Hab. 3
3
Panindogat Habakuk
1Nene te panindogat Nabi Habakuk.
2Oi Tuhan, akuarep sangamberi sigalainu,
kele gora bagat paatuatku.
Bule sigalainu sabeu nenda nuoleake minca
samba nupatoila kateteremai nene.
Kau le nupununtuki kai baga
kenanen magolu bagam.
3Ekeu Taikamanua Sipululatcat siooi sibara ka laggai T'eman,
Amoi Ekeu baram ka paleleleu Paran.
Manua aisaluki pubebeunanNu;
polak sut le katuumananNu.
4Moi Ekeu pasamba toro simalatcat,
ka kabeinu bela toro simakirisau
Sedda te anulipputnake' gegem.
5Nugugluake' besi' muenung ka matam
samba kamateiat masitut teiteiNu.
6Ke' muari Ekeu pungeungeunangan polak,
ke' numattai bangsa-bangsa puattatrangan kalulut ge'ge'ra.
Paleleu leleu siturere siburu gatca;
patinambu-tinambu sipururura seddet.
Ka patinambu-tinambu nenda te.
Nupueenung barania ka siburu peile.
7Itco'kungan sipulaggai ka Kusyan aisaksakngan sia puloloto,
samba tai Midian mugeret tubutda.
8Oi Tuhan, kalulut koat le' pa' aitukarai logauNu?
paoinan-oinan le' pa aibaraake nupugolu?
‘Kele nupukuro samba kereta pasaggak nukudduiji tanai rusa,
ka teteret anukau kamanangan ka sapaamianNu.
9Anupatarekngan rourounu,
loguiNu matarekngan tupanaake
iageti sila'nungan polak bailiunangannia bagat oinan.
10Pangeungeunangan paleleu-leleu, masiitco Ekeu,
kamanua bara urat kele sipiliakenen.
Oinan ka tei polak ukku le ngangania,
onunia sabeu sipatutut amurouan.
11Torot palogui-loguiNu ola le itutui,
simuine bakkatNu kirisau lepa ipubila,
iageti puarinangan sulu samba laggo ka kudduatnia.
12Nuenungi polak ka ngoingoi bagam;
paperakinungan bangsa-bangsa ka bagat goluNu.
13Bela Ekeu masibelaake paamianNu,
samba masiarauake rimata sipilim.
Bo'bo'nungan siuteake sirimanua sikatai
Tata'akenungan sangamberi sipasitututnia.
14Oraknangan siloguiNu siuteake saladdudra tai saggak
ka teteret araoi saladdu kele ron talabari,
bule rapasabu kai.
Puga'ga'rangan ka angkat baga,
kele sirimanua sipumemengmeng masipaoreji sirimanua simageba.
15Pasamba kuro Nupaperaki koat simalio
samba koat sipumumusi.
16Masiarep nenda sedde' le bagakku
samba geret le bibokku,
sulei le tubukku aitata ron tubukku,
kaipa-kaipa le kupuenung soksoknangan rerekku.
Tenan aku meng masingenaake
ukuman Taikamanua katubutda sipasasaggak.
17Kenanen loina sileu ta'anai buania
samba loinat anggur ta'anai anggurnia,
kenanen pasimoneiat loinat zaitun ta'abara
samba buat gandum ka mone ta' aisiripoki,
kenanen matei sangamberinia biribiri
samba gelit tarimeu ta'anai ka bagania.
18Sarat muangka' baga le' aku,
aipoi Ekeu Tuhan Taikamanua le sipasiarau aku.
19 #
2Sam. 22:34; Psalm. 18:34 Ekeu masiake' ron tubukku
kele' reret simasusura, paronnungan rerekku.
Palulunungan aku bule' kumaarau
ka teteret kupuenung ka simaleleu.
Currently Selected:
Hab. 3: MWV
Highlight
Copy
Compare
Share
Want to have your highlights saved across all your devices? Sign up or sign in
@LAI 2015
