ULEVI 23
23
1Yehova yamba kuli Mose ngwenyi, 2Amba kuli A-Izalele ngwe, Yiwanyino ya kutongola ya Yehova, yize munulakenya yikapwe yikungulwila yisandu, ye yiwanyino yami ya kutongola, yino: 3munulinga milimo ha matangwa asambano alioze liamuchishimbiali mulipwa Sambata yilemu ya kuhwima. Munupwa ni chikungulwila chisandu, kanda nulinga milimo niyimwe mumu muyipwa Sambata ya Yehova kweswako munutwama.
4Yiwanyino ya Yehova ya kutongola, ye yikungulwila yisandu, munuyilakenya ha matangwa jayo ngwami, yino: 5ha kakweji mutangu, ha tangwa kumi ni liamuchiwana ha chingoloshi muhapwa Chizomboka cha Yehova. 6Mba ha tangwa kumi ni liamuchitano lia kakweji yomwene muhapwa chiwanyino kuli Yehova cha mbolo kuyishi futunwiso. Matangwa shimbiali munukalia mbolo kuyishi futunwiso. 7Tangwa litangu munupwa ni chikungulwila chisandu. Kanda nulinga milimo yilemu niyimwe. 8Alioze munuhana kuli Yehova mulambu wa kahia matangwa shimbiali, mba ha tangwa liamuchishimbiali munupwa ni chikungulwila chisandu. Kanda nulinga milimo yilemu niyimwe.
9Yehova yamba kuli Mose ngwenyi, 10Amba kuli A-Izalele ngwe, Muze mununjila mu chifuchi chize ngunanwehe, munukacha mbuto yamo, nukwete kuneha chichita cha mbuto yitangu ya kucha chenu kuli sasendote. 11Iye makahungisa che chichita kumeso ja Yehova hanga akanutambule. Ha tangwa lia kukaula Sambata machihungisa. 12Ha tangwa lize munuhungisa chichita nukalambule kuji ya panga wa mwaka umuwika, keshi chipa, akapwe mulambu wa kulumba kuli Yehova. 13Mulambu wawo wa wunga muupwa wa yihanda yiali ya ku yihanda kumi ya njongo ya efa#23.13 Efa—chisoka cha 30 kilos ya wunga wafufunuka wa kuchinga ni maji. Akaulambule ni kahia kuli Yehova ha lupembo mupema. Mulambu wawo wa kunwa ukapwe wa vinyu, chihanda chamuchiwana cha njongo ya hine.#23.13 Hine—ngwe 6 litros 14Kanda nulia mbolo hanji mbuto, yipwe yumu, yipwe ya wisu, ndo tangwa lize, ndo hinwaneha mulambu wa Zambi yenu. Acho chiyulo cha mutolo ndusu yisemuko yenu yeswe kweswako munutwama.
15Mba munwalula semana shimbiali ja muwundu chize ku tangwa lia kukaula Sambata, chize ku tangwa nwaneha chichita cha mulambu wa kuhungisa. 16Ha kwalula makumi atano a matangwa ndo tangwa lia kukaula Sambata liamuchishimbiali nukakunjike mulambu wa wunga wa mbuto yaha kuli Yehova. 17Munuchiza ku mazuwo jenu mbolo jiali akajihungise ja kulinga ni yihanda yiali ya ku yihanda kumi ya njongo ya efa.#23.17 Efa—chisoka cha 30 kilos Jikapwe ja wunga wafufunuka, ja kwocha ni futunwiso jikapwe ja mbuto yitangu kuli Yehova. 18Hamuwika ni mbolo munukunjika ana-mapanga shimbiali a mwaka umuwika keshi chipa, ni chimbembe wa kuji umuwika, ni kuji a mapanga aali. Akapwe mulambu wa kulumba kuli Yehova hamuwika ni mulambu wawo wa wunga, ni milambu yawo ya kunwa, te mulambu wa kahia wa lupembo mupema kuli Yehova. 19Munulambula kuji ya pembe umuwika mulambu ha shili, ni kuji a mapanga aali a mwaka umuwika akapwe chitapo cha milambu ya sambukila. 20Mwe sasendote maahungisa hamuwika ni mbolo ya mbuto yitangu, mulambu wa kuhungisa kumeso ja Yehova, ayo hamuwika ni ana-mapanga aali. Kumuyikapwa yisandu kuli Yehova, ya mbala ya sasendote. 21Mba munulakenya ha tangwa lioliene nukapwe ni chikungulwila chisandu. Kanda nulinga milimo niyimwe yilemu. Chino muchipwa chiyulo cha mutolo kweswako munutwama ndusu yisemuko yenu yeswe.
