Hos. 13

Efraim iorak le geti golut Tuhan

1Siburu suku Efraim rasusuru bailiunangan ke ai sipupaparenta sibara ka suku nenda, sangamberi suku bagei ka Israel mareddet. Tapoi kalulut aramajo suku Efraim arabuluiji Baal, lulut nenda te sia geti ta'aratuottou. 2Pat aili kineneiget sangamberi tai Efraim nenda aipeile mariuriu ragalaiake jo; ragalai tularat perak addeat buluijietdra-tularat sipinaatut sirimanua samba sigalai kabei sirimanua arakua le, “Panguruatake le kam buluakenen ka sangamberi tularat nene!” Kiseiet, sirimanua masisigguk tularat togamui jaui! 3Kalulut nenda sangamberi sirimanua nenda tatata' le sia geti kele tinobut ele kujuk ka simanseman, iului sia lepa geti kele abu silabokat siboroiat rusa ka pamerakat gandum, samba kele kujuk sibebela ka kabelaiatnia.

4Kuanangan si Tuhan, “Aku te Tuhan Taikamanuam, siambit ekeu bela ka laggai Misir. Ta'anai Taikamanuamui bagei aku le. Aku te sarakku sipasiarau kam. 5#5Mos. 8:11-17 Ka polak simagarak ka simatangeu, aku te masijago kam. 6Tapoi kele anukudduiji kam laggai simaeru samba masege bagamui, mabuaknangan patuatmui samba kalipogimuian aku. 7Kalulut nenda burutikkungan geti kam kele singa. Kele macan tutul kualau kam ka enungan. 8Saggangikungan kam geti kele beruang simapepe togania. Pabiritkungan geti kam. Kele singa kutarakkup geti kam kakudduatmui, samba kele leiti simasabbakKu.”

9Kususubuake te kam, ale bangsa Israel! samba kasei momoi masiropake ekeu? 10#1Sam. 8:5-6 Tiddoumuian rimata samba sipasiuteake, tapoi kaipangan sia sangamberidra keneniget? Momoi leu pa sia masiarauake rakyatmui? 11#1Sam. 10:17-24, 15:26 Sialei golu akuake rimata katubumui samba kabagat oloi goluku kuake sia minca.

12Kuanangan si Tuhan, “Jo samba puseleadra tai Israel atusuratakean samba suratnia tukoiriake. 13Tai Israel ai oggak addeat murimanua, tapoi makope le taiagaira patuat bailiu ta'arapakei oggak nenda. Makere lenia kele toga ta'an mabuburu ipututu mata tapoi ta'ioba bela kabalugut inania. 14#1Kor. 15:55 Bangsa nene geti ta'kuaarauake sia kageget kamateiat, ale kamateiat, karapakean besinu! Galaiakean galaiakenennu masipasabu nenda! Ta'an kupunununtuki baga minca bangsa nene. 15Kenanen poi tai Israel maeru puririmanuandra kele turuturu simatutuket, tapoi kuaake le geti rusat kaiaman simaoloi sibara ka simatangeu. Rusa nenda te geti masigagarakaake sangamberi bubuakat oinan samba sangamberi sumur, bailiu tatanangan sangamberi simakeppu saki.

Currently Selected:

Hos. 13: MWV

Highlight

Copy

Compare