Jehz. 42

Sangamberi bili' addeatda tai imam

1lepa paaleinangan aku ka laibokat ka uja ka rubeiat ka bare' samba ambitnangan aku ka sangamberi bili' ka isit bare' sipamamattai ka polak simalio sikekre samba sipamamattai ka uma ka tutut sikaleleu. 2Nantat sangamberi bili' nenda ka isit bare iate sangotu ngaeto samba lionia lima pulu ngaeto. 3Sipamamattai ka sirua pulu ngaeto sibara ka laibokat ka baga samba pamattai ka bagat lalep bukku ka laibokat uja ai suilu sipamamattai samba sitelu uddutat. 4Ka matat sangamberi bili' nenda ai polou siei ka baga, lionia pulu ngaeto samba nantania sangotu ngaeto samba matat baliu katugurukat iate ka isit bare. 5Sangamberi bili' ka uddutat ka pata makagoiso bele peilde ka sangamberi bili' ka uddutat ka repe' samba uddutat ka tenga ka uma nenda, kalulut sangamberi suilu nenda maigi ikom kudduat ka sangamberi bili nenda. 6Aipoi sangamberi bili' sipuuddutat telu samba ta'anai ariginia kele ka laibokat ka uja. Nenda te lulunia sangamberi bili ka pata makagoiso bele pei sangamberi bili ka repe ele ka tenga. 7Ka uja, ai irip sipatutut ka bili, sipalelegre ka laibokat ka uja samba ai ka matat sangamberi bili'; nantania lima pulu ngaeto. 8Aipoi patunan bili' sipasosong ka laibokat ka uja nantania iate lima pulu ngaeto, tapoi patunan bili sipasosong ka Uma Sipunenan nantania sangotu ngaeto. 9Ka rubeiat ka repet sangamberi bili' nene ai matat baliu katugurukat sibara ka ipot sikalaut, ke raoba sirimanua tuguru kabagania baratda ka laibokat ka uja, 10samba matat baliu nenda ai ka bakkat ujat irip.

Ka isit ka kaiaman ka matat polak simalio sikekre nenda samba ka matat uma ka tutut sikaleleu ai leuet bili, 11samba ka matania ai polou. Sangamberi bili' nene makere ka sangamberi bili' ka isit bare', nantania samba lionia, sangamberi matat baliu samba katugalaiatnia. Kele sangamberi matat baliu katugurukat ka isit bare' 12kisedda te' sangamberi matat baliu ka tugurukat ka isit kaiaman. Ai leuet matat baliu ka bakkat enungan sipulilittenga kabebet irip, iate matat baliu sibara ka ipot sikalaut, ke' bai raoba sirimanua tuguru ka bagat sangamberi bili'.

13Lepa kuanangannia katubukku: “Sangamberi bili' ka bare' samba sangamberi bili' ka kaiaman sipamamatai ka polak simalio sikekre, nenda te' bili' sipunenan, kudduatda tai imam, simalegre kai Tuhan masikom sangamberi panguruat bulat sipunenan. Sedda te' geti rakau sangamberi panguruat bulat sipunenan, buluakenen sitotoiakenen, buluakenen pasiposat jo samba buluakenen pasiappet sele', aipoi kudduat nenda sipunenan. 14Ke' tuguru tai imam ka kudduat sipunenan, ta' bebela sia ka laibokat ka uja, ke tapei aragolok bibiletda sedda, sipakeira kateteret ragalaiake panindougat, aipoi sangamberi bibiletda nenda iate sipunenan. Buita rapakei le bibilet bagei, iapei te ioi raoi ka kudduat paamian Tuhan.”

Sangamberi kirekat kupkumen Uma Sipunenan

15Lepat ailepa aikireki sangamberi uma ka baga nenda, paaleinangan aku masialiake matat baliu gugurukat simattai ka isit sikalaut, lepa kirekinangan sangalio kupkumen Uma Sipunenan. 16Kirekinangan bebenia ka isit sikalaut pasamba tutura pasikire: limangotu ngaeto siripot tutura' pasikire. Lepa beliuakenangan tubunia 17samba kirekinangan bebet ka isit ka bare': limangotu ngaeto siripot tutura' pasikire'. Beliuakenangan tubunia minca 18ka bebet ka isit kaiaman samba kirekinangannia: limangotu ngaeto siripot tutura' pasikire'. 19Lepa geti beliuakenangan tubunia ka bebe ka isit sikaleleu samba kirekinangannia: limangotu ngaeto siripot tutura' pasikire'. 20Ka epat bebenia tukire'. Sangaliot kupkumen nenda ai irip: nantania limangotu ngaeto samba lionia limangotu ngaeto, sipasaraake sipunenan ka sitasipunenan.

Currently Selected:

Jehz. 42: MWV

Highlight

Copy

Compare