MIKA 5
5
1Ena mwana-pwo wa yihuji, likungulule mu yihuji
mumu hanatuseleka.
Mukwa kuyula Izalele
makamulamba ha tafu ni mbwechi.
2Alioze yena Mbeteleme Efrata,
mukepe Wahiana hakachi ka minyachi ya Yunda,
kuli yena kumukungutuhukila
umwe yoze makapwa mukwa kuyula Izalele.
Chikota chenyi cha ku miaka, kwe ku shakulu.
3Kashika kumakaakunjika ndo mwaka uze mukwa kufumbajala hasema.
Henaho masalila ja usoko wenyi makahiluka
kuli atu ja Izalele.
4Kumakamana nikulisa mbunga yenyi ya mapanga
mu tachi ja Yehova;
mu ulamba wa jina lia Yehova Zambi yenyi.
O kumakatwama kawape,
mumu henaho iye kumakapwa munene
ndo ku masongo a hashi.
5Mba yono makapwa sambukila,
muze A-Asuria makanjila mu chifuchi chetu
nikuliata ha mavu jetu,
se yetu mutukasolola kulimika nenyi tufunga shimbiali
ni alemu ja atu nake.
6O makayula chifuchi cha Asuria ni katana,
ni chifuchi cha Nimorote machiyula ni katana wa kutomona.
Makatupulula kuli A-Asuria
muze manjila mu chifuchi chetu
nikuliata muchima lia njiza yetu.
7Henaho masalila ja Yakomba makapwa
hakachi ka mavungu anji
ngwe mume wa kuli Yehova;
ngwe vula ha mwambu
yoze kazeyele kuli atu
chipwe kutwaminyina atu.
8Masalila ja Yakomba makapwa hakachi ka mavungu.
Makapwa hakachi ni hakachi ka mavungu anji,
ngwe ndumba hakachi ka tushitu a mu musenge;
ngwe mwevu wa ndumba hakachi ka mbunga ja mapanga,
yoze ha kupalika kakuliata nikupapulula,
ni yoze mapulula wakuhi.
9Munukazundula kwoko lienu hali akwa kulimika,
ni akwa kole jenu eswe munwatetaho.
10Yehova kanambe ngwenyi,
Ha tangwa lize mungukateta tuvwalu twenu hakachi kenu
nikwonwona matemba jenu a jita.
11Mungukateta yihunda yenu yeswe mu chifuchi chenu,
nikupuzula yihunda yenu ya kukolesa.
12Mungukatetaho wanga mu chifuchi chenu,
kunuchi kapwa nawa ni tahi.
13Mungukatetaho tuponya twenu
ni manguji jenu hakachi kenu.
Kunuchi kahetamina nawa
ku yitanga ya moko jenu.
14Mungutukula Ashera#5.14 Mitondo ya mahamba. jenu hakachi kenu,
nikwonwona yihunda yenu.
15Ni utenu ni ufwatulo mungufwetesa
mavungu aze kononokene.
Currently Selected:
MIKA 5: Csa
Highlight
Copy
Compare
Share
Want to have your highlights saved across all your devices? Sign up or sign in
Chokwe Bible © Bible Society in Angola, 1975.
