ULEVI 19
19
1Yehova yamba kuli Mose ngwenyi, 2Amba ku chikungulwila cheswe cha A-Izalele ngwe, Pwenu asandu mumu yami Yehova Zambi yenu nguli musandu. 3Enu eswe mutu ni mutu nukalemese noko ni tatenu. Nukafunge Sambata jami. Yami Yehova Zambi yenu. 4Kanda nutewulukila ku tuponya, hanji ku tuzambi twa kuzuzulula. Yami Yehova Zambi yenu.
5Muze namutambula chitapo cha mulambu wa sambukila kuli Yehova, munuchilambula hanga anutambule kanawa. 6Makachilia tangwa lioliene lia kuchilambula hanji ha kucha. Chihanda cheswacho chasala ndo tangwa liamuchitatu machocha mu kahia. 7Nyi machilia ha tangwa liamuchitatu chapwa cha kuvwisa lwaji. Kechi kuchitambula. 8Mweswawo machilia makambata uhenge wenyi mumu hajilula chuma chisandu cha Yehova. Amutete hakachi ka atu jenyi.
9Muze munukacha mbuto ya mu chifuchi chenu kanda nukacha mu minda yenu ndusu ndo ku njiza. Chikwo nawa kanda nukahuhujola yize yinasala ha kucha. 10Kanda nuhela uva yenu hululu, chipwe uva yize yaholokela hashi kanda nukayanda. Munuyihichikila chiswale ni njize. Yami Yehova Zambi yenu.
11Kanda nwiya. Kanda nwonga. Kanda nuhanjika mahuza umwe kuli mukwo. 12Kanda nulishinga ni mahuza ku jina liami, nukajilule jina lia Zambi yenu. Yami Yehova.
13Kanda nupinjisa mukwenu hanji kumupupa. Fweto ya ngamba kanda yitwama mu kwoko lie ndusu ufuku ndo chimene. 14Kanda nutuka kafwa-matwi. Kanda nusa chitalingiso mu jila ya kafwameso alioze pwenu ni woma kuli Zambi yenu. Yami Yehova.
15Kanda nupatula ni uhenge hanji ni katonde kuli chiswale, hanji ni ulemeso kuli mulemu. Alioze munukapatwila mukwenu ni ululi. 16Kanda nwendangana ni saki hakachi ka atu jenu. Kanda numanyina manyinga a mukwenu. Yami Yehova.
17Kanda uswekela mukwenu kole mu mbunge ye, alioze hanjika nenyi kuchina musala ni mulonga mumu hali iye. 18Kanda ukakala mulonga. Kanda ukapwa ni kakucha mu mbunge kuli atu je, alioze ukazange mukwenu ngwe wakulizanga yena mwene. Yami Yehova.
19Fungenu yiyulo yami. Kanda nutayiza yimuna jenu kusema ni vungu lieka. Kanda nukuwa mbuto jiali munda umuwika. Kanda nuzala mazalo a mahina aali alipwila.
20Nyi lunga mapomba ni pwo wa kapinji yoze hamutenda kuli mukwo, alioze kanda achimukula hanji kumutusula, munuchisopa. Kechi kwashiha se pwo katusukile. 21Alioze lunga akanehe mulambu wa uhie hali iye mwene kuli Yehova. Maneha kuji ya panga ku chikolo cha mbalaka ya chikungulwila akapwe mulambu wa uhie. 22Sasendote mafuka mulonga wenyi havulumuna ni kuji ya panga wa mulambu wa uhie kumeso ja Yehova mba mulonga havulumuna mamukonekenawo.
23Muze mununjila mu chifuchi munukatumba mitondo yeka ni yeka ya kulia, mihuko yayo muyikapwa ngwe ya kujilika. Muyikapwa ya kujilika kuli yenu miaka yitatu. Kanda nukayilia. 24Ha mwaka wamuchiwana mihuko yayo muyikapwa yisandu, muyikapwa mulambu wa uhaliso kuli Yehova. 25Alioze ha mwaka wamuchitano munukalia mihuko hanga yikeme ya kulumbama kuli yenu. Yami Yehova Zambi yenu.
26Kanda nukalia yifwo niyimwe hamuwika ni manyinga jayo. Kanda nukalinga yuma ya kutaha ni ya wanga. 27Kanda nukakelula kambu jenu ha mbalangwe. Kanda nukapihisa masongo a wevu. 28Kanda nukaliteta ha mijimba yenu mumu hali afu. Kanda nukachata mijimba yenu. Yami Yehova.
29Kanda ukalumbula mwané wa pwo ha kumutumbika ku ukoi, kuchina chifuchi cheswe muchilimbukila mu ukoi, mba chifuchi cheswe chikazale tò ni ungulungulu. 30Fungenu Sambata jami. Lemesenu zuwo liami lisandu. Yami Yehova.
31Kanda nukatewulukila kuli akwa mahamba ni akwa tufutafuta. Kanda nukaafupa nukalipihise no. Yami Yehova Zambi yenu.
32Lwezenu vumbi kuli mukwa kambu jitoma. Munukalemesa meso ja mukulwana. Munukapwa ni woma kuli Zambi yenu. Yami Yehova.
33Nyi njize hatunga ni yenu mu chifuchi chenu, kanda munulinga chipi. 34Njize yoze hatunga ni yenu mapwa ngwe mwenyembo hakachi kenu. Munumuzanga ngwe nwakulizanga yenwene, mumu ni yenu nwapwile njize mu chifunchi cha Engitu. Yami Yehova Zambi yenu.
35Kanda nupatula ni uhenge, chipwe ni kweseka cha kusuha, hanji pezu, hanji kwalula. 36Mbalansa jenu jikapwe ja ululi, hi pezu ja ululi, ni *efa ja ululi, ni *hine ja ululi. Yami Yehova Zambi yenu yoze wanuchijile ku chifuchi cha Engitu. 37Munukafunga yiyulo yami yeswe ni shimbi jami jeswe kuyilinga. Yami Yehova.
Currently Selected:
ULEVI 19: Csa
Highlight
Copy
Compare
Share
Want to have your highlights saved across all your devices? Sign up or sign in
Chokwe Bible © Bible Society in Angola, 1975.