22Muze munukacha mbuto ya mu chifuchi chenu kanda nukacha mu minda yenu ndusu ndo ku njiza. Chikwo nawa kanda nukahuhujola yize yinasala ha kucha. Munuyihichika kuli yiswale ni njize. Yami Yehova Zambi yenu.
23Yehova yamba kuli Mose ngwenyi, 24Amba kuli A-Izalele ngwe, Ha kakweji wamuchishimbiali, ha tangwa litangu lia kakweji, munukafunga tangwa lilemu lia kuhwima. Chikapwe Chiwulwiso cha kuhumuna yitavwi, chikungulwila chisandu.
25Kanda nulinga milimo niyimwe yilemu. Munukunjika mulambu wa kahia kuli Yehova.
26Yehova yamba kuli Mose ngwenyi, 27Ha kakweji mwenawo wamuchishimbiali ha tangwa liamuchikumi mulipwa tangwa lia kufuka shili. Mulipwa kuli yenu tangwa lia chikungulwila chisandu. Munufwichisa mbunge jenu, mba mununeha mulambu wa kahia kuli Yehova. 28Ha tangwa lienalio kanda nulinga milimo niyimwe, mumu liapwa tangwa lia kufuka shili, akanufukileyo kumeso ja Yehova Zambi yenu. 29Mumu mweswawo kalifwichile ha tangwa lienalio kumakamuteta kuli atu jenyi. 30Mweswawo malinga milimo ha tangwa lize mungumunongesa hakachi ka atu jenyi. 31Kanda nulinga milimo niyimwe. Yikapwe chiyulo cha mutolo, ndusu yisemuko yenu yeswe, kweswako munutwama. 32Mulipwa kuli yenu Sambata yilemu ya kuhwima, mba munufwichisa mbunge jenu. Ha tangwa liamuchilivwa lia kakweji, putu ku chingoloshi ndo ku chingoloshi, munufunga Sambata yenu.
33Yehova yamba kuli Mose ngwenyi, 34Amba kuli A-Izalele ngwe, Ha kakweji yono mwene wamuchishimbiali, ha tangwa kumi ni liamuchitano ndusu ha matangwa shimbiali che chiwanyino cha yisakila kuli Yehova. 35Tangwa litangu mulipwa chikungulwila chisandu. Kanda nulinga milimo niyimwe yilemu. 36Matangwa shimbiali munulambula milambu ya kahia kuli Yehova. Ha tangwa liamuchinake munupwa ni chikungulwila chisandu nukalambule mulambu wa kahia kuli Yehova. Acho chikungulwila chilemu, kanda nulinga milimo niyimwe yilemu.
37Yino ye yiwanyino ya Yehova munulakenya yikapwe matangwa a yikungulwila yisandu ya kutongola, hanga nukalambule kuli Yehova milambu ya kahia. Ngwami, Milambu ya kulumba, ni milambu ya wunga, ni yitapo, ni milambu ya kunwa, weswe ha tangwa liawo, 38ya kuweza helu lia Sambata ja Yehova, ni helu lia yawana yenu, ni helu lia milambu yenu yeswe ya yilakenyo, ni helu lia milambu yenu yeswe ya mbunge yize nwakuhana kuli Yehova.
39Ha tangwa kumi ni liamuchitano lia kakweji wamuchishimbiali muze hinwasweka mbuto ya chifuchi munufunga che chiwanyino cha Yehova matangwa shimbiali. Tangwa litangu mulipwa lilemu lia kuhwima, ni tangwa liamuchinake mulipwa lilemu lia kuhwima. 40Ha tangwa litangu munutambula mihuko ya mitondo yipema, mitango ya mingaji, ni mitango ya mitondo ya mafwo, ni misombo ya ku lwiji. Mba munuwahilila kumeso ja Yehova Zambi yenu matangwa shimbiali. 41Munufunga chiwanyino chino kuli Yehova matangwa shimbiali ha mwaka. Chino chapwa chiyulo cha mutolo ndusu yisemuko yenu yeswe. Munukachifunga mu kakweji wamuchishimbiali. 42Munutwama mu yisakila matangwa shimbiali. Waze eswe apwa e enyembo A-Izalele matwama mu yisakila. 43Hanga akwa yisemuko yenu akanyingike chize yami natwamishine A-Izalele mu yisakila muze naachijile ku chifuchi cha Engitu. Yami Yehova Zambi yenu.
44Chocho Mose wambulwilile A-Izalele yiwanyino ya kutongola ya Yehova.
Currently Selected:
ULEVI 23: Csa
Highlight
Copy
Compare
Share
Want to have your highlights saved across all your devices? Sign up or sign in
Chokwe Bible © Bible Society in Angola, 1975.
