Mat. 11
11
Ikoiniake sipasiuluinia si Johannes Sipasirarau masirere Jesus
(Luk. 7:18-35)
1Lepa aipatone sipasiuluinia sipulurua Jesus tuitui nia mei masigelaiake sirimanua samba mungantoman ka laggaira.
2Kele aiarep sigalai Kristus si Johannes ai nia ka bagat penjara, koiniakenangan sipasiuluinia masirere nia, 3“Ekeu leu siooi ele sabagei pei le ngenaakenenmai?”
4Aleginangan nia Jesus kuanangan ka matada, “Kenan kam segeake kam kai Johannes siarepmui samba siitcomui: 5#Jes. 35:5, 6, 61:1 Amaitcoan matada simapeset, amuenungan simasakit, amalengan sia simabogbong, amaarepman piura simatakkep, atusurungan simamatei samba Katuareman Simaeru atusegeakean ka simageba. 6Ia geti mauktuk te sitaimabele baga ka tubuku.”
7Kele aratuitui sipasiului Johannes, taddakenangan Jesus masitiboi ka matada sirimanua simigi pagalaiat si Johannes, “Aponia nubebesiake kam nuitco kam anuei kam ka simatangeu? Masiitco popoupou pinauilat rusa? 8Masiitco apa te nueei kam? Masiitco sirimanua sipuleleppei simaramo? Sipuleleppei simaramo geti ai le sia ka lalepda tai rimata. 9Oto masiitco apa le nubebela kam? Masiitco nabi? Bulatnia, tapoi kukua nia ka matamui, saliu pei le nabi. 10#Malk. 3:1 Nia te nene sikuania ka Surat Sipunenan,
‘Kukokoiniake te pakoinietku
muboiki kekeu,
masitarekngake enungannu.’
11Kukua nia ka matamui: Ka talagat sirimanua sinutuakenenda tainanalep, ta anai sisaliu beunan Johannes Sipasirarau. Tapoi kenanen kisedda, sigoisonia ka bagat Purimataat Sorga, nia pei le abeu kai Johannes Sipasirarau. 12#Luk. 16:16 Barania ka gogoi Johannes Sipasirarau teret kineneiget Purimataat Sorga sarat pabuenen, sia sipasibubuet masibesiake masikupkup. 13Aipoi sangamberi tai nabi samba Surukat Mose pat aili kaoijanan Johannes, masipoiliat pagalaiat Purimataat Sorga. 14#Malk. 4:5; Mat. 17:10-13; Mrk. 9:11-13 Oto ke nulelekngake kam nia, si Johannes nene te si Elia siooi. 15Kasei sibara talinga kau iarepmake nia!
16Kaipa pa kupakekereake sia reddenan nene? Makere le sia ka tatoga sikuddu ka pasakiat sipusosoga ka saaleira masikua, 17‘Akuteubaan kai kam, ta amuturu kam; amugeringan kai, ta amusou kam!’ 18Oi poi si Johannes taipukokom samba taipulolo kuarangan, ‘Ai sanitu ka tubunia!’ 19Lepa oi Togatsirimanua sipukokom samba sipulolo, kuarangan, ‘Simaereu kokom, simalo anggur, suruakda sipuuku cukai samba sijo!’ Sikut paatuat Taikamanua geti galajetnia le ipakokoinong nia.”
Laggai simakela paatuat
(Luk. 10:13-15)
20Lepa taddaakenangan Jesus masipateleiji laggai, ka sigalaina maigi kerek, lulut taibabauakera paatuatda. 21#Jes. 23:1-18; Jehz. 26:1–28:26; Jol. 3:4-8; Ams. 1:9, 10; Zakh. 9:2-4 “Paan te kekeu Korasin! Paan te kekeu Betsaida! Aipoi ke ka Tirus samba Sidon bai tugalai kerek kele sigalaiakenen ka kam, taan taagai buru arapuleppei goni mukuddu ka abu rabauake paatuatda. 22Tapoi kukua nia ka matamui: Ka gogoi pasiukuman, ukuman laggai Tirus samba Sidon pei le makalabbei ka kam! 23#1Mos. 19:24-28; Jes. 14:13-15 Ekeu leu Kapernaum, nububuakngake pa tubum teret ka sorga? Turiribbaiake le ekeu ka narako! Aipoi ke ka Sodom bai tugalai kerek kele sigalaiakenen kekeu, ai pei le Sodom teret kineneiget. 24#Mat. 10:15; Luk. 10:12 Kukua nia ka matamui: Ka gogoi pasiukuman, ukuman laggai Sodom pei le makalabbei kekeu!”
Pasogaiat Tuhan Jesus ka simasaggo tubu
(Luk. 10:21-22)
25Ka teteret nenda kuanangan Jesus, “Kuumun ekeu Ukkui, Tuhan manua samba polak, anupakele poi nene ka simaagai samba simasiku paatuat, ka sigoiso tiboi tubu le anupoiliat nia. 26Oo Ukkui, ia poi ne obaket bagam.
27 #
Joh. 1:18, 3:35, 10:15 Sangamberinia aisegeakean Ukkuiku ka tubuku. Samba ta anai sipasiaagai Toga, sarat Ukkui le; ia leu et ta anai sipasiaagai Ukkui, sarat Toga le samba sia ka siobat Toga masipoiliat Ukkui ka matada.
28Konan kam kaku, kam simasaggo tubu samba simaoru ambinen, kuaroiake kam. 29#Jer. 6:16 Bairat kam bairanenku, alaki kam kaku, simaleppe baga poi aku samba simaepe paatuat, ipuaroi ketsatmui. 30Maramo le poi bairanenku samba masing le bairatnakenenku ka kam.”
Currently Selected:
Mat. 11: MWV
Highlight
Copy
Compare
Share
Want to have your highlights saved across all your devices? Sign up or sign in
@LAI 2015
