Dan. 9
9
Panindogat Daniel
1Ka rura siboiki puparentaat Darius, togat Ahasyweros, sibara ka muntogatda tai Media, sibailiu rimata ka purimataatda tai Babel. 2#Jer. 25:11, 29:10Kateteret nenda aku, Daniel, basakungan sangamberi buko sipunenen. Siripot tiboiet Tuhan katubut nabi Jeremia Jerusalem ibailiu le geti siragatat pitu pulungarura burunia. 3Lepa mattaikungan ka matat Tuhan Taikamanau, manindou samba mupuaso samba leu masipakei komak goni, samba mukuddu kauddut abu. 4Lepa panindoukungan katubut Tuhan Taikamanuangku, masiseseake joku, kise, “Oi Tuhan Taikamanua, siabeu le Ekeu, samba kusuru' le kai Ekeu. Nusunnake le palelenganNu samba nupatoila le nuntut bagam katubutda sipununtuki Ekeu baga samba sigalaiake siparentaakenenNu.
5Akugalaian jo samba sele. Akugalaian kai pukakatai samba ta amareddet kai. Akupasabauan kai parenta samba surukatNu. 6Ta amareddet kai ka sapaguguletNu, ka tai nabi, sipaninibo kabagat onim katubutda tai rimatamai, ka sautemai, ka taikebbukatmai samba ka tai kalaggaiatmai. 7Oi Tuhan, Ekeu le sineseat, tapoi mateu le kumaila kai kele kagogoi nene. Kai iate tai Jehuda, sipulaggai ka laggai Jerusalem, samba sangamberi tai Israel, sikuddu ka leggre samba ka sareunan, ka sangamberi laggai anuribbaiake kai kalulut taimaredetmai katubum. 8Oi Tuhan, kai, tai rimatamai, sautemai, taikebbukatmai mateu le amaila kalulut akugalaian kai jo ka matam. 9Ekeu le sisun pununtuat baga samba katuappekat, kenanen akusaggangingan kai Ekeu. 10Ta akuarepi kai ngangam, Tuhan Taikamanua mai, sikoiniake kai murimanua siripot sangamberi surukat siakeNu katubumai, sinegeakenennu ka tai nabi samba sapaguguletNu. 11Sangamberi tai Israel arapasabauan surukatNu samba ta amareddet sia ta araarepi ngangam. Anuorakakean katubumai telei samba suppa, siripot sitususurat kabagat Buko Mose, paguguletNu nenda, kalulut akugalai ka jo katubum. 12Aironnakean tiboietNia, sinegeakenenNu katubumai samba ka sautemai. TiboietNu nenda masikua katubumai, Nubabaraake te pugejaat baga sabeu sitapei amuaili ka polak kele sipuaaili ka Jerusalem. 13Kele sitususurat ka Bukot Mose, sangamberi pugejaat baga sabeu siorak kai nene. Tapoi kenanen kisedda, ta akutiddou kai pukatekat bagam, muolei baga ka sangamberi puseleatmai samba masipuletsei surukatNu. 14Kalulut nenda nupatarek le pugejaat baga samba orakakenungannia katubumai; kalulut Ekeu iate simaroipo ka sangamberi sigalaiakenenNu.
15Oi Tuhan Taikamanuamai, sipasiambit pamianNu bela ka laggai Misir kabagat gege. Gegem nenda mariuriu le turepdep. Amajongan samba amaselengan kai. 16Oi Tuhan, siripot katet bagam, eddangan itusabau golu sabeu samba pateleijatNu ka Jerusalem, laggaiNu, leleuNu sipunenan; kalulut jomai samba puseleatda taikebbukatmai, iageti Jerusalem samba paamianNu aibailiuan paloloiet ka sangamberi sirimanua sigoilik kai. 17Kalulut nenda, oi Taikamanuamai arepi le panindogat samba tiddoget paguguletnu nene. Toroiji le umam sipunenan simararagat nenda, kabagat torot matam kalulut Ekeu. 18Oi Taikamanuangku, tongiake talingam samba arepi, bukaake matam samba itco katusubuatmai samba laggai oniakenen kabagat onim, ta kalulut putotopimai, tapoi kalulut sun pununtuat bagam le. 19Oi Tuhan, arepmake le! Oi Tuhan appeake le! Oi Tuhan lelekake samba galaiake le simaola! Aipoi Ekeu le Taikamanuangku, kalulut laggai samba paamianNu oniakenen kabagat onim!”
Pitupulu ngaminca pitu tetere
20Aipeile aku maninibo samba manindou, masiseseake joku, jotda taikalaggaiatku samba jot Israel, samba masisegeake ka matat Tuhan, Taikamanuangku, bule itoiliake minca ka erukat umaNia sipunenan. 21#Luk. 1:19, 26 Aiaku maninindou tuburutnangan simaola si Gabriel ka ipoku, siitcoku siburu kapasiitcot mata keteteret masipanguruatnake buluakenen kasoibokat. 22Lepa gelaiakenangan aku samba panibonangan katubukku: “Daniel, kineiget amoian aku masiake pusikuat paatuat puaagai katubum. 23Kateteret anutaddaake masisegeake panindogat ka Taikamanua akenangan leu alegiat. Oto oi aku masisegeake katubum, kalulut ipununtuki le ekeu baga Taikamanua. Oto arepmake simakolou tiboiet nene nenda samba lelekake siitcot mata nenda!
24Pitu pulungaminca pitu ngarura iate tetere siteuakenen Taikamanau masibelaake taikalaggaiatmui samba laggaimui sipunenan nenda ka pukakatai, addeat masitataake jo, masilepaake jo, masiposa puseleat, addeat masiparon puroipoat sitaitatata, masisunake pasiitcot mata samba pasitutuptup samba masisukatnake uman Tuhan sipunenan nenda.
25Oto agai samba lelekngake: Ai tetere pitungaminca pitungarura barania aitubelaake parenta tupaeru minca Jerusalem teret oinia sara ute sipilit Taikamanua. Enem pulurua ngaminca pitu ngarura burunia tupaeru minca Jerusalem, enungan samba sopak, tapoi tetere nenda sun le pugejaat baga. 26Kapangampulat tetere nenda ute' sipilit Taikamanua nenda tubeleake le geti, kenanen taanai selenia. Iageti oi saladdut sara rimata simage'ge. Pakatainangan laggai Jerusalem samba Uman Tuhan, tapoi rimata nenda matei le nia ka eba sabeu. Pat aili ka kalepakat polak mariuriu le pasaggangan samba katusubuat, kele siteuakenen Taikamanua. 27#Dan. 11:31, 12:11; Mat. 24:15; Mrk. 13:14 Rimata nenda igalai le geti palelengan ibailiu masane pasamba sirimanua simigi burunia sangaminca pitungarura. Ka paoggangan tetere nenda, iariake le geti buluakenen samba panguruat. Lepa geti sara bulat kalotoakenen oniakenen Pukakatai sipasiraragatake tugalakake le geti ka Uman Tuhan samba mariuriu le ikuddu sedda teret sipasigagalakenia sedda ioraknia katusubuat siteuakenen Taikamanua ka sia.
Currently Selected:
Dan. 9: MWV
Highlight
Copy
Compare
Share
Want to have your highlights saved across all your devices? Sign up or sign in
@LAI 2015
