Hos. 12

Si Efraim samba si Jakob taikebbukatnia

1Kuanangan si Tuhan, “Aibokkoat aku boko samba pajoat bangsa Israel; bangsa Jehuda riuriu le rasaggangi aku, Taikamanua Sipunenan samba simatopit.

2Sangamberi sigalaira tai Israel barania kasimancep aili sinoibo ta'anai lulunia samba galainia masipakatai le kele rusat kaiaman. Pajoat samba tugrut tubu aituppai le katalagadra. Aragalaian sangamberi palelengan ka tai Asyur samba araambitan tula ka Misir sibailiu toggaiat pasuruangandra.

3Ai paukelat Tuhan pasamba bangsa Jehuda; ialeuet geti masiukum tai Israel kalulut puparaboanandra. Isisiliake geti sigalaira. 4#1Mos. 25:26 #1Mos. 32:24-26 Ai nia peile kabagat suruket, taikebbukatdra si jakob aisikklungan si Esau sarainania; samba kele aimabeunan, si Jakob palaba pasamba Taikamanua. 5#1Mos. 28:10-22 Palabaakenangan sara malaika, samba nia le amamanang. Iageti pusounangan samba tiddounangan tupanukani. Iageti oi Taikamanua kai Jakob taikebbukatdra nenda, samba patiborangan si Jakob. 6Taikamanua nenda iate Tuhan Sipulugege. Oninia iate Tuhan. Ka oni nenda te ikikiddi sirimanua manindou katubunia. 7Kalulut nenda, ale kam muntogat Jakob, kau matonem bagamui ka Taikamanuamui samba toiliake kam minca katubunia. Purimanua kam sisusun nuntut baga samba topit tubu, samba pasingena kam kabagat om baga teret Taikamanuamui masiteuake.

Patunan katutakkikat pagalaiat ukuman ka tai Israel

8Kuanangan si Tuhan, ka bangsa Israel, “Mapajoat kam kele tai Kanaan; sangamberi sipasisakiake raoba masibokoi lagganandra ka kilo sitaimaeru. 9Kineneiget amakayongan sita, ngangandra. “Mauktukngan sita! Ta'anai sia sara momoi masisuksuk atasese pukayaot nenda ka enungan sitaimaroipo.” 10#3Mos. 23:42-43 Tapoi aku Tuhan, Taikamanuamui, sipasiambit kam bela ka laggai Misir. Kuoba pei le' masikau kam mukuddu minca ka sapou kele siboiki kateteret Aku oi katubumui ka simatangeu.

11Amanibongan aku katubudra sangamberi tai nabi, samba kukau maigi katubudra pasiitco. Ka sia le kusesegeake sangamberi pinaatukku addeatmui, paamianku. 12Kenanen kisedda aipeile sibuluiji sabulungan ka Gilead, samba masibuluake jaui ka uddut kudduat pasibuluat ka Gilgal. Tapoi sia sibuluiji sabulungan nenda geti matei le sia, samba sangamberi kudduat pasibuluat ka Gilgal nenda geti ibailiu parurukat bukku kasangamberi mone.”

13 # 1Mos. 29:1-20 Taikebbukatta si Jakob amutuituiannia ka Mesopotamia, iageti addeat isese sinanalep, paguguletakenangan tubunia katubudra sirimanua sedda samba masijago biribirit sirimanua nenda. 14#2Mos. 12:50-51 Koiniakenangan sara nabi si Tuhan addeat masiambit tai Israel rabela ka paoreat ka Misir, samba addeat masijago sia. 15Aragalaiantai Israel ipugolu simakope si Tuhan, mateu tuukum sia kalulut pukakataira. Iukum le sia si nTuhan kalulut arabailiuake loloiet si Tuhan.

Currently Selected:

Hos. 12: MWV

Highlight

Copy

Compare