Jehz. 41

1Lepa geti ambitnangan aku ka kudduat simalio ka Uma' Sipunenan samba kirekinangan arigit iripnia saigit sene enem ngaeto keppunia samba saigit sedda enem ngaeto leuet. 2Liot matat baliu nenda iate pulunga ngaeto samba liot rupit be'benia iate lima ngaeto saigit sene samba lima ngaeto saigit sedda. Nantat bilik sabeu ikireki leuet; epat pulu ngaeto samba lionia rua pulu ngaeto. 3Lepa segenia ka kudduat simalio ka baga. Kirekinangan arigit iripnia: keppunia rua ngaeto, liot matat baliunia: enem ngaeto samba lionia samba liot rupit be'benia pitu ngaeto saigit sene' samba pitu ngaeto saigit sedda. 4Kirekinangan nantat kudduat simalio ka baga nenda: rua pulu ngaeto, lionia: rua pulu ngaeto siripot liot kudduat simalio nenda. Lepa kuanangan katubukku: “Nene te kudduat bulat sipunenan.”

5Lepa geti kirekinangan rupit Uma Sipunenan: enem ngaeto keppunia samba liot bili' bagei sibabara sigoilik Uma Sipunenan, epat ngaeto. 6Sangamberi tuppai bili'nenda ai telungauddutat samba ka senen uddutatnia ai telu pulu bili'. Ka sanglio rupit Uma Sipunenan ai tuppak siparon sangamberi tuppai bili nenda, aipoi sangamberi bili' nene ta'atulakkeakenia ka rupit Uma Sipunenan. 7Sangamberi tuppai bili' memei mabebeu bele peile ka uddutat siboiki teret ka uddutat sikatelu makere beunan tuppainia tuppak ka senen uddutat sangalio Uma Sipunenan nenda. Ai orat siailiake ka pata samba kalulut nenda oinangan ratusakai baratda ka uddutat karepe ka uddutat ka pata masisabau uddutat ka tengah. 8Itcokungan, apot Uma Sipunenan mabuak pei le ka sigoiliknia. Bongen tuppai bili' nenda beunannia sangatutura, iate buaknia enem ngaeto. 9Kepput rupi ka isit ujat tuppai bili iate lima ngaeto, liot rubeiat apot Uma Sipunenan sita'kabaga iate lima ngaeto. Ka paoggangan apot Uma Sipunenan nenda 10sangamberi bili' ai oggak rua pulu ngaeto sibokko Uma Sipunenan nenda. 11Sangamberi matat baliu tuppai bili ka uja ka rubeiat sita'kabaga nenda, sara matat baliu ka isit ka bare' samba sara matat baliu ka isit ka kaiaman, liot kudduat sita'kabaga nenda iate lima ngaeto lionia.

12Uma sikuddu ka polak simalio sikekre ka isit sikaleleu lionia pitu pulu ngaeto, samba rupi sigoiliknia keppunia lima ngaeto samba nantania siba ngaeto.

13Lepa kirekinangan Uma Sipunenan nenda: nantania sangatu ngaeto samba polak simalio sikekre pasamba uma samba rupinia: sangotu ngaeto leuet. 14Kasedda leuet liotnia matat Uma Sipunenan pasamba polak simalio sikekre ka isit ka sikalaut: sangotu ngaeto. 15Lepa geti kirekinangan nantat uma sibabara ka polak simalio sikekre ka isit sikaleleu pasamba sangamberi suilunia ka ruangasilania: sangotu ngaeto.

Kudduat simalio, kudduat ka baga samba kudduat ka uja 16tukekre pasamba lapri samba sigoilik katelu kudduat simalio nenda ai jendela sibara kekre samba suilu. Ka matat tagga' nenda sangamberi Uma Sipunenan tukekre pasamba lapri, barania kabagat lalep teret ka jandela, beringan jandela nene tusakkeri, 17teret ka rubeiat uddut matat baliu samba kudduat simalio ka baga samba leuet ka uja. Ka sangamberi rupi rubeiat ka baga samba ka uja tusurat 18sangamberi tularat malaika samba paloinaloinat korma, ka paoggangan rua tularat malaika ai sangaloina korma, senen tularat malaika nenda ai rua pumataat. 19Sangasila pumataat sirimanua samba sangasila minca pumataat singa simattai ka loinat korma nenda samba kasedda te tugalai ka sangalio Uma Sipunenan. 20Barania ka bagat lalep teret ka uddut matat baliu tusurat sangamberi tularat malaika samba sangamberi loinat korma ka rupi.

21Sangamberi arigi matat baliu sibara ka kudduat simalio iate epat tuppak. Ka matat kudduat bulat sipunenan ai sara simatotoila kele 22kudduat pasibuluat sibara ka loina, buaknia telu ngaeto, nantania rua ngaeto samba lionia rua ngaeto, sangamberi tuppak samba apo'nia samba rupinia sibara ka lapri. Kuanangan katubukku: “Nene te meja sibabara ka matat Tuhan.”

23Kudduat sabeu ai rua matat baliu samba kudduat bulat sipunenan 24ai rua kekre matat baliu. Ka senen matat baliu nenda ai rua kekre matat baliu sioi tupatumeng, rua matat baliu ka sisara samba rua matat baliu ka bagei. 25Ka sangamberi matat baliu nene leu, iate sangamberi matat baliu kudduat simalio, tusurat tularat malaika samba paloinaloinat korma, kele ka sangamberi rupi. Ka matat kudduat Uma Sipunenan nenda, iate ka uja, ai orat loina. 26Ka rua rupit be'bet uma nenda ai jandela sibara kekre komak samba surat paloinaloinat korma.

Currently Selected:

Jehz. 41: MWV

Highlight

Copy

Compare