ULEVI 22
22
1Yehova yamba kuli Mose ngwenyi, 2Ambulwila Arone ni anenyi a malunga akalihandunune ni yuma yisandu ya A-Izalele yize akungusela, kuchina majilula jina liami lisandu. Yami Yehova. 3Amba kuli ayo ngwe, Nyi umwe hakachi ka ana jenu eswe ndusu yisemuko yenu, makakundama, shimbu uli ni luchisa, ku ye yuma yisandu yize A-Izalele akusela Yehova, akamuteteko kumeso jami. Yami Yehova. 4Niumwe wa ku munyachi wa Arone yoze uli ni mbumba, hanji musongo wa kuhita, makalia ku yuma yisandu ndo hapema. Mweswawo makwata chuma cha luchisa chize chakatuka kuli mufu, hanji lunga yoze hamwanga mbuto yenyi ya ana, 5mweswawo makwata kashitu mukwa kukalala yoze mahasa kumuchisa, hanji makwata mutu yoze mahasa kumuchisa, luchisa wenyi akapwe mweswawo, 6mweswawo makwata umwe hakachi ka wano akapwe wa luchisa ndo chingoloshi. Mba kanda alia yuma yisandu ndo hasanyisa mujimba wenyi mu meya. 7Muze tangwa hilianjila makapema. Mba kulutwe makalia yuma yisandu mumu yapwa kulia chenyi. 8Kashitu yoze walifwila, hanji hanamupapulula kuli tushitu, kanda amulia kulichisa nenyi. Yami Yehova. 9Kashika akafunge chize naakunjika kuchina makambata mulonga wacho akafwe ha kuchijilula. Yami Yehova mukwa kwasela ku usandu.
10Chilambala kanda alia chuma chisandu. Njize mu zuwo ha sasendote, hanji ngamba wa fweto, kanda alia chuma chisandu. 11Ahoze nyi sasendote malanda ndungo wa kupita ni mbongo, iye mahasa kuchilia. Waze asemukina mu zuwo lienyi mahasa kulia ya kulia yenyi. 12Nyi mwana wa pwo wa sasendote halimbata ni chilambala, kanda alia ku milambu ya kuzundula ya yuma yisandu. 13Ahoze nyi mwana wa pwo wa sasendote hafwisa lunga, hanji hamulakula keshi mwana, mahiluka ku zuwo lia tato ngwe ha wanuke wenyi, mba malia kulia cha tato. Alioze chilambala niumwe kanda achilia. 14Nyi mutu malia chuma chisandu kachinyingikine akawezeho chihanda cha tano ku ndando yacho akahilwise che chuma chisandu kuli sasendote. 15Asasendote kanda ajilula yuma yisandu ya A-Izalele yize akulambula kuli Yehova, 16nikwatwika uhenge ni uhie ha kulia yuma yo yisandu, mumu yami Yehova, mukwa kwasela ku usandu.
17Yehova yamba kuli Mose ngwenyi, 18Amba kuli Arone ni anenyi a malunga ni A-Izalele eswe ngwe, Muze umwe mukwa zuwo lia Izalele, hanji njize watwama hakachi ka A-Izalele, maneha mulambu wenyi, upwe wa kufweta chilakenyo, upwe wa ku mbunge yenyi lume, aulambule mulambu wa kulumba kuli Yehova, 19ndo matambula kuji keshi chipa, hanji ya ngombe, hanji ya mapanga, hanji ya pembe, hanga amutambule kanawa. 20Kanda utambula yoze uli ni chipa, mumu kechi kumutambula hali yena. 21Muze umwe matambula chitapo cha mulambu wa sambukila kuli Yehova, ha kumanununa chilakenyo, hanji wa ku mbunge yenyi, apwe wa ngombe, hanji wa panga, hanji wa pembe, kechi kuhasa kumutambula ndo mapwa mupema. Kechi kuhasa kupwa ni chipa. 22Yimuna aze apwa tupuputa hanji yitonji, hanji haateta chihanda, hanji ni musongo wa kuhita, hanji ni mukule, hanji ni yilonda, kanda uahana kuli Yehova, hanji kwatenga mulambu wa kahia kuli Yehova ha chilumbilo. 23Kuji ya ngombe, hanji mwana-panga, yoze uli ni chilio chimwe chisuku, hanji chihi, muhasa kuhana akapwe mulambu wa mbunge alioze kechi kumutambula ha mulambu wa chilakenyo. 24Chimuna yoze uli ni mbili jenyi ja kufwenya, hanji ja kuwonda, hanji ja kupapulula, hanji ja kuteta, kanda umulambula kuli Yehova hanji kumuhana chitapo mu chifuchi chenu. 25Chipwe wamutambula kuli kandaka kanda umulambula akapwe kulia cha Zambi yenu. Se hapwa ni chipa ha kumuwonda, kashika kechi kuhasa kukusalakana.
26Yehova yamba kuli Mose ngwenyi, 27Muze kuji ya ngombe masemuka, hanji ya panga, hanji ya pembe, makatwama ni naye matangwa shimbiali. Mba chize ku tangwa liamuchinake mahasa kumutambula akapwe mulambu wa kahia kuli Yehova. 28Alioze chipwe ngombe, chipwe panga, kanda ushiha naye ni mwanenyi tangwa limuwika. 29Muze mutapa chitapo cha kusakwilila Yehova, muchitapa hanga akakutambule yena. 30Akachilie tangwa lioliene, kanda uhichika nichimwe ndo tangwa likwo. Yami Yehova.
31Chocho nukafunge shimbi jami nikujilinga. Yami Yehova. 32Kanda nukajilula jina liami lisandu, alioze chatamba kungusela ku usandu hakachi ka A-Izalele. Yami Yehova mukwa kunusela ku usandu. 33Nanuchijile ku chifuchi cha Engitu ngukapwe Zambi yenu. Yami Yehova.
Currently Selected:
ULEVI 22: Csa
Highlight
Copy
Compare
Share
Want to have your highlights saved across all your devices? Sign up or sign in
Chokwe Bible © Bible Society in Angola, 1975.
