Dan. 10

Itcot matat Daniel ka bebet bagat oinan Tigris

1Ka rura sikatelu pamarentaat Koresh Rimata Persia, sara patonekat tupoiliat kai Daniel sipuoni Beltsazar. Patonekat nenda sineseat samba pagalaiat pugejaat baga sabeu. Iageti ukkaakenangan patonekat nenda samba masileleake itcot mata nenda.

2Kateteret nenda aku, Daniel, mureureu baga telu ngamenggui burunia. 3Komen simananam akkula ta akukom, anggur ta akulo samba ta akutulaiji alaiku.

4Ka gogoi sikarua pulu epat laggo siboiki rura nenda, kateteret aiaku muririo ka bebet oinan sabeu iate bagat oinan Tigris. 5#Pamoil. 1:13-15, 2:18, 19:12 Tegglaakekunga uteku, lepa itcokungan sara sirimanua sileppeiake komak juto samba akkik tengania sigalai sibara ka mas simaeru. 6Tubunia makirisau, pumataatnia kele torot bila; samba matania matoro kele obengan. Para samba rerenia mukirisau kele tembaga sinasai samba ngangania kele gaugau sirimanua simigi.

7Sarat aku, Daniel, amasiitco itcot mata nenda, tapoi sangamberi sirimanua pasambaku, ta araitco', tapoi amaloto le sia simakope pat pabalaurangan samba pulipputrangan. 8Kisedda te akukuddu sarakku.

Kateteret akuitco itcot mata sabeu nenda, sappru puroroku tubuku; mamusinangan mataku simakope samba sappru ron tubuku. 9Lepa geti arepkungan ngangania, samba kateteret akuarep ngangania nenda, kalapuinangan samba bele aku sipululukke ka polak. 10Tapoi ai sara kabei sirape aku samba sikau aku tusuru murekkuk mutukke ka bokklo samba kakabeiku.

11Kuanangan katubukku, “Daniel, ekeu te kilibet bagat Taikamanua, lelekake patonekat kuanenku katubum, rioake ekeu ka rerem, aipoi kineiget atukoiniakean aku moi katubum.” Kateteret aikua pagalaiat nenda katubukku, puriokungan kageret tubu.

12Lepa kuanangan katubukku, “Daniel, bui numaloto. Kalulut aiarepingan panindogatnu barania ka siboiki peile anuisiake ibara puaagainu samba masipaepe tubu ka matat Taikamanuam, samba akuoi nene sibailiu alegiat tiboietnu nenda. 13#Pamoil. 12:7 Malaika sijago purimataat Persia masioddoi aku ujunia rua pulu sara ngagogoi. Lepa geti Mikhael, sara katalagat ute'ra tai malaika, moi masiropake aku. Kaddiuakekuangania sedda isaggangi rimatatda tai Persia. 14Lepa oi aku masiropmake ekeu nuagai sibabara geti ka laggainu ka kalepakat gogoi, kalulut itcot mata nenda leu pagalaiat gogoi sibabara nenda.”

15Kateteret aikua pagalaiat nenda katubukku, lukkukakekungan uteku samba taioinangan kupanibo. 16Tapoi siputubu kele sirimanua nenda masibekbek biboku, lepa ngangaakekungan ngungungku samba taddaakekungan manibo. Kuakungan katubutnia, “Tuanku, kalulut itcot mata nene bara taioi tubuku samba sappru ron tubuku. 17Kipa ioi kupanibo kai Tuan? Beringan ron tubuku asapprungan samba sun le engangku.”

18Iageti malaika kele sirimanua nenda bekbeknangan aku minca samba akenangan ron tubuku. 19Kuanangan malaika, “Ale ekeu kilibet bagat Taikamanua, bui numaloto, kau matarek bagam samba ronnake le ekeu!”

Ainia maninibo katubukku, againangan tubuku ron tubu minca, samba kuakungan: “Panibongan, Tuanku, aipoi anuakean ron tubuku.”

20Lepa kuanangan malaika, “Nuagai leu, angoi aku oi katubum” Taan mauju kutoili kuei pasaggak kusaggangi malaika sijago tai Persia. Lepat kukalaakenia, iageti oi malaika sijago tai Junani. 21Kenanen kisedda, kupaagai le geti katubum sitususurat kabagat buko sipunenan.

Taanai berisara sia sipurio ka rubeiatku simauine patuat masisagganginia, sarat si Mikhael le malaika sijago Israel.

Currently Selected:

Dan. 10: MWV

Highlight

Copy

Compare