat ia te ititiboake ngungu. 35Sirimanua simaeru masibelaake simaeru sibara ka paatuatnia simaeru; sirimanua sikatai masibelaake sikatai sibara ka paatuatnia sikatai.
36Tapoi kukua nia ka matamui: senen tiboiet si ta galai siniboira sirimanua, raalegi te ka gogoi pasiukuman. 37Siripot tiboietnu le poi ituparoroipo ekeu, samba siripot tiboietnu leu ituuukumake ekeu.”
Katuaggaiat nabi Jona
(Mrk. 8:11-12; Luk. 11:29-32)
38 #
Mat. 16:1; Mrk. 8:11; Luk. 11:16 Ka teteret nenda ai piga pa siagaisurat samba tai Parise sipasikukua ka matat Jesus, “Guru, koba kuitco kai kereknu.”
39 #
Mat. 16:4; Mrk. 8:12 Alegina le nia Jesus, “Reddenan sikatai samba sipaeelet nene masitiddou kerek; ta tukakau kerek ka sia, katuaggaiat nabi Jona le tukakau ka sia. 40#Jon. 1:17 Aipoi kele si Jona ka balugut kuilukuilu telu ngagogoi telu ngasoibo, kisedda leu te Togatsirimanua ka unou polak telu ngagogoi telu ngasoibo. 41#Jon. 3:5 Ka gogoi pasiukuman, tususuru te tai Ninipe sambada reddenan nene samba masiseleake sia, arabauake poi paatuatda ka sia aarepda ngantoman Jona, tapoi sene ai sisaliu pei le beunan Jona! 42#1Rim. 10:1-10; 2Taw. 9:1-12 Ka gogoi pasiukuman tususuru te rimata sinanalep sibara ka Kaiaman sambada reddenan nene samba masiseleake sia. Aipoi barania ka tutut polak ka sia oi nia masiarep sikut paatuat Salomo; tapoi sene ai sisaliu pei le beunan Salomo.”
Katotoilit sanitu
(Luk. 11:24-26)
43“Kele aibela sanitu ka tubut sirimanua, putebanangan ka polak simagarak igaba puariat; tapoi ta aisese. 44Ia geti kuanangan, ‘Kusosoksokngan le ka lalep sikaddiuakenenku.’ Sege nia, itconangan lalep si ta ka bagangan le, amalinaan, amalaingengan. 45Lepa ei nia masiala pitu ketsat bagei sisaliu pei le katainia, guru sia pukuddurangan ka tubut sirimanua nenda. Makopenangan katai sirimanua nenda bele pei ka panandaatnia. Kise leu te muaaili ka reddenan sikatai nene.”
Ina samba sasarainan Jesus
(Mrk. 3:31-35; Luk. 8:19-21)
46Ai pei le Jesus maninibo ka sirimanua simigi, oi inania samba sasarainania ka gerat raoba masipatiboake nia. 47Lepa oi sara sirimanua masikua ka matania, “Kodda inam samba sasarainam muririo ka gerat raoba masipatiboake ekeu.”
48Aleginangan nia Jesus kuanangan ka matat sipasisesegeake ka matania, “Kasei inangku? Kasei sasarainangku?” 49Totoiakenangan kabeinia ka sipasiuluinia kuanangan, “Koi ne inangku samba sasarainangku! 50Kasei poi sigalai siobat bagat Ukkuiku ka sorga, nia te sarainangku, nia te maniuku, nia te inangku.”
Currently Selected:
Mat. 12: MWV
Highlight
Copy
Compare
Share
Want to have your highlights saved across all your devices? Sign up or sign in
@LAI 2015
