Hos. 5

Palotokat katubut Israel samba ka siuteakenia

1Kuanangan si Tuhan, “Arep pei te kam, ale kam tai Imam! Lelekngake pei te kam, Ale tai Israel! Arep pei te kam, Ale kam sangamberi muntogat rimata! Atutakkiakean te ukuman ka tubumui. Aipoi simateunangan nupasiukum kam simaroipo, tapoi aibailok le kam kele luluplup ka Mizpa, kele sesere ka leleu Tabor. 2Samba kele guluggu simakeru ka Sitim. Kelulut nenda Aku masiukum kam sangamberimui! 3Kuagai le sangamberinia pagalaiat tubumui, ale kam tai Israel! Ta' momoi nupakele apapa katubukku. Anupanindogingan sabulungan samba tat matopit ekeu katubukku. Kalulut nenda sangamberi sirimanua taat mateu nupanindou kam kaku minca. Golu kalulut pasibubuluiji sabulungan.

4Pukakatai sigalai tai Israel sikau sia ta ioi ratoili ka tubut Taikamanuandra. Aitarakupman sia pasibuluiji sabulungan. 5Matoila le pubuangan patuatdra tai Israel samba aibailiuan toggaiat puseleatdra. Jodra leu sikau sia tusoksok samba bele, samba bangsa Jehuda leu bele le sia simakere. 6Mei sia masigaba si Tuhan masiabbit biribiri samba jaui addeat buluakenen, tapoi sangamberinia nenda ta'anai katukaunannia. Aipoi aikaddiuakean sia si Tuhan, samba ta'an raseseseNia. 7Ta' matopit sia kai Tuhan, tatogadra leu ta'tatogaNia. Kalulut nenda tat mauju te tumateiake sia samba sangamberi monendra.

Israel masitiddou paroman tapoi siboboi

8Piau le trompet ka Gibea! Nauake toggaiat pasogaiat pamamatei ka Roma! Gereiake katci pasaggangan ka Babel! Kawan kam tai Benjamin, kenannan kam pasaggak! 9Mateirangan te geti tai Israel, aipoi aiailingan te gogoinia addeat masiukumnia. Arep pei te kam, ale kam rakyat Israel, pagalaiat nenda, bulat muaaili le geti.

10Kuanangan si Tuhan, “Kupugogolu kalulut sangamberi siuteake tai Jehuda arasaggangingan tai Israel samba raraurau polakdra kalulut nenda orakakekungan geti ukuman katubutda kele eba. 11Tuukum le tai Israel; masitataake pubabakkatnia ka polaknia, kalulut aikaroake le addeat manindou paroman ka tubut sitaiooi sibulatnia isese masiropmakenia. 12Nenda te lulunia, Kupakatai geti bangsa Israel, samba kupamamatei tai Jehuda.

13Bangsa Israel samba bangsa Jehuda ai raseseake puririmanuandra sikatai, iageti ei tai Isarel ka Asyur masitiddou paroman ka rimata sabeu. Tapoi rimata nenda ta'momoi masiropmake ele masipaeru puririmanuandra. 14Kele ipasaggak singa, kisedda te Kusabbak geti tai Israel samba tai Jehuda. Sarakku le masipabibirit sia, lepa kaddiuakekungan sia. Ke Kugirit sia ratuitui, berisara sia sioi masibelaake sia.

15Kukakaddiuake le geti paamianKu teret sege rapangorik kalulut sangamberi jodra, lepa oi sia masigaba Aku. Buleu ka bagat pangongorikdra, besiakerangan geti masigaba Aku.”

Currently Selected:

Hos. 5: MWV

Highlight

Copy

Compare