MIKA 6
6
1Ivwenu chize Yehova anambe ngwenyi,
Katukenu nulisambise kumeso ja milundu;
mindundena yikevwe liji lienu.
2Enu milundu ivwenu chikuma cha Yehova,
ni yenu fundamentu jikolo ja hashi;
mumu Yehova kanasumu atu jenyi,
makasopa ni A-Izalele.
3Atu jami, yika nanulinga?
Hahi nanupinjisa? Ngukumbululenu!
4Nanuchijile ku chifuchi cha Engitu,
nikunukula ku zuwo lia upinji.
Natumine Mose, ni Arone, ni Miriame kunutetekela.
5Enu atu jami, iwulukenu chize Mbalake
mwanangana wa Moape watakile,
ni chize Mbalau mwana Mbeore wamukumbulwile;
ni chize chanuwanyine chize ku Shitime ndo ku Ngilingali
hanga nukanyingike yilinga ya ulamwino wa Yehova.
6Neka mungwiza kumeso ja Yehova
nikulihetamina kumeso ja Zambi mwilu?
Mungwiza kumeso jenyi ni milambu ya kulumba,
hanji ni yimbembe ya ngombe ya mwaka umuwika?
7Yehova mevwa kuwaha ni tununu twa kuji a mapanga
hanji ni kumi lia tununu a njiji ja maji?
Munguhasa kuhana mwanami mutangu ha mutonga wami
hanji muhuko wa mujimba wami ukafwike shili ya mbunge yami?
8Ena lunga, hanakulweze chize Chinapeme.
Yehova yika anafupu kuli yena
shina kupatula ni ululi, ni kuzanga vumbi,
ni kuliendela ni Zambi ye ni kulikehesa?
9Liji lia Yehova linatambika mu chihunda;
mukwa mana mamona jina lie.
Panjikenu ku mulumbu ni yoze waatongwele.
10Munguhasa kuvulama upite wa ungulungulu mu zuwo lia chingulungulu,
hanji njongo ya kukehesa yize yinashingiwa?
11Mungusambisa mutu ni mbalansa ya ungulungulu,
ni njeke ya pezu ja kwonga?
12Pichi jenu kanazala ni upupilo;
waze atungamo kakuhanjika mahuza
malimi ja mu makanwa jo a kwonga.
13Kashika hinaputuka kunulamba
ni kunupwisa a hululu ha mukunda wa mitonga yenu.
14Kulia munulia alioze kunuchi kukuta;
zala muyikatwama muchima lienu.
Munutulika yuma ahoze kunuchi kapita.
Ni yize munupita, yami munguyikunjika ku katana.
15Munukuwa mbuto alioze kunuchi kacha.
Munufunga mitondo ya olevwe ahoze kunuchi kalikwata maji.
Munukama uva ahoze kunuchi kanwa vinyu.
16Mumu nwakufunga shimbi ja Omiri,
ni yitanga yeswe ya munyachi wa Ahabe,
ni yenu nwakwenda mu yiyulo yo,
hanga ngukapwiseko kwa hululu,
ni akwa kutwamako akasauke.
Chocho kulenya cha mavungu muchikapwa hali yenu.
Currently Selected:
MIKA 6: Csa
Highlight
Copy
Compare
Share
Want to have your highlights saved across all your devices? Sign up or sign in
Chokwe Bible © Bible Society in Angola, 1975.
